ន័រវ៉េ៖ របាយការណ៍ ដ៏ថ្មីស្រឡាងមួយ របស់ក្រុមអ្នក វិទ្យាសាស្ត្រ ទើបនឹងបញ្ចេញ កាលពីពេលថ្មីៗនេះ បាននិយាយអំពី ផលអាក្រក់ ដែលបានមកពីការ សម្លឹងមើល កញ្ចក់អេក្រង់នៃ គ្រឿងអេឡិចត្រូនិច គ្រប់ប្រភេទ ដែលវាបាន ប៉ះពាល់សុខភាព របស់មនុស្ស យ៉ាងខ្លាំង ជាពិសេសគឺ យុវវ័យ ផ្ទាល់តែម្តង។

យោងតាមប្រភព របាយការណ៍ដែល ចេញដោយក្រុម អ្នកវិទ្យាសាស្ត្រ របស់ប្រទេស ន័រវ៉េ បានបង្ហាញឲ្យ ដឹងថា មនុស្ស ជាពិសេសគឺ យុវវ័យ ដែលសម្លឹងមើល កញ្ចក់អេក្រង់នៃ ឧបករណ៍ អេឡិចត្រូនិច ដូចជា ទូរទស្សន៍, កុំព្យូទ័រ, ទូរស័ព្ទស្មាតហ្វូន ឬ Tablet លើសពី៤ម៉ោង ក្នុងមួយថ្ងៃ នោះបានធ្វើឲ្យ ពួកគេប្រឈមមុខ នឹងការពិបាក គេង ព្រមទាំងទទួលបាន គុណប្រយោជន៍ ពីការគេង តិចបំផុត ហើយផលប៉ះពាល់ នេះរឹតតែអាក្រក់ ថែមទៀតប្រសិន ណាពួកគេ សម្លឹងឬប្រើប្រាស់ ឧបករណ៍ទាំងនេះ យ៉ាងយូរ មុនពេលពួកគេ ចូលគេង។

រូបភាពៈ ការសម្លឹងមើល ឧបករណ៍អេឡិចត្រូនិច ក្នុងរយៈពេលយូរ បានធ្វើឲ្យ ប៉ះពាល់សុខភាព យ៉ាងខ្លាំង

លើសពីនេះទៀត អ្នកវិទ្យាសាស្ត្រ ក៏បានបញ្ជាក់ បន្ថែមថា នៅពេលដែល មនុស្សប្រឹង សម្លឹងមើល កញ្ចក់អេក្រង់ នៃប្រភេទឧបករណ៍ ទាំងនោះ ក្នុងរយៈពេលយូរ (ចាប់ពី៤ ម៉ោងឡើងទៅ) ពួកគេនឹងត្រូវ ចំណាយពេល យ៉ាងតិច ៦០នាទី ដើម្បីប្រមូល អារម្មណ៍ក្នុងការ គេងលក់ ហើយអាច គេងលក់ ក្នុងរយៈពេល ខ្លីទៀត វាមានន័យថា ផលអាក្រក់នេះ គឺធ្វើឲ្យពួកគេ មិនងាយគេងលក់ ហើយដល់ពេល គេងលក់ គឺឆាប់ភ្ញាក់ ឡើងវិញ ដែលនេះជា ហេតុធ្វើឲ្យ សុខភាពដែល ធ្លាប់តែរឹងម៉ាំ ឆាប់ចុះខ្សោយ យ៉ាងរហ័ស។

Dr. Mari Hysing អ្នកជំនាញ ផ្នែកសុខភាព របស់ប្រទេស ន័រវ៉េ បាននិយាយថា "ក្រោយពីការ ស្រាវជ្រាវ និងសាកសួរ របស់ក្រុមពួកយើង ទៅលើយុវវ័យ ជាច្រើនពាន់នាក់ យើងបានរកឃើញថា ជាមធ្យម យុវវ័យ ត្រូវការគេង ចាប់ពី ៨ទៅ៩ម៉ោង ដើម្បីអាចឲ្យ គេមានអារម្មណ៍ ស្កប់ស្កល់បាន ផ្ទុយទៅវិញ ប្រសិនបើ ពួកគេសម្លឹង មើលកញ្ចក់អេក្រង់ យូរវានោះ រយៈពេលដែល អាចគេងលក់ បានត្រូវកាត់បន្ថយ មកសល់ត្រឹម ៥ទៅ៦ម៉ោង ប៉ុណ្ណោះ ហើយវាថែមទាំង ធ្វើឲ្យពួកគេ មានការពិបាក ក្នុងការគេង លក់ទៀតផង ដែលនេះជា ចំណុចសំខាន់ ក្នុងការធ្វើឲ្យ សុខភាពរបស់ ពួកគេចុះខ្សោយ។ ចំពោះមូលហេតុ ក៏ព្រោះតែ កម្រិតពន្លឺ ដែលបញ្ចេញដោយ ឧបករណ៍ទាំងនោះ វាបានទៅរំខាន អារម្មណ៍គេង របស់មនុស្ស"។

សរុបមកវិញ ការសម្លឹងមើល កញ្ចក់អេក្រង់ ឬក៏ប្រើប្រាស់ ឧបករណ៍អេឡិចត្រូនិច ក្នុងរយៈពេល យូរគឺបានធ្វើឲ្យ មានផលប៉ះពាល់ ដល់សុខភាព រាងកាយ និងស្មារតី របស់មនុស្ស យ៉ាងខ្លាំង ហើយវាក៏ជា កត្តាមួយដែល យុវវ័យទាំងអស់ គួរតែជៀសវាង ឬកាត់បន្ថយ ក្នុងការប្រើ ឧបករណ៍ទាំងនោះ យូរហួសហេតុ ខ្លាំងពេក៕

តើប្រិយមិត្តយល់ យ៉ាងណាដែរ?

រូបភាព៖ សម្លឹងមើល កញ្ចក់អេក្រង់ ទូរទស្សន៍យូរ ក៏ទទួលរង ផលប៉ះពាល់ អាក្រក់នេះដែរ

ប្រភព៖ ដេលីម៉េល

ដោយ៖ Xeno

ខ្មែរឡូត