បរទេស៖ ជាធម្មតានោះទេ ដែលអាការៈពុលឡាន ឬក៏ពុលរលក តែងតែកើតមាន ឡើងទៅលើ មនុស្សមួយចំនួន រាល់ពេលដែល ពួកគេធ្វើដំណើរ ទៅកាន់ទីឆ្ងាយ ដែលចំណុចនេះ បានរំខានយ៉ាងខ្លាំង ទៅលើភាពរីករាយ ក្នុងការធ្វើដំណើរកំសាន្ត និងអាចធ្វើឲ្យ មនុស្សចំនួន មិនចង់ទៅណាឆ្ងាយ ព្រោះតែពិបាកទ្រាំ នឹងអាការៈបែបនេះ។

អាការៈពុលឡាន ឬពុលរលក គឺកើតចេញមកពី ដំណើរមិនប្រក្រតី រវាងទិដ្ឋភាពដែល បានឃើញនឹងភ្នែក ជាមួយនិងអ្វីដែល បានស្តាប់ឮ នឹងត្រចៀក គឺវាធ្វើឲ្យមិនមាន តុល្យភាពនៃ ញានរបស់មនុស្ស និងបានធ្វើឲ្យ ខួរក្បាលមាន ការទទួលព័ត៌មាន មិនបានត្រឹមត្រូវ។ ម្យ៉ាងវិញទៀត រោគសញ្ញារបស់ អាការៈមួយនេះ មានដូចជា ធ្វើឲ្យមនុស្សមាន អារម្មណ៍ងងុយដេក ក្អួត បែកញើសពេញខ្លួន ឈឺក្បាល ងងឹតមុខ ជាដើម។

ដូច្នេះហើយ ទើបមានការ លើកឡើងពី វិធីងាយៗដើម្បី អាចជួយសម្រាល អាការៈទាំងនេះ របស់មនុស្ស នៅពេលដែល ពួកគេមានជំងឺពុលឡាន ឬពុលរលក ដោយសារតែ ការជិះរថយន្ត កប៉ាល់លើទឹក ឬក៏យន្តហោះ ជាដើមនោះ៖

១.អង្គុយឲ្យស្ងៀម

ឥរិយាបថរបស់អ្នក គឺអាចជួយកាត់បន្ថយ នូវអាការៈអាក្រក់ ទាំងលើនោះដូច្នេះ អ្នកគួរតែអង្គុយ ឲ្យស្ងៀម រួចបិទភ្នែករបស់អ្នក ឬអ្នកក៏អាច សម្លឹងមើលអ្វីផ្សេង ដូចជាទូរស័ព្ទដៃ សៀវភៅ ដើម្បីកុំឲ្យ ដំណើរការមិន ប្រក្រតីនៅក្នុងខួរក្បាល របស់អ្នក កាន់តែរីកឡើង ដែលជាហេតុ នាំឲ្យអ្នក កើតមាន អាការៈពុលឡាន។ លើសពីនេះទៀត ប្រសិនបើអ្នក ជិះនៅលើ រថយន្ត ឬក៏យន្តហោះ ចូររកកន្លែងអង្គុយ នៅក្បែរបង្អួច ដែលអាចមើល ទិដ្ឋភាពនៅខាងក្រៅបាន ព្រោះវាក៏អាច ជួយសម្រាលអាការៈ ពុលឡានបាន មួយកម្រិតផងដែរ។

២.ទឹកខ្ញី

ខ្ញីមានផ្ទុកសារជាតិ សំខាន់ៗក្នុងការ ជួយការពារចំពោះ ការរំលាយអាហារ, រារាំងការក្អួតចង្អោរ និងជួយសម្រាល ការឈឺចាប់ត្រង់ សន្លាក់សាច់ដុំជាដើម។ ដូច្នេះហើយ ទើបលោកវេជ្ជបណ្ឌិត Andrew Weil បានណែនាំឲ្យ ពិសាទឹកខ្ញីមួយកែវ ២០នាទីមុន នឹងចេញដំណើរ នោះក៏អាចជួយ សម្រាលអាការៈ ពុលឡាន បានផងដែរ។

៣.ស្រូបយកខ្យល់ អាកាសបរិសុទ្ធ

មនុស្សដែលមាន ជំងឺពុលឡាន គួរណាស់តែជៀសវាង នៅក្លិនឆួល ដូចជាក្លិនទឹកអប់ ក្លិនសាំង ឬក៏ក្លិនអាហារ ជាដើម។ ម្យ៉ាងវិញទៀត នៅពេលដែល ធ្វើដំណើរ អ្នកគួរតែ បើកកញ្ចក់បង្អួច រួចស្រូបយក ខ្យល់អាកាសឲ្យ បានច្រើនដើម្បី កំចាត់អាការៈ បែបនោះ។

៤.ការសម្រួល ចលនាជីពចរ នៅត្រង់កដៃ

វិធីនេះគឺជា វិធីដែលបាន រកឃើញជាយូរមកហើយ ហើយវាក៏អាចជួយ សម្រាលអាការៈ ពុលឡាន បានមួយកម្រិត ផងដែរដោយក្នុងនោះ អ្នកដែលពុលឡាន ត្រូវពាក់ក្រណាត់ចងកដៃ មួយហើយមាន ការសម្រួលជីពចរ នៅត្រង់កដៃ បានបន្តិចនោះ ក៏វាអាចជួយ គ្រប់គ្រងអាការៈក្អួត បានប្រសើរ ផងដែរ។

៥.អង្គុយលើក្រដាស ពណ៌ត្នោត

ថ្វីបើវិធីមួយនេះ មិនទាន់មាន ការបញ្ជាក់ច្បាស់លាស់ ពីក្រុមគ្រូពេទ្យ ថាតើវាពិតជា អាចទប់ស្កាត់ អាការៈពុលឡាន បានល្អយ៉ាងណាក៏ដោយ តែវាក៏ត្រូវបាន មនុស្សជាច្រើន ជឿជាក់ទៅលើ ប្រសិទ្ធភាព របស់ពួកវា ព្រោះថាការធ្វើបែបនេះ អាចឲ្យអារម្មណ៍ របស់មនុស្ស ធូរស្រាល ព្រមទាំង កាត់បន្ថយអាការៈ មិនស្រួលខ្លួន បានមួយកម្រិត។

៦.ទទួលទានថ្នាំពេទ្យ

ថ្នាំពេទ្យដែល អាចការពារ អាការៈពុលឡាន គឺអាចប្រើប្រាស់បាន ដោយមិនចាំបាច់មាន វេជ្ជបញ្ជា ហើយវាក៏មាន ប្រសិទ្ធិភាពល្អប្រសើរ ផងដែរ។ អ្នកគួរតែលេបថ្នាំ ការពារពុលឡាន ឲ្យបានចាប់ពី ចន្លោះពេល ៣០នាទី ដល់៦០នាទី មុននឹងអ្នក ចេញដំណើរ។

៧.ទ្រាំយកឈ្នះ អាការៈមួយនេះ

ជាទូទៅ អាការៈពុលឡាន គឺអាចធ្វើឲ្យ រាងកាយរបស់អ្នក ចាប់ផ្តើមវិវឌ្ឍ ទៅរកភាពស៊ាំ នៃល័ក្ខខ័ណ្ឌថ្មី ដូច្នេះហើយ អ្នកក៏អាច អត់ធន់ទ្រាំ នឹងអាការៈពិបាក ជាច្រើននោះ រួចក្រោយមក អ្នកក៏អាច យកឈ្នះជំងឺ មួយនេះនិង មិនមានអាការៈ ពិបាកក្នុងខ្លួន នោះនៅពេល អ្នកធ្វើដំណើរ តទៅទៀតឡើយ។

ទាំងនេះគឺជា វិធីងាយៗដើម្បី អាចជួយសម្រាល អាការៈពុលឡាន របស់មនុស្ស មួយចំនួន ដើម្បីអាច ជួយឲ្យការ ធ្វើដំណើរកំសាន្ត របស់ពួកគេ មានសភាពរីករាយ កាន់តែប្រសើរ ថែមទៀត៕

ប្រភព៖ ដេលីម៉េល

ដោយ៖ សុជាតិ

ខ្មែរឡូត