ស្វែងយល់ពីមូលហេតុ នាំឱ្យគេងបាត់ដង្ហើម

ស្វែងយល់ពីមូលហេតុ នាំឱ្យគេងបាត់ដង្ហើម

ការគេងបាត់ដង្ហើម គឺជំងឺដែលកើតមានជាញឹកញាប់ និងធ្ងន់ធ្ងរ ដែលនាំឱ្យអ្នកជំងឺ ឈប់ដកដង្ហើមម្តងហើយម្តង ក្នុងពេលគេងទៀតចាប់ពី ១០ វិនាទីឡើងទៅ។ ជំងឺនេះ នឹងធ្វើឱ្យចំនួនអុកស៊ីសែនក្នុងឈាមថយចុះ និងអាចធ្វើឱ្យអ្នកជំងឺ ភ្ញាក់ពីគេងនៅពេលយប់ទៀតផង។ ការគេងបាត់ដង្ហើម មានមូលហេតុខុសៗគ្នាច្រើនណាស់។
ចំពោះមនុស្សពេញវ័យ មូលហេតុដែលកើតមានជាញឹកញាប់បំផុតនោះគឺ ធាត់ជ្រុល ដែលរឿងនេះជាប់ពាក់ព័ន្ធនឹងជាលិកាទន់ៗនៅមាត់ និងបំពង់ក។ ពេលគេង ជាពេលវេលាមួយ ដែលសាច់ដុំបំពង់ក និងអណ្តាតកាន់តែធូរ ដូច្នេះ វាអាចនឹងធ្វើឱ្យផ្លូវដង្ហើមស្ទះបាន។ ប៉ុន្តែ មានកត្តាផ្សេងៗទៀត ក៏ជាប់ពាក់ព័ន្ធនឹងជំងឺនេះដែរ។
ចំពោះកូនក្មេងវិញ មូលហេតុនៃការគេងបាត់ដង្ហើមញឹកញាប់មានដូចជា ក្រពេញអាមីដាល ឬក្រពេញអាដេណូអ៊ីតរីកធំ និងមានបញ្ហាធ្មេញ។ មូលហេតុដែលមិនសូវកើតមាននោះ មានដូចជា ដុំសាច់ ឬការដុះអ្វីមួយ នៅក្នុងផ្លូវដង្ហើម និងខូចផ្លូវដង្ហើមពីកំណើតដូចជា ជំងឺមិនគ្រប់សតិ (Down Syndrome) និងជំងឺ Pierre-Robin Syndrome ដែលជាហេតុនាំឱ្យ រចនាសម្ព័ន្ធរាងកាយរីកធំៗដូចជា អណ្តាត និងថ្គាម។ ទោះបីក្មេងធាត់ជ្រុល ប្រហែលជាបណ្តាលឱ្យគេងស្ទះដង្ហើមដែរ ប៉ុន្តែ វាមិនទំនងជាកើតមានញឹកញាប់ ដូចមនុស្សធំឡើយ។
បើយើងមិនគិតអំពីអាយុទេនោះ ការមិនបានព្យាបាលអាការៈ គេងបាត់ដង្ហើម អាចនឹងបណ្តាលឱ្យមានផលវិបាកធ្ងន់ធ្ងរដូចជា ជំងឺបេះដូងសរសៃឈាម គ្រោះថ្នាក់ដោយចៃដន្យ និងស្លាប់មុនពេញវ័យ។ ដូច្នេះ យកល្អ មនុស្សគ្រប់គ្នាដែលមានរោគសញ្ញាគេងបាត់ដង្ហើម ជាពិសេស ការគេងស្រមុកលឺខ្លាំង និងឧស្សាហ៍ភ្ញាក់ពេលគេងយប់ឡើង និងងងុយគេងពេលថ្ងៃខ្លាំង គួរតែមានការវាយតម្លៃ ខាងវេជ្ជសាស្ត្រឱ្យបានសមរម្យទៅ។
លើសពីនេះទៅទៀត ក្រៅពីភាពធាត់ជ្រុល រចនាសម្ព័ន្ធរាងកាយមិនធម្មតា ដែលទាក់ទងនឹងដំណរពូជដូចជា បំពង់ករួមតូច សាច់កញ្ចឹងកក្រាស់ និងក្បាលមូល ក៏ជាប់ទាក់ទងនឹងការគេងបាត់ដង្ហើមដែរ។ កត្តាដែលនាំឱ្យមានជំងឺនេះដែរនោះ មានដូចជា ការកង្វះអ័រម៉ូនទីរ៉ូអ៊ីត ការលូតលាស់ខុសធម្មតា និងលូតលាស់ជ្រុល ដោយសារតែការផលិតអ័រម៉ូនលូតលាស់ច្រើនពេក និងបញ្ហាអាលែកស៊ី សុទ្ធតែបណ្តាលឱ្យស្ទះផ្លូវដង្ហើមខាងលើបានទាំងអស់។
ចំពោះមនុស្សធំ ការជក់បារី ផឹកស្រាច្រើន និងការប្រើថ្នាំងងុយគេង ច្រើនតែជាប់ពាក់ព័ន្ធនឹងការគេងបាត់ដង្ហើមទាំងអស់៕

ត្រួតពិនិត្យដោយ www.health.com.kh ថ្ងៃទី25 មេសា ឆ្នាំ2015

មុន បន្ទាប់

មតិយោបល់