ស្ត្រីពោះធំប្រើកុំព្យូទ័របានឬទេ?

ស្ត្រីពោះធំប្រើកុំព្យូទ័របានឬទេ?

លទ្ធផលនៃការសិក្សាថ្មីៗនេះគេបានរកឃើញថា ពន្លឺកាំរស្មីដែលជាគ្រោះថ្នាក់ចំពោះទារកក្នុងផ្ទៃ ឬធ្វើឲ្យរលូតកូននោះជារលកដែលធ្វើឲ្យកើតចំហាយវិទ្យុសកម្ម (Ionizing Radiation) មានជាអាទិ៍ រលកពីឧបករណ៍ថតកាំរស្មីអ៊ុក្ស និងឧបករណ៍ CT Scan។ ប៉ុន្តែពន្លឺដែលជះចេញពីអេក្រង់កុំព្យូទ័រ ឬ VDT (Visual Display Terminals) ជាពន្លឺម៉ៃក្រូរ៉េវ ដងស៊ីតេទាប ដែលជារលកមេដែកអគ្គិសនីប្រភេទមិនធ្វើឲ្យកើតចំហាយវិទ្យុសកម្ម (No nionizing Radiation) ទើបមិនបង្កគ្រោះថ្នាក់។

ប៉ុន្តែទោះបីជាយ៉ាងណាក៏ដោយ ការប្រើកុំព្យូទ័រមិនបានត្រឹមត្រូវ រួមទាំងឥរិយាបថអង្គុយមិនត្រឹមត្រូវ ក៏អាចធ្វើឲ្យអនាគតម្ដាយទាំងឡាយកើតអាការចុករួចដៃជើង ឬអស់កម្លាំងល្ហិតល្ហៃបានដែរ។

ឥរិយាបថអង្គុយដែលត្រឹមត្រូវ

អនាគតម្ដាយគ្រប់រូបគួរតែអង្គុយជ្រៅឲ្យពេញកៅអីខ្នងផ្អែកភ្នាក់កៅអី (ដើម្បីកុំឲ្យពោះមូលៗជាប់នឹងគែមតុ) អាចរកខ្នើយតូចៗទ្រាប់ខ្នងផ្នែកក្រោយដើម្បីការពារកុំឲ្យចុករួយ។ មិនគួរចំកោងខ្នង ឬអង្គុយគងអន្ទាក់ខ្លាឡើយ ក្នុងករណីរួយជើង អាចរកកំណល់មកកល់ជើងឲ្យខ្ពស់ បត់កែងដៃបន្ដិច ដាក់ដៃលើឃីបត ដោយឲ្យកដៃសណ្ដូកត្រង់ មិនលើក ឬកាច់-កដៃចុះ។

ម្ដាយគ្រប់រូបក៏មិនត្រូវធ្វើកិច្ចការងារនៅមុខកុំព្យូទ័រជាប់ៗគ្នាយូរពេកដែរ ពីព្រោះការអង្គុយក្នុងឥរិយាបថដដែលៗ វានឹងធ្វើឲ្យដំណើរឈាមរត់មិនស្រួល ជាហេតុនាំឲ្យចុករួយសាច់ដុំ ឬរួយស្មា ខ្នងនិងចង្កេះ។

គួរតែឈប់សម្រាកដោយអន្លើៗពោលគឺត្រូវក្រោកឡើងប្ដូរឥរិយាបថប្រមាណជា១០ នាទីរៀងរាល់មួយម៉ោងម្ដង និងរលាស់ដៃជើងតិចៗ និងសន្ធឹងជើងចេញ បំបះចុងជើងឡើងចុះៗ ឬបង្វិល-កជើងជារង្វង់ រួមទាំងសន្ធឹងដៃធ្វើលំហាត់ផ្នែកស្មា និងកដៃផង។

ថែទាំសុខភាពភ្នែកផង

ការប្រែប្រួលនៃអ័រម៉ូនក្នុងអំឡុងពេលពពោះ ធ្វើឲ្យក្រពេញទឹកភ្នែកធ្វើការបានតិច ទើបបង្កឲ្យកែវភ្នែករបស់អនាគតម្ដាយទាំងឡាយស្ងួត និងងាយផ្សាក្រហាយ។ ការប្រើកុំព្យូទ័រ និងការធ្វើការក្នុងបន្ទប់ម៉ាស៊ីនត្រជាក់កាន់តែធ្វើឲ្យភ្នែកស្ងួតខ្លាំងឡើង។ ដូច្នេះប្រសិនបើអ្នកពាក់ខន់ថេកលេន គួរតែដោះវាចេញឲ្យលឿន (ដូចជាដល់ផ្ទះភ្លាមដោះចេញភ្លាម) ឬប្ដូរមកពាក់វ៉ែនតាជំនួសវិញ កាលណាត្រូវធ្វើកិច្ចការដោយប្រើកុំព្យូទ័រ។

វិធីធ្វើការមុខអេក្រង់បែបសប្បាយផ្ទៃពោះ
១- តម្រូវកម្ពស់កៅអី និងអេក្រង់ឲ្យសមល្មមអេក្រង់កុំព្យូទ័រគួរតែនៅត្រឹមក្រសែភ្នែក មិនត្រូវឱន ឬងើយមុខយូរៗឡើយ។
២- រៀបចំឃីបត ម៉ៅស៍ និងឯកសារដែលត្រូវវាយបញ្ចូលក្នុងកុំព្យូទ័រឲ្យស្ថិតនៅកន្លែងដែលល្មម ដើម្បីកុំឲ្យយើងប្រើភ្នែកសម្លឹងមើល ឬរំកិលខ្លួនទើសទែងទៅមក៕
By domneng

មុន បន្ទាប់

មតិយោបល់