ប្រាំចំណុចបង្ហាញថា ស្នេហារបស់អ្នកបរាជ័យតាំងពីចាប់ផ្ដើមដំបូង

ប្រាំចំណុចបង្ហាញថា ស្នេហារបស់អ្នកបរាជ័យតាំងពីចាប់ផ្ដើមដំបូង

ស្នេហាខ្លះមានអាយុកាលត្រឹមតែមួយខែ ឬ១០ថ្ងៃក៏មាន ក៏បែកបាក់គ្នាប្រៀបដូចស្នេហាភ្លើងចំបើង ដែលទើបតែផ្ដើមមិនបានប៉ុន្មានផង ក៏ឆេះរលត់បាត់អស់ទាំងមិនទាន់បានត្រៀមលក្ខណៈស្រួលបួល។ ទាំងនេះសុទ្ធតែជាសញ្ញាដែលយុវវ័យមិនចង់បាន។ បើដូច្នេះ អ្វីខ្លះជាកត្តាបង្កហេតុ នាំឲ្យឈានទៅរកបញ្ហាបែបនេះ?

Ponnaka-kalip-style-83

រូបតំណាង

លង់នឹងរូបសម្បត្តិខាងក្រៅ (សង្ហា សិចស៊ី មានមន្តស្នេហ៍)
កញ្ញា ដួង សុវណ្ណថា អាយុ២០ឆ្នាំ សិស្សរៀនថ្នាក់ទី១២នៃវិទ្យាល័យវត្តកោះ បានប្រាប់ពីសញ្ញាបរាជ័យតាំងពីពេលចាប់ផ្ដើមស្នេហាដំបូងថា៖ “ស្ត្រីមួយចំនួនតែងតែចាញ់សម្រស់ទាក់ទាញពីសំបកក្រៅរបស់បុរស ដូចជាទេពកោសល្យខាងលេងតន្ត្រី អាជីព មុខស្រស់សង្ហារ ឬម៉ូដសក់ឡូយ ដែលគួរឲ្យឈ្លក់វង្វេង។ ស្នេហ៍ពិតគឺយើងទុកចិត្តគ្នា គោរពគ្នាទៅវិញទៅមក ហើយយើងស្រលាញ់នៅត្រង់ចរិតពិតរបស់គេ និងស្រលាញ់ខាងក្នុងខ្លួនរបស់គេ មិនមែនតែផ្នែកខាងក្រៅនោះទេ ព្រោះសំបកក្រៅមិនស្ថិតស្ថេរឡើយ”។

ចិត្តរបស់អ្នកទាំងពីរដូចគ្នាតែរឿងមួយចំនួនប៉ុណ្ណោះ
រីឯយុវជន ផៃ បញ្ញារិទ្ធ អាយុ១៨ឆ្នាំ សិស្សរៀនថ្នាក់ទី១២នៃវិទ្យាល័យសន្ធរម៉ុក បានប្រាប់ទាក់ទងនឹងបញ្ហានេះថា៖ “គូស្នេហាដែលមានចំណាប់អារម្មណ៍រឿងដូចគ្នា មិនប្រាកដថាអាចរស់នៅស្រលាញ់គ្នាបានទេ។ ឧទាហរណ៍ យើង និងគេស្ថិតនៅក្នុងការប្រជុំទាមទារសិទ្ធមនុស្ស។ គេបញ្ចេញទស្សនៈប្រហាក់ប្រហែលនឹងអ្វីដែលយើងកំពុងតែគិតដែរ។ យើង និងគេមានអារម្មណ៍ចំពោះគ្នាជាខ្លាំង ហើយតែងគិតថាគេ និងយើងមានចិត្តដូចគ្នា ប៉ុន្តែយើងមិនបានគិតថា ផ្នែកផ្សេងទៀតដែលនៅសល់ក្នុងជីវិតរបស់អ្នកទាំងពីរស៊ីចង្វាក់គ្នាឬអត់?“។

ដើរតួជាវីរបុរសជួយនារីក្រខ្សត់
ចំពោះលោក ណាល់ និរិទ្ធ អាយុ១៨ឆ្នាំ សិស្សរៀននៅវិទ្យាស្ថានប៊ែលធី ថ្នាក់ទី១២ និយាយប្រាប់ថា៖ “នៅពេលដែលយើងធ្វើល្អដាក់នារីណាម្នាក់ក្នុងន័យឲ្យអ្នកដទៃសម្លឹង និងកោតសរសើរថា ជាបុរសមានសន្តានចិត្តល្អ ចេះយកអាសា រហូតដល់ការសំដែងនេះផុងជ្រុលក្លាយជាស្នេហា។ ទីបញ្ចប់បរាជ័យនឹងកើតមានឡើង“។

យកសង្សារថ្មីបញ្ឈឺចិត្តសង្សារចាស់
សម្រាប់កញ្ញាទី ដាណេ សិស្សថ្នាក់ទី១១នៃវិទ្យាល័យហ៊ុនសែនបុរី១០០ខ្នង បានបញ្ចេញយោបល់ទាក់ទងនឹងបញ្ហានេះថា៖ “ស្នេហាប្រភេទនេះមិនត្រឹមតែមិនអាចដំណើរការទៅមុខរួចប៉ុណ្ណោះទេ ថែមទាំងបន្សល់នូវវិប្បដិសារីទាំងសងខាង ហើយចុងក្រោយអ្នករបួសខ្លាំងជាងគេ គឺយើងដែលជាអ្នកផ្ដើម”។

Ponnaka-kalip-style-19

រូបតំណាង

លើកតម្កើងគូស្នេហ៍ទុកនៅលើហ៊ឹង
ដោយឡែកយុវសិស្ស យឹម សុភក្រ្តា អាយុ១៧ឆ្នាំ សិស្សវិទ្យាល័យជាស៊ីមបឹងកេងកង ពន្យល់ប្រាប់ថា៖ ”ស្នេហាដែលមិនស្មើភាពគ្នាតាំងពីចាប់ផ្ដើមស្រលាញ់មកម្ល៉េះ ជាស្នេហាមិនធម្មតា។ ទោះជាខាងក្រៅមើលទៅពួកគេកៀកកើយគ្នាក្ដី តែក្នុងចិត្តបានលើកតម្កើងគូស្នេហ៍ទុកខ្ពស់រហូតឈោងមិនដល់។ អ្នកដែលលើកគូស្នេហ៍ខ្ពស់ជាងខ្លួន គេតែងសង្កត់ខ្លួនឯងឲ្យទាបជាងគូស្នេហ៍ ទ្រគេខ្លាំងពេកទាំងមិនហ៊ានសូម្បីខឹងទោះគេខុសក៏ដោយ ព្រោះស្រលាញ់ផ្កាប់មុខ“។

ប្រភពសប្បាយ

មុន បន្ទាប់

មតិយោបល់