អាហារ សម្រាប់អ្នកមានបញ្ហា “បាក់ទឹកចិត្ត”

អាហារ សម្រាប់អ្នកមានបញ្ហា “បាក់ទឹកចិត្ត”

នេះមិនមែនមានន័យថា វាអាចព្យាបាលរោគបាក់ទឹកចិត្តអោយជាដាច់នោះទេ។ នៅពេលមនុស្សយើងបាក់ទឹកចិត្ត ពួកគេច្រើនតែចង់ញ៉ាំអាហារដែលផ្តល់នូវផាសុខភាពដូចជា ស្ករគ្រាប់ នំស្រួយ ការ៉េម និងសូកូឡា។ អ្នកឯកទេសខាងអាហារូបត្ថម្ភបាននិយាយថា “នេះគឺមិនត្រឹមត្រូវទេ ព្រោះការញ៉ាំអាហារទាំងអស់នេះ អាចធ្វើអោយរោគសញ្ញាកាន់តែធ្ងន់ធ្ងរទៅវិញទេ”។ ប៉ុន្តែ យើងនៅតែមានអាហារមួយចំនួន ដែលអាចជួយអោយអ្នកមានអារម្មណ៍ល្អចំពោះសុខភាពអ្នកដូចជា ៖

ស៊ុតចៀន
ផ្នែកពណ៌លឿងរបស់ស៊ុតសម្បូរទៅដោយវីតាមីន B និងជាប្រភពដ៏ល្អនៃជាតិប្រូតេអ៊ីន។ វីតាមីន B ជួយអោយខួរក្បាលបំពេញមុខងារកាន់តែល្អ។ ត្រី សាច់បក្សី គ្រាប់ធញ្ញជាតិ និងសាច់គោក៏ជាជម្រើសដ៏ល្អដូចគ្នាដែរ។

គ្រាប់ផ្លែឈើ
អាហារទាំងនេះជាប្រភពដ៏អស្ចារ្យមួយនៃជាតិម៉ាញ៉េស្យូម សម្រាប់ជួយអោយរាងកាយផលិតសារធាតុ Serotonin ដើម្បីជួយអោយមនុស្សមានអារម្មណ៍ល្អ។ ចូរទំពារគ្រាប់ល្ពៅ គ្រាប់ផ្កាឈូករ័ត្ន គ្រាប់ផ្លែអាល់ម៉ុង និងសណ្តែកដី ដើម្បីទទួលបានប្រយោជន៍របស់វា។

ត្រីទឹកត្រជាក់
ត្រីប្រភេទនេះជាប្រភពដ៏អស្ចារ្យមួយនៃអូមេហ្គាបី ដែលផ្ទុកទៅដោយអាស៊ីតខ្លាញ់ DHA សម្រាប់ជំនួយដល់ខួរក្បាល។ ត្រីដ៏ល្អទាំងនេះមានដូចជា ត្រីសាលម៉ុង ត្រីធូណា និងត្រីសាឌីនជាដើម។

គ្រាប់ធញ្ញជាតិ
អាហារប្រភេទនេះ គឺជាប្រភេទកាបូអ៊ីដ្រាតកំផ្លេច ដែលវាត្រូវការពេលវេលាយូរក្នុងការរំលាយ ដើម្បីជួយអោយជាតិស្ករក្នុងឈាម និងអារម្មណ៍មនុស្សមានលំនឹង។ អាហារនេះពោរពេញទៅដោយជាតិសរសៃដែលជួយអោយអ្នកឆ្អែតបានយូរ។

តែបៃតង
តែបៃតង គឺជាភេសជ្ជៈ មិនមែនអាហារទេ។ អ្វីដែលល្អចំពោះភេសជ្ជៈមួយនេះ គឺវាសម្បូរទៅដោយអាស៊ីតអាមីណេ L-theanine ដែលអាចជួយពង្រឹងដល់ការផ្តោតអារម្មណ៍។

ការយល់ដឹងនូវអ្វីដែលត្រូវញ៉ាំសម្រាប់រាងកាយ អាចមានឥទ្ធិពលរយៈពេលយូរបាន ហើយវាពិតជាអាចជួយដោះស្រាយនូវអារម្មណ៍ដែលអស់សង្ឈឹម និងមានថាមពលសម្រាប់ប្រឆាំងនឹងជំងឺដែលកំពុងតែបៀតបៀនមកលើអ្នកបាន៕

ប្រភព៖ health.com.kh

មុន បន្ទាប់

មតិយោបល់