បច្ចេកទេសទាយឆុត ដឹងសង្សារនិយាយកុហក

បច្ចេកទេសទាយឆុត ដឹងសង្សារនិយាយកុហក

មនុស្សស្រលាញ់គ្នា ភក្ដីភាពគឺសំខាន់ណាស់។ គេមិនចង់ឃើញសង្សារខ្លួនមានការលាក់បាំងអ្វីឡើយ។ តែបើថ្ងៃណាមួយ មនុស្សជាទីស្រលាញ់របស់អ្នកហាក់ដូចជាមានអាថ៌កំបាំងអ្វីមួយចំពោះអ្នក តើអ្នកមានបច្ចេកទេសបែបណា ដើម្បីចាប់ចំណុចនិយាយកុហករបស់គេបាន?

បើមិនទាន់ដឹងទេ សាកមើលបច្ចេកទេសរបស់យុវវ័យខាងក្រោមនេះបន្តិចទៅ៖

Love 1

Love

រូបតំណាង

យុវជន ប៉ុន បញ្ញា និស្សិតសកលវិទ្យាល័យកម្ពុជា ជំនាញអក្សរសាស្ត្រអង់គ្លេស បានប្រាប់ថា៖ “ដំបូងតាមដានគេសិន។ បន្ទាប់មកស្ដាប់ពាក្យគេនិយាយ។ បើគេនិយាយដូចជាភ័យៗ ហើយសំឡេងគេខុសពីធម្មតា យើងអាចដឹងបានថា គេមានរឿងលាក់បាំងជាមួយយើងហើយ”។

ស្រដៀងគ្នានេះដែរ កញ្ញា ណេង សំណាង អាយុ២៥ឆ្នាំ អាជីវករលក់ដូរ បានប្រាប់ថា៖ “មើលអាកប្បកិរិយារបស់គេ ប្រាកដជាដឹងមិនខានឡើយ។ បើយើងសួរនាំគេ បើឃើញគេភ័យញ័រខុសប្លែកពីធម្មតា យើងអាចសន្និដ្ឋានបានថា គេកុហកយើងមិនខាន”។

មិនខុសគ្នាប៉ុន្មាន យុវជន ណរ ចិត្រា និស្សិតវិទ្យាស្ថានបច្ចេកទេស ជំនាញវិស្វកម្មអគ្គិសនី ឆ្នាំទីមួយ បានប្រាប់ពីបច្ចេកទេសដើម្បីដឹងសង្សារនិយាយកុហកថា៖ “សាកជជីកសួរចុះឡើងៗ រួចតាមដានសកម្មភាពថាតើគេហាក់ដូចជាខុសប្លែកពីមុនដែរទេ។ មនុស្សនិយាយកុហក សកម្មភាពនឹងស្ដែងឲ្យឃើញពីការនិយាយកុហកនោះ”។

ចំណែកឯ លោក សុវណ្ណ ថាន អាយុ២៥ឆ្នាំ បុគ្គលិកបម្រើការងារនៅសណ្ឋាគារSofitel បង្ហើបឲ្យដឹងថា សម្រាប់លោក ការដឹងថា អ្នកណានិយាយកុហក គឺជាការងាយស្រួលណាស់ ដោយគ្រាន់តែសង្កេតលើសកម្មភាពបីយ៉ាង អត្តចរិត អាកប្បកិរិយា និងពាក្យសំដី ក៏អាចដឹងបាត់ទៅហើយ។

ថាន និយាយបន្តថា៖ “បើឃើញគេហាក់ដូចជាមានភាពភ័យខ្លាច គេនិយាយមិនច្បាស់លាស់ ភ្លេចមុខភ្លេចក្រោយទៀត សកម្មភាពបែបហ្នឹងធ្វើឱ្យយើងអាចទាញបានថា គេកុហកយើងហើយ។ យើងមើលពេលគេនិយាយ គួបផ្សំនឹងអាកប្បកិរិយារបស់គេដែរ។ វាមានភាពងាយស្រួលក្នុងការមើលមនុស្សបែបនេះ យើងគ្រាន់តែបង្កើតសំណួរបន្លំថា ម្សិលមិញគេនៅកន្លែងនេះ កន្លែងនោះ ហើយចាំស្ដាប់ពាក្យគេដោះសាទៅ ដឹងហើយ”។

ចុះបច្ចេកទេសដឹងសង្សារនិយាយកុហករបស់ប្រិយមិត្តវិញ យ៉ាងណាដែរ?

មុន បន្ទាប់

មតិយោបល់