ចង់បានសង្សារមួយមកថ្នាក់ថ្នម ត្រូវត្រៀមខ្លួនយ៉ាងម៉េចខ្លះ?

ចង់បានសង្សារមួយមកថ្នាក់ថ្នម ត្រូវត្រៀមខ្លួនយ៉ាងម៉េចខ្លះ?

និយាយដល់រឿងសង្សារអ្នកណាថា មិនចង់បាននោះ! តែបញ្ហានៅត្រង់ថា មិត្តយុវវ័យត្រូវចេះរៀបចំខ្លួនយ៉ាងម៉េចខ្លះ មុននឹងចង់បានសង្សារសមតាមបំណង។ សម័យនេះមិនមែនដូចសម័យមុនទេ ចង់បានសង្សារ ដាច់ខាតត្រូវតែមានអ្វីដែលពិសេសៗលេចធ្លោសិន ទើបឆាប់ទទួលបានជោគជ័យក្នុងរឿងស្នេហា។ តើយុវវ័យត្រូវត្រៀមខ្លួនយ៉ាងម៉េចខ្លះ ទើបឆាប់មានមនុស្សស្រីចាប់អារម្មណ៍?

ដោយសារតែសម័យនេះសម្ភារៈទំនើប បានក្លាយទៅជាការពេញនិយមស្រាប់យុវវ័យ ហេតុដូចនេះហើយច្បាស់ណាស់ ទំនោរចំពោះរបស់របរស៊ីវិល័យ បានដក់ជាប់នៅក្នុងអារម្មណ៍យុវវ័យបច្ចុប្បន្ន ប្រកែកមិនបានឡើយ។

មានទស្សនៈបែបនេះហើយទើប យុវជន ផាន់ ដារា អាយុ២០ឆ្នាំ និស្សិតជំនាញអក្សរសាស្ត្រអង់គ្លេសនៃសាកលវិទ្យាល័យន័រតុន បានលើកឡើងថា៖ “មានអីទៀតសម័យនេះទៅហើយ បុរសដែលចេះតុបតែងខ្លួនឲ្យទាន់សម័យបន្តិចមក គួបផ្សំជាមួយនូវសម្ភារៈកាលីបៗខាងក្រៅទៀត បានប៉ុណ្ណឹងមក ខ្ញុំជឿថា ទោះបីជាយើងមិនសូវសង្ហារក៏មិនអីដែរ”។

យុវជនដដែលរូបនេះបន្ដ៖ ទូរសព្ទ ម៉ូតូទំនើបជាដើម ទាំងនេះសុទ្ធតែជាមុខសញ្ញាដែលស្រីៗ ចូលចិត្តហើយ។ និយាយអញ្ចឹងមិនមែនមានន័យថា ធ្វើបែបនេះយើងជាមនុស្សសម្ភារៈនិយមទេ តែបើសិនជាគ្មានសម្ភារៈណាមួយជាប់ខ្លួនសោះ កុំថា ឡើយចង់បានភាពទាក់ទាញពីនារីៗ សូម្បីតែទៅណាមកណា ឬចូលរួមក្នុងកម្មវិធីផ្សេងៗជាមួយគេក៏ពិបាកដែរ។ បើមិនមានម៉ូតូទំនើប យ៉ាងហោចណាស់ក៏ត្រូវមានស្មាតហ្វូនមួយឲ្យចុះចំណោមនឹងគេដែរ។

រូបតំណាង

ពិតណាស់ទៅហើយ ដែលសម្ភារៈនិយម គឺជា ប្រធានបទក្ដៅគគុក ដែលបុរសៗគួរចាប់យកមករៀបចំខ្លួនដំបូងបំផុត ប្រសិនបើគិតចង់ស្វែងរកដៃគូ។ តែគន្លឹះមួយទៀត ដែលមិនត្រូវមើលរំលងនោះ គឺបុរសដែលពូកែបង្ហាញមនោសញ្ចេតនាបែបរ៉ូមែនទិក។

ជាពិសេសបុរសដែលបញ្ចេញការយកចិត្តទុកដាក់ខ្ពស់ ដូចជាឧស្សាហ៍ផ្ញើសារ និងទូរសព្ទសួរសុខទុក្ខ ជារៀងរាល់ថ្ងៃ សកម្មភាពទាំងអស់នេះហើយអាចទាក់ទាញចិត្តស្រីៗ ក្រៅពីសម្ភារទំនើប។ នេះជាការលើកឡើងរបស់យុវជន ស៊ុំ ចន្នី អាយុ២៣ឆ្នាំ និស្សិតឆ្នាំទី៤ ជំនាញទីផ្សារនៃសាកលវិទ្យាល័យជាតិគ្រប់គ្រង។

តើក្រៅពីសម្ភារៈទំនើប ស្រីៗមានសម្លឹងអ្វីផ្សេងទៀតអត់ណ្ន៎? ប្រាកដជាមានហើយ មិនមែនស្រីៗទាំងអស់សុទ្ធតែមានចំណង់ចំណូលចិត្ត និងឲ្យតម្លៃទៅលើសម្ភារៈនិយមទេ។

គាំទ្រនូវការលើកឡើងខាងលើ យុវជន ប៉ូ រដ្ឋា អាយុ២២ឆ្នាំ ជានិស្សិតច្បាប់ ឆ្នាំទី៣ នៃសាកលវិទ្យាល័យពុទ្ធិសាស្ត្រ យល់ឃើញថា៖ “ខ្ញុំយល់ថា អត្តចរិតទៅវិញទេ ដែលជាចំណុចពិសេសសម្រាប់បុរសៗ”។ គួរតែរៀបចំខ្លួនឲ្យបានល្អមុននឹងចង់ឲ្យស្រីៗ ចាប់អារម្មណ៍ បុរសពិតរឹងមាំ មិនម្ញ៉ិកម្ញ៉ក់ទន់ជ្រាយ មិនអួតក្អេងក្អាង ស្មោះត្រង់ នេះទើបជាអ្វីដែលស្រីៗចង់បានពិត។

ទោះបីជាសម័យឥលូវស្រីៗមួយចំនួននិយមចូលចិត្ត និងឲ្យតម្លៃទៅលើភាពស៊ីវិល័យ សម្ភារៈនិយមយ៉ាងណាក៏ដោយ តែសម្រាប់យុវជន សេង រស្មី អាយុ២៤ឆ្នាំ ជាគ្រូបង្រៀនភាសាអង់គ្លេសនៃសាលាឯកជនមួយនៅម្តុំទូលទំពូង បានប្រាប់ឲ្យដឹងផ្សេងពីនេះថា៖ បើសិនជាគាត់ជានារីដែលស្រលាញ់យើងពិតប្រាកដមែននោះ សម្ភារៈទំនើបៗ ទូរសព្ទ ម៉ូតូ ឡានទំនើបជាដើម មិនមែនជាអ្វីដែលនាងសម្លឹងមើលមុនគេនោះទេ។

“ខ្ញុំថាមនុស្សប្រុសដែលមានចំណេះដឹងខ្ពស់ ខាងការងារ ឬក៏ពូកែខាងរកស៊ីទៅវិញទេ ដែលជាសេចក្ដីប្រាថ្នារបស់នាងពិតប្រាកដនោះ”។ រស្មី ថ្លែងយ៉ាងដូច្នេះ៕

ចំណែកមិត្តយុវវ័យវិញ យល់ស្របដូចការលើកឡើងខាងលើនេះដែរទេ?

ប្រភព៖ sabay

មុន បន្ទាប់

មតិយោបល់