វិធីថែរក្សាសុខភាពភ្នែកសម្រាប់អ្នកប្រើកុំព្យូទ័រ

វិធីថែរក្សាសុខភាពភ្នែកសម្រាប់អ្នកប្រើកុំព្យូទ័រ

ការសិក្សាស្រាវជ្រាវ បានបង្ហាញថា ភ្នែកអាចនឹងស្រវាំងដោយសារតែ ការចំណាយពេលច្រើនខ្លាំង ក្នុងការអង្គុយនៅពីមុខកញ្ចក់អេក្រង់កុំព្យូទ័រ និង ទូរទស្សន៍យូរ ។ស្ថិតនៅក្នុងស្ថានភាពបែបនេះ ការថែរក្សាភ្នែក គឺពិតជាចាំបាច់បំផុត ហើយវានឹង អាចធ្វើ ទៅបានយ៉ាងងាយ ដោយអ្នកគ្រាន់តែ ធ្វើការផ្លាស់ប្តូរនូវទម្លាប់តូចតាច មួយចំនួន និង ធ្វើតាមនូវ វិធី ថែរក្សាភ្នែកដ៏មានប្រសិទ្ធភាពមួយចំនួន ខាងក្រោមនេះ ៖

១. ស្ថានភាពទីតាំងនៃ កញ្ចក់អេក្រង់កុំព្យូរទ័រ សម្រាប់ការថែរក្សាភ្នែករបស់អ្នក

ចំងាយនៃ ប្រវែងដៃ រវាងភ្នែក និង កញ្ចក់អេក្រង់ គួរតែត្រូវបានរក្សាគន្លាតអោយបានល្អ ដើម្បីរក្សា នូវ កម្រិតនៃការមើលឃើញរបស់អ្នក អោយបានច្បាស់ល្អ និង មិនជះឥទ្ធិពលអាក្រក់ដល់សុខភាពភ្នែក ទាំងគូរបស់អ្នក។ កញ្ចក់កុំព្យូទ័រនោះ គួរស្ថិតក្នុងចម្ងាយ ២០ដឺក្រេ នៅខាងក្រោមនៃ កម្រិតរបស់ភ្នែក ហើយ ការដាក់ អេក្រង់ និង ប្រដាប់វាយអក្សរ ( keyboard) អោយបានត្រឹមត្រូវ ក៏មានអត្ថប្រយោជន៍ចំពោះ សុខភាពភ្នែកផងដែរ។

២. កំណត់ពីពន្លឺនៅក្នុងបន្ទប់

ពន្លឺនៅក្នុងបន្ទប់គួរតែ មានកម្រិតភ្លឺល្មម និងមិនបាញ់ចំ ប្រសិនបើអ្នកចង់អនុវត្តតាម គន្លឹះក្នុងការថែរក្សា ភ្នែក។ ចំណាំងផ្លាត គួរតែ សម្គាល់បានពីចម្ងាយ ពីកញ្ចក់អេក្រង់របស់អ្នក និង ភាពភ្លឺចាំង, ពណ៌ និង ពន្លឺកុង គួរតែអាចសម្របបានយ៉ាងល្អ។

៣. ស្វែងរកកញ្ចក់វ៉ែនតាដ៏ល្អសម្រាប់ការពារភ្នែក

ផ្នែកដ៏សំខាន់ មួយផ្សេងទៀត នៃការថែរក្សាសុខភាពភ្នែករបស់អ្នក នោះគឺ អ្នកត្រូវចេះ ជ្រើសរើស ពាក់ ប្រភេទកញ្ចក់វ៉ែនតា អោយបានត្រឹមត្រូវ ប្រសិនបើអ្នកមានបញ្ហា ជាមួយនឹងការមើលឃើញ។ ការ ស្វែងរក កញ្ចក់កែវដាក់ភ្នែក ( contact lenses) អោយបានត្រឹមត្រូវ គឺរឿងដ៏ពិបាកមួយ។ អ្នកត្រូវ ធ្វើការ ស្រាវជ្រាវ អោយបានត្រឹមត្រូវ និង ជ្រើសរើសកញ្ចក់ដែលសាកសមបំផុត សម្រាប់ការថែទាំដ៏ល្អ ចំពោះកែវភ្នែកដ៏ស្រស់ស្អាត របស់អ្នកទាំងគូរនេះ ។

៤. ត្រូវទុកពេលវេលាអោយភ្នែកបានសម្រាក

ការផ្តល់ពេលវេលា គ្រប់គ្រាន់អោយភ្នែករបស់អ្នកបានសម្រាក គឺជាផ្នែកដ៏សំខាន់មួយ ចំពោះការថែរក្សា ភ្នែក។ អ្វីដែលអ្នកមិនត្រូវធ្វើនោះគឺ អ្នកមិនត្រូវ ប្រើដៃរបស់អ្នក មកជូត ឬ ញីភ្នែក រហូតដល់អ្នកមាន អារម្មណ៍ថា ក្តៅក្រហាយនោះទេ។ ផ្ទុយមកវិញ អ្នកត្រូវយក បាតដៃស្អាត ដាក់នៅលើពីភ្នែក នោះកម្តៅ ភាយៗ និង ធ្វើអោយភ្នែករបស់អ្នក បានសម្រាក។ ការធ្វើបែបនេះ ឡើងវិញអោយបានទៀងទាត់ គឺនឹង មិនត្រឹមជួយ អោយកែវភ្នែក ដែលហត់នឿយរបស់អ្នក បានសម្រាកនោះទេ ប៉ុន្តែវា ក៏អាចជួយបន្ថយ ឥទ្ធិពល នៃពន្លឺដែលជះចេញពីកញ្ចក់អេក្រង់ចំពោះ កែវភ្នែកអ្នកដែរ ។

៥. ធ្វើការព្រិចភ្នែក ដើម្បីសុខភាពរបស់ភ្នែក

សម្រាប់មនុស្សម្នាក់ ដែលស្ថិត ក្នុងស្ថានភាពធម្មតាមួយ តែងធ្វើការព្រិចភ្នែក ប្រហែលជា ១២ដង ក្នុងរយៈពេល ១នាទី ជាមធ្យម ប៉ុន្តែ នៅពេលដែលអ្នក ត្រូវធ្វើការងារ ជាមួយនឹងកុំព្យូរទ័រ នោះអ្នក នឹង ធ្វើការព្រិចភ្នែក បានត្រឹមតែ ៥ដងប៉ុណ្ណោះ ។ បញ្ហានេះនឹងអាច បង្កបញ្ហាដែលអាច នឹងធ្វើអោយ កែវភ្នែក ប្រែជាស្ងួត។ ការបន្តក់ថ្នាំភ្នែក ដើម្បីផ្តល់សំណើម គឺជាវិធីមានប្រសិទ្ធភាពមួយ ក្នុងការ កាត់បន្ថយ ភាពស្ងួតនៃកែវភ្នែក ។

៦. ធ្វើការបាចទឹកនៅលើពីមុខ និង កែវភ្នែករបស់អ្នក

ការបង្កើតនូវ ទម្លាប់នៃការលុបមុខ ឬ បាចទឹកនៅពីលើមុខ យ៉ាងហោចណាស់ ២ដង ក្នុងមួយថ្ងៃ ដើម្បីថែរក្សាសុខភាពរបស់កែវភ្នែក ។ វិធីនេះ មិនត្រឹមធ្វើអោយអ្នកមានភាពស្រស់ថ្លាប៉ុណ្ណោះទេ ប៉ុន្តែវា ក៏ជួយ ធ្វើអោយកែវភ្នែករបស់អ្នកត្រជាក់ល្អ និង បានទទួលនូវការសម្រាកផងដែរ ។

៧. ប្រសិទ្ធភាពនៃការដាក់កញ្ចប់កាកតែ នៅលើពីលើភ្នែក

ប្រសិនបើអ្នករងគ្រោះពី បញ្ហានៃការប៉ោងត្របកភ្នែក នោះការដាក់ស្អំ កញ្ចប់កាកតែនៅពីលើភ្នែក នឹងមានអត្ថប្រយោជន៍ចំពោះអ្នក។ នេះគឺជា វិធីដ៏មានប្រសិទ្ធភាព ក្នុងការថែរក្សាភ្នែក ។ វាគឺជាគន្លឹះ ដ៏មានប្រសិទ្ធភាពមួយ។ អ្នកត្រូវដាក់កញ្ចប់កាកតែ នោះក្នុងទូទឹកកក អោយបានមួយយប់ ហើយបន្ទាប់ មកយកវា មកដាក់នៅពីលើ ភ្នែករបស់អ្នក។ នោះអ្នកនឹង បានឃើញនូវប្រសិទ្ធភាព ដ៏អស្ចារ្យរបស់វា ជាក់ជាមិនខាន ។

៨. បរិភោគអាហារដែលផ្តល់ផលល្អចំពោះសុខភាពភ្នែក

ការញុំាំអាហារ ដែលមានវីតាមីន A ,C និង E អោយបានជាប្រចាំ ត្រូវបានគេអះអាងថា វាមានអត្ថប្រយោជន៍ ជាពិសេសក្នុងការថែទាំភ្នែក ទាំងពីរ របស់អ្នក។ ត្រូវបញ្ចូលនូវប្រភេទអាហារ បន្លែពណ៌បៃតង, ផ្លែឈើដែលមានរសជាតិជូរ និង ផលិតផលដែលធ្វើពីទឹកដោះគោ ទៅជាផ្នែកមួយ នៅក្នុងរបបអាហារជាប្រចាំថ្ងៃរបស់អ្នក។

ការអនុវត្ត គន្លឹះក្នុងការថែរក្សាភ្នែកខាងលើនេះ នឹងធ្វើអោយកែវភ្នែកទាំងគូរ របស់អ្នកស្រស់ថ្លា និង មានសុខភាពជាក់ជាមិនខាន ៕

ប្រភព៖ Health.com.kh

មុន បន្ទាប់

មតិយោបល់