អ្នកមានបំផុតនៅអាស៊ីប្រាប់គន្លឹះទិញផ្ទះ និងរថយន្តបានក្នុងរយៈពេល៥ឆ្នាំ

អ្នកមានបំផុតនៅអាស៊ីប្រាប់គន្លឹះទិញផ្ទះ និងរថយន្តបានក្នុងរយៈពេល៥ឆ្នាំ

ថ្ងៃនេះ Sabay នឹងលើកយកការចែករំលែករបស់មហាសេដ្ឋីហុងកុងលោក Li Ka-Shing ដើម្បីរៀបចំជីវិតអ្នកឲ្យកាន់តែប្រសើរក្នុងរយៈពេល ៥ ឆ្នាំ។ អ្នកមានបំផុតរបស់អាស៊ី (ទ្រព្យសម្បត្តិ ៣៥,២ ពាន់លានដុល្លារ) បានផ្ដល់បច្ច័យគំនិតដើម្បីផ្លាស់ប្ដូរជីវិតបានប្រសើរជាងមុនដូចខាងក្រោម៖

LiKaShingHeader

ឧបមាថា អ្នកមានចំណូល ២០០ ដុល្លារក្នុងមួយខែ អ្នកនៅតែអាចរស់បានដោយប្រសើរ។ ដំបូងអ្នកត្រូវបែងចែកប្រាក់នោះទៅជា ៥ ចំណែក ៨០ដុល្លារ ២០ ដុល្លារ ៣០ ដុល្លារ ២០ ដុល្លារ និង ៥០ ដុល្លារ។

ចំណែកទី១ គឺប្រើសម្រាប់ចំណាយលើការហូបចុក។ ព្យាយាមចំណាយឲ្យធម្មតាតាមដែលអាចធ្វើបាន។ អ្នកអាចបែងចែក ៨០ ដុល្លារដែលអ្នកមានទៅនឹងចំនួន ៣០ ថ្ងៃក្នុងមួយខែ មានន័យថា មួយថ្ងៃអ្នកអាចចំណាយបានជិត ៣ ដុល្លារប៉ុណ្ណោះ។ វិធីដ៏ល្អបំផុតគឺត្រូវញ៉ាំអាហារនៅផ្ទះជាប្រចាំជៀសវាងការចំណាយញ៉ាំអាហារនៅខាងក្រៅដែលចំណាយច្រើន។ នៅពេលអ្នកនៅក្មេង រាងកាយរបស់អ្នកមាំទាំអាចទ្រាំទ្រនឹងការញ៉ាំរបៀបនេះបានច្រើនឆ្នាំ។

ចំណែកទី ២ គឺប្រើសម្រាប់ការពង្រីកបណ្ដាញ។ ២០ ដុល្លារដែលអ្នកមានអាចយកមកប្រើសម្រាប់ទិញអាហារសម្រន់ ឬប៉ាវមិត្តភ័ក្ដិញ៉ាំអាហារម្ដង ឬពីរដងក្នុងមួយខែ។ សេដ្ឋីចិនរូបនេះបានពន្យល់ថា មនុស្សដែលអ្នកគួរទិញអាហារឲ្យគួរជាមនុស្សដែលមានក្ដីស្រមៃធំជាងអ្នក មានជាងអ្នក។ ធ្វើបែបនេះប្រហែលមួយឆ្នាំ អ្នកនឹងទទួលបាននូវកេរ្តិ៍ឈ្មោះ ឥទ្ធិពល និងតម្លៃពីអ្នកដទៃ។ មិនតែប៉ុណ្ណោះអ្នកក៏ស្គាល់មនុស្សល្អៗ ដែលជាផ្ដល់ឱកាសត្រឡប់មកអ្នកវិញនៅថ្ងៃណាមួយនាអនាគតដែរ។ គេនឹងមើលមកអ្នកថា ជាមនុស្សល្អ និងមានសន្ដានចិត្ត។

ចំណែកទី ៣ គឺប្រើទៅលើការបង្កើនចំណេះដឹងរបស់ខ្លួន។

press_20111022-3

អ្នកអាចយកចំណែក ៣០ដុល្លារនេះទៅទិញសៀវភៅ ចូលរួមវគ្គបណ្ដុះបណ្ដាល ឬសិក្ខាសាលាដែលអាចឲ្យអ្នកពង្រីកចំណេះដឹងបន្ថែមកាន់តែទូលាយ។ ពេលទិញសៀវភៅអ្នកគួរអានវាដោយយកចិត្តទុកដាក់ ឬបើអាចគួរសង្ខេបមកជាភាសាកំណើតរបស់អ្នក ហើយចែករំលែកដល់អ្នកដទៃ។ ការចែករំលែកដល់អ្នកដទៃធ្វើឲ្យអ្នកទទួលបានមកវិញនូវការឲ្យតម្លៃ ការជឿទុកចិត្ត និងភាពជិតស្និទ្ធ។ ពេលចំណូលរបស់អ្នកកើនឡើង គួរព្យាយាមចូលវគ្គបណ្ដុះបណ្ដាលដែលល្អៗជាងមុនថែមទៀត។ នៅទីនោះអ្នកនឹងជួបមនុស្សជាច្រើនដែលអាចធ្វើឲ្យការប្រាស្រ័យទាក់ទងរបស់អ្នកនឹងមនុស្សនៅជុំវិញកាន់តែប្រសើរជាងមុន និងទទួលបានចំណេះដឹងកាន់តែទូលាយ។

ចំណែកទី ៤ គឺប្រើទៅការដើរលេង។លើកទឹកចិត្តខ្លួនឯងដោយការដើរលេងយ៉ាងហោចម្ដងក្នុងមួយឆ្នាំ។ ការដើរលេងនៅក្រៅប្រទេស ឬកន្លែងផ្សេងគ្នានឹងផ្ដល់មកឲ្យអ្នកវិញនូវបទពិសោធន៍ថ្មីៗនៃជីវិត។ គួរស្នាក់នៅផ្ទះសំណាក់ថោកៗដើម្បីសន្សំសំចៃ។ បើអាច អ្នកគួរធ្វើដំណើរទៅក្រៅប្រទេសដើម្បីប្រៀបធៀបថា តើប្រទេសដទៃមានការរីកចម្រើនខុសពីប្រទេសអ្នកប៉ុណ្ណា មានចំណុចល្អ ឬឱកាសមួយណាដែលអ្នកអាចទាញយកពីការធ្វើដំណើរទៅប្រទេសទាំងនោះ។

ចំណែកទី ៥ គឺទុកសម្រាប់វិនិយោគ។គួរសន្សំប្រាក់មួយចំណែកនៃចំណូលរបស់អ្នកដាក់ក្នុងគណនីមួយដែលមិនអាចដកបាន។ នៅរយៈពេលប៉ុន្មានឆ្នាំខាងមុខអ្នកអាចយកប្រាក់នោះមកធ្វើជាទុនបើកអាជីវកម្មដ៏តូចមួយ។ អាជីវកម្មទ្រង់ទ្រាយតូចគឺមានសុវត្ថិភាពជាងទ្រង់ទ្រាយធំត្រង់ថា បើអ្នកខាតបង់អ្នកខាតបង់ដើមទុនតិចតួចប៉ុណ្ណោះ តែបើចំណេញវិញវានឹងបើកផ្លូវឲ្យអ្នកសម្លឹងកាន់តែឆ្ងាយក្នុងការវិនិយោគបន្ត។ អ្នកមានបំផុតលំដាប់ទី ១៣ របស់ពិភពលោកបានណែនាំថា សម្រាប់ដើមទុនតិចតួចអ្នកគួរស្វែងរកផលិតផលណាដែលអ្នកគិតថា មានទីផ្សារដើម្បីទិញយកទៅលក់បន្ត។ ពេលអ្នកចាប់ផ្ដើមទទួលបានចំណូលពីអាជីវកម្មតូចរបស់អ្នក នោះអ្នកនឹងកាន់តែមានទំនុកចិត្ត និងភាពក្លាហានខ្ពស់ជាងមុន។

បន្ថែមក្រៅពីការបែងចែកប្រាក់ចំណូលខាងលើ លោក Li Ka-Shing ក៏បានបន្ថែមពីការដាក់ពិន័យទៅលើខ្លួនឯងដែរ។ លោកថា បើឆ្នាំមុនអ្នកមានចំណូល ២០០ ដុល្លារ នៅឆ្នាំបន្ទាប់អ្នកត្រូវប្រឹងប្រែងដើម្បីឲ្យបាន ៣០០ ដុល្លារ ឬខ្ពស់ជាងនោះ។ អ្នកមានដែលផ្ដើមចេញពីជីវិតក្រីក្រដដែលបញ្ជាក់ថា បើធ្វើមិនបានមានន័យថា អ្នកគួរតែខ្មាសខ្លួនឯងដែលនៅតែដដែលគ្មានការអភិវឌ្ឍ និងមួយទៀតចំណូលដដែលមិនអាចឲ្យអ្នករស់នៅបានស្រួលតាមការកើនឡើងនៃអតិផរណា ឬការកើនឡើងនៃតម្លៃប្រេងសាំង ម្ហូបអាហារនោះឡើយ។

មិនថា អ្នកកើនចំណូលប៉ុណ្ណាត្រូវប្រកាន់ខ្ជាប់នូវការបែងចែកប្រាក់ចំណូលជា ៥ ចំណែកដូចខាងលើ។ នេះជាសារចុងក្រោយពីលោក Li Ka-Shing៕

មុន បន្ទាប់

មតិយោបល់