នៅពីក្រោយសុភមង្គលគ្រួសារតើបុរសផ្ដោតលើ ភាពបរិសុទ្ធឬទឹកចិត្តនារីម្នាក់មុនសម្រេចរៀបការ?

នៅពីក្រោយសុភមង្គលគ្រួសារតើបុរសផ្ដោតលើ ភាពបរិសុទ្ធឬទឹកចិត្តនារីម្នាក់មុនសម្រេចរៀបការ?

គេថាប្រុសដូចមាសទឹកដប់ធ្លាក់ភក់រើសលាងទឹកវិញ ស្អាតដូចដើម។ ឯស្រីប្រៀបសំពត់ស ភ្លាត់ប្រឡាក់ស្នាមខ្មៅ ពិបាកលុបលាង។ តើភាពបរិសុទ្ធរបស់នារីម្នាក់ ជាសុភមង្គលពិតប្រាកដ ដែលបុរសភាគច្រើនត្រូវការនៅពេលពិចារណាយកនារីនោះ ធ្វើគូអនាគតឬក៏យ៉ាងណា?

ភួង វ៉ាន់ឌី និស្សិតឆ្នាំទី៣នៅសាកលវិទ្យាល័យភូមិន្ទភ្នំពេញថា ភាពបរិសុទ្ធមុនរៀបការរបស់នារីណាម្នាក់ គឺជាតម្លៃរបស់នាង ប៉ុន្តែវាពុំមែនជាផ្នែកចាំបាច់អត់មិនបានសម្រាប់សុភមង្គលប្ដីប្រពន្ធនោះទេ។ វ៉ាន់ឌី យុវជនវ័យ២៣ឆ្នាំបន្តពំនោល៖ “មែនទែនទៅ វាជាកំហុសរបស់នារីនោះ ព្រោះនាងបានកន្លងប្រពៃណី ប៉ុន្តែចំពោះខ្ញុំគិតថាគ្មានសុភមង្គលទេ បើបានប្រពន្ធគ្មានគំនិត ទោះជានាងនៅបរិសុទ្ធមុនការឬបែបណាក៏ដោយ។ និយាយឲ្យខ្ញុំថា សំខាន់លើចរិត”។

រីឯស្ត្រីមេផ្ទះវ័យ២៨ឆ្នាំ សុធុន ដែលមានស្រុកកំណើតមកពីកំពត ថាមិនមែនប្រុសទាំងអស់ទេ តែថាភាគច្រើនប្រុសៗឲ្យតម្លៃខ្ពស់ស្ត្រីបរិសុទ្ធនៅពេលពួកគេសម្រេចជ្រើសរើសគូស្រករ។ កំពុងផ្ទៀងដោតម្ជុលម៉ាស៊ីនដេរសំលៀកបំពាក់ផង សុធុន បន្តដោយញញឹម៖ ”មុនខ្ញុំមានប្ដី ខ្ញុំមិនដែលឲ្យប្រុសកាន់ដៃ សូម្បីសង្សារក៏មិនធ្លាប់មាន។ ខ្ញុំគ្មានអីត្រូវលាក់បាំងគាត់ទេ តែបើខ្ញុំធ្លាប់ខូចខ្ញុំថានឹងមានរឿងប្រឈមមុខនឹងគាត់មិនខាន ក្រោយការហើយ បើខ្ញុំព្យាយាមលាក់គាត់កាលពីដំបូង ហើយគាត់ក៏ជាអ្នកប្រកាន់រឿងអីចឹងៗទៀតនោះ”។

feature

វិលទៅយុវជន បូរ៉ាត់ មកពីខេត្តសៀមរាបវិញ ថាចង់មិនចង់ ប្រសិនបើមាននារីពីរនាក់មានគុណសម្បត្តិប្រហាក់ប្រហែលគ្នា តែទាស់រឿងភាពបរិសុទ្ធហ្នឹង មនុស្សប្រុសជាចុងក្រោយប្រាកដជារារែកចិត្តទៅរកអ្នកបរិសុទ្ធមិនខាន។ ប៉ុន្តែ បូរ៉ាត់ ថាមិនមានន័យថា នារីបរិសុទ្ធមុនការគឺល្អជាងអ្នកខូចខ្លួនទេ។ បូរ៉ាត់ ពន្យល់ពីអ្វីដែលខ្លួនយល់ឃើញ៖ “ការដែលនារីណាម្នាក់រងគ្រោះ គឺមានលក្ខណៈផ្សេងគ្នា។ យើងគួរស្វែងរកថាតើគាត់ក្លាយជាបែបហ្នឹងដោយសារចរិតភ្លើតភ្លើន ឬគាត់ចាញ់បោក ឬរងគំនាបអីម្យ៉ាង។ ចំពោះខ្ញុំ យកប្រពន្ធគឺខ្ញុំសម្លឹងមើលរឿងល្អរបស់គេច្រើនជាង អតីតកាលគ្រាន់ជាស្រមោល។ បើគេជាមនុស្សចិត្តមិនបាន ទោះបរិសុទ្ធឬអត់ក៏យើងគង់នឹងពិបាកថ្ងៃក្រោយ”។