ឧស្សាហ៍មានភាពតានតឹងនៅកន្លែងធ្វើការគួដោះស្រាយបែបណា?

ឧស្សាហ៍មានភាពតានតឹងនៅកន្លែងធ្វើការគួដោះស្រាយបែបណា?

ស្ត្រេស ឬភាពតានតឹងនៅកន្លែងធ្វើការពិតជាអាចប៉ះពាល់ដល់ជីវិតផ្ទាល់ខ្លួនរបស់អ្នកបាន។ មនុស្សគ្រប់គ្នាត្រូវតែចេះដោះស្រាយនឹងបញ្ហាពិបាក, សម្ពាធការងារ ។ល។ នៅកន្លែងធ្វើការ។ មានរឿងច្រើនណាស់ដែលនាំអោយមានភាពតានតឹងក្នុងអារម្មណ៍។ ស្ត្រេសអាចមានឥទ្ធិពលអវិជ្ជមានដល់សុខភាព និងផ្លូវចិត្តរបស់មនុស្ស តែក៏មានផលអាក្រក់ដល់សង្គមគ្រួសារផងដែរ។ យកល្អគួរតែគ្រប់គ្រងស្ត្រេសនេះអោយបាន ដើម្បីទទួលបានតុល្យភាពនៃជីវិតការងារ។

សម្រាក
មិនត្រូវចេះតែបណ្តោយខ្លួនធ្វើការជាប់រហូតនោះទេ។ ការងារដែលធ្វើមិនចេះសម្រាកសោះនោះ នឹងធ្វើអោយមានភាពតានតឹងទាំងរាងកាយ និងផ្លូវចិត្ត ហើយផលិតផលក៏ថយចុះដែរ។ ដូចគ្នានេះដែរ ចូរចំនាយពេលវេលាវិស្សមកាលអ្នកអោយឆ្ងាយពីការងារផង ពេលនោះអ្នកនឹងទទួលបានពេលវេលាល្អៗក្នុងជីវិត។

រៀននិយាយថា ទេ ខ្លះទៅ
វាតែងតែមានការងារច្រើនធ្វើជាប់រហូតបើសិនជាអ្នកចេះតែទទួលយកសំណើរពីគេ។ មិនត្រូវព្យាយាមធ្វើអោយនរណាម្នាក់សប្បាយចិត្ត ហើយយកការងារមកធ្វើខ្លួនឯងជ្រុលពេកឡើយ។ ផ្ទុយទៅវិញ ការបញ្ជាក់យ៉ាងសុភាព និងនិយាយថាហេតុអ្វីអ្នកមិនធ្វើខ្លួនឯងទៅ ឬអោយអ្នកផ្សេងធ្វើជំនួសទៅ គឺជារឿងមួយដែលសាកសមបំផុតហើយ។ រឿងនេះនឹងជួយអោយអ្នកអាចគ្រប់គ្រងការងារ និងបន្ថយស្ត្រេសបានយ៉ាងល្អ។

កំណត់គោលដៅអោយបានច្បាសលាស់
ទោះបីជាអ្នកចូលចិត្តអ្វីដែលអ្នកធ្វើក៏ដោយ ក៏អ្នកមិនត្រូវធ្វើវាច្រើនហួសហេតុដែរ។ ចូរចាំថា មិនត្រូវជម្រុញខ្លួនឯងអោយធ្វើអ្វីៗហួសដែនកំណត់ឡើយ។ ការកំណត់គោលដៅមិនជាក់លាក់គ្រាន់តែបង្កើនស្ត្រេស និងបន្ថយសមត្ថផលរបស់អ្នកប៉ុណ្ណោះ។

ធ្វើរឿងមួយតែម្តងបានហើយ
អ្នកប្រហែលជាមានរឿងច្រើនដែលត្រូវធ្វើហើយ។ ស្ថិតក្នុងស្ថានភាពប្រញាប់បញ្ចប់រឿងទាំងអស់ ចូរមិនត្រូវចាប់ផ្តើមធ្វើរឿងទាំងអស់នោះជាមួយគ្នាឡើយ ព្រោះវានឹងធ្វើអោយអ្នកស្ត្រេសកាន់តែខ្លាំង។ ផ្ទុយទៅវិញ ចូរធ្វើរឿងមួយក្នុងពេលតែម្តង ហើយអ្នកនឹងអាចទទួលបានជោគជ័យកាន់តែច្រើន ដោយមិនធ្វើអោយស្ត្រេសដល់ខ្លួនឯងទៀត។

ហាត់ប្រាណបែបធម្មតាៗ
ទោះបីជានៅកន្លែងធ្វើការក៏ដោយ អ្នកក៏អាចធ្វើចលនាពត់ខ្លួនបន្តិចបន្តួចដើម្បីបន្ធូរអារម្មណ៍បានដែរ។ ការដកដង្ហើមជ្រៅៗរយៈពេលពីរបីនាទីនឹងជួយអោយអារម្មណ៍ធូរស្រាល ព្រមទាំងក្លាយខ្លួនជាមនុស្សម្នាក់ថ្មី និងកំចាត់មេរោគស្ត្រេសពីក្នុងខ្លួន និងចិត្តគំនិតបានទៀតផង។

រៀបគម្រោងធ្វើសកម្មភាព
នៅពេលដែលមានរឿងជាច្រើនដែលត្រូវធ្វើ ចូររៀបចំកាលវិភាគ និងសម្គាល់ថាមួយណាត្រូវធ្វើមុនគេ និងមួយណាត្រូវធ្វើបន្តបន្ទាប់។ រឿងនេះនឹងផ្តល់ជាយោបលអ្នកនូវអ្វីដែលនឹងត្រូវបញ្ចប់បាន។ ចូរបញ្ចប់គោលដៅដែលសំខាន់ក្នុងដៃអោយអស់ដើម្បីអោយមានអារម្មណ៍កាន់តែមានផាសុខភាព, បន្ថយស្ត្រេស និងថប់អារម្មណ៍។

ប្រគល់សិទ្ធអោយគេធ្វើជំនួស
ទោះបីជាអ្នកជាមនុស្សជំនាញឯកទេសក៏ដោយ ក៏អ្នកមិនដែលដឹងរឿងគ្រប់យ៉ាងដែរ។ ដូច្នេះចូរផ្តល់ការងារខ្លះអោយអ្នកផ្សេងធ្វើជំនួសខ្លះទៅ ព្រោះវានឹងជួយបន្ថយធុរៈបាន ព្រមទាំងស្ត្រេសការងារ។ មិនត្រូវខ្មាស់អៀនក្នុងការសុំគេអោយជួយឡើយ។ ការដែលមានភាពខ្មាស់អៀនជាប់រហូតមានតែបង្កើនស្ត្រេសកាន់តែខ្លាំងលើវិស័យការងារទៅវិញទេ។

កុំយកការងារមកធ្វើនៅផ្ទះ
ចូរចាំថា ការងារត្រូវធ្វើនៅកន្លែងធ្វើការ ដូច្នេះវាមិនមែនជាអ្វីដែលអ្នកត្រូវប្តូរជីវិតទាំងមូលធ្វើវាជាប់រហូតនោះទេ។ មិនត្រូវព្យាយាមធ្វើការងារអ្វីដែលទាក់ទងនឹងបញ្ហានៅផ្ទះឡើយ។ ផ្ទុយទៅវិញ បើអ្នកយកវាមកធ្វើនៅផ្ទះទៀត វានឹងបង្កើតបានជាសម្ពាធក្នុងគ្រួសារ ហើយមនុស្សគ្រប់គ្នាក្នុងផ្ទះក៏ត្រូវស្ត្រេសដោយសារអ្នកដែរ។

ស្រឡាញ់ការងារ ឬចង់ផ្លាស់ប្តូរវា
ចូរមិនត្រូវបង្ហិនពេលវេលាចោលទទេក្នុងការធ្វើអ្វីមួយដែលអ្នកមិនចូលចិត្តឡើយ។ ទោះបីជាអ្នកមិនមានការងារច្រើនធ្វើក៏ដោយ ក៏ការងារដែលអ្នកមិនចូលចិត្តនៅតែធ្វើអោយអ្នកស្ត្រេសជាប់ដដែល។ បើសិនជាស្ត្រេសនោះកើតឡើងដោយសារការងារដែលអ្នកមិនចូលចិត្ត ចូរផ្លាស់ប្តូរវាចេញទៅចប់ហើយ៕