ទឹកដោះគោ មានប្រយោជន៍ដល់សុខភាព ៦ យ៉ាង

ទឹកដោះគោ មានប្រយោជន៍ដល់សុខភាព ៦ យ៉ាង

ទឹកដោះគោ គឺជាផ្នែកមួយយ៉ាងសំខាន់នៃរបបអាហាររបស់យើង។ យើងចាប់ផ្តើមផឹកទឹកដោះគោតាំងពីយើងនៅក្មេងម្ល៉េះ ប៉ុន្តែ របបអាហារនេះបែរជាថយចុះទៅវិញ នៅពេលដែលយើងធំឡើង។ មនុស្សមួយចំនួន មានការអៀនខ្មាស់អំពីរឿងនេះដោយសារតែពួកគេខ្លាចថា វានឹងបន្ថែមជាតិខ្លាញ់កាន់តែច្រើនក្នុងរបបអាហារពួកគេ។ អ្នកខ្លះទៀតបែរជាអោយហេតុផលថា ពួកគេលែងត្រូវការផឹកទឹកដោះគោទៀតហើយ។ ការទទួលទានទឹកដោះគោ មិនដែលប្រកាន់ថាមនុស្សក្មេងទើបញ៉ាំ ហើយមនុស្សចាស់ ហាមញ៉ាំនោះទេ ព្រោះវាគឺជាប្រភពដ៏អស្ចារ្យមួយនៃវីតាមីន និងជីវជាតិជាច្រើន ព្រមទាំងមានប្រយោជន៍ចំពោះសុខភាពទៀតផង។

ការលូតលាស់ស្បែក
ម្ចាស់ក្សត្រីនៃប្រទេសអេហ្ស៊ីបពីសម័យបុរាណ ក្លេអូប៉ាត្រា (Cleopatra) បានប្រើទឹកដោះគោលាងសម្អាតខ្លួន ដើម្បីថែរក្សាស្បែកអោយនៅទន់ រលោង និងលូតលាស់ល្អ។ អ្នកក៏អាចធ្វើដូចគ្នាបានដែរ ឬអ្នកអាចផឹកទឹកដោះគោពីរបីកែវជារៀងរាល់ថ្ងៃ ដើម្បីទទួលបានអត្ថប្រយោជន៍របស់វា។ ទឹកដោះគោមានជីវជាតិជាច្រើនក្នុងការជួយថែរក្សាស្បែកអោយមើលទៅល្អបំផុត។ វាមានជាតិឡាក់ទិចអាស៊ីត ដែលអាចដើរតួរជា Exfoliant និងអង់ស៊ីម ដើម្បីជួយថែរក្សាស្បែកអោយនៅរលោង។ សារធាតុអាមីណូអាស៊ីតក្នុងទឹកដោះគោក៏ជួយថែរក្សាស្បែកអោយមានសំណើមផងដែរ។ ទឹកដោះគោមានសារធាតុអង់ទីអុកស៊ីដង់សម្រាប់ជួយការពារការខូចខាតដោយសារតែជាតិពុលពីបរិដ្ឋានជុំវិញខ្លួន។ ទោះបីជាយ៉ាងណាក៏ដោយ បើសិនជាអ្នកអាលែកស៊ីនឹងទឹកដោះគោ ឬផលិតផលធ្វើពីទឹកដោះគោ វាពិតជាធ្វើអោយស្បែកមានបញ្ហាកាន់តែខ្លាំងទៀត។

ធ្មេញ និងឆ្អឹងមានសុខភាពល្អ
ទឹកដោះគោ គឺជាប្រភពនៃជាតិកាល់ស្យូមដ៏អស្ចារ្យមួយ ដែលមានសារៈសំខាន់ក្នុងការជួយថែរក្សាឆ្អឹងអោយមានសុខភាពល្អ។ មិនមែនមានតែកូនតូចៗរបស់អ្នកត្រូវការញ៉ាំទឹកដោះ ដើម្បីឆ្អឹងលូតលាស់នោះទេ ប៉ុន្តែ មនុស្សធំក៏ត្រូវការទឹកដោះគោដើម្បីឆ្អឹងរឹងមាំ និងការពារខ្លួនពីជំងឺពុកឆ្អឹងដែរ។ ទឹកដោះគោក៏ជាប្រភពដ៏អស្ចារ្យសម្រាប់ធ្មេញដ៏រឹងមាំ និងជួយការពារពីជំងឺពុកឆ្អឹងទៀតផង។ ដើម្បីអាចបឺតស្រូបជាតិកាល់ស្យូមបាន រាងកាយត្រូវតែមានវីតាមីន D។ បើសិនជារាងកាយអ្នកខ្វះវីតាមីន D ចូរទិញទឹកដោះគោណាដែលមានបន្ថែមវីតាមីន D ស្រាប់។

សាច់ដុំ
ទឹកដោះគោផ្ទុកទៅដោយជាតិប្រូតេអ៊ីន ដើម្បីជួយសាងសង់សាច់ដុំឡើងវិញ។ ចូរផឹកទឹកដោះគោមួយកែវក្រោយពីហាត់ប្រាណរួច ដើម្បីអោយរាងកាយវិលមករកសភាពដើមវិញ។

សម្រកទម្ងន់
ការសិក្សាជាច្រើនបានអោយដឹងថា ស្ត្រីដែលផឹកទឹកដោះគោមានជាតិខ្លាញ់ទាប ឬទឹកដោះគោស្រស់ អាចស្រកទម្ងន់បានច្រើនជាងស្ត្រីដែលមិនផឹកទឹកដោះគោ។ វាគឺជារបបអាហារដ៏អស្ចារ្យ ព្រមទាំងជាអាហារសម្រន់ប្រកបដោយសុខភាពល្អផងដែរ។ ចូរបន្ថែមទឹកដោះគោមួយកែវសម្រាប់អាហារពេលយប់របស់អ្នក ឬផឹកទឹកដោះគោមួយកែវ ខណៈពេលកំពុងតែញ៉ាំផ្លែឈើមួយដុំ។

បន្ថយស្ត្រេស
ទឹកដោះគោ គឺជាមធ្យោបាយដ៏ល្អបំផុតមួយក្នុងការបំបាត់ភាពតានតឹងនៅពេលថ្ងៃ។ ទឹកដោះគោក្តៅឧណ្ហៗមួយកែវជួយបន្ធូរសាច់ដុំ និងបំបាត់ភាពមួរម៉ៅរបស់សរសៃប្រសាទ។ ទឹកដោះគោក៏ត្រូវបានគេអះអាងដែរថា អាចជួយបន្ថយរោគសញ្ញានៃអាការៈឈឺចាប់មុនមករដូវ និងប៉ូវកម្លាំង។ ដូច្នេះ ថ្ងៃក្រោយបើសិនជាអ្នកមានអារម្មណ៍អស់កម្លាំង ចូរសាកល្បងផឹកទឹកដោះគោមួយកែវទៅ។

រាងកាយមានសុខភាពល្អ
ទឹកដោះគោមានសមាសធាតុជាច្រើនក្នុងការបញ្ចុះសម្ពាធឈាម និងកាត់បន្ថយការប្រឈមនឹងជំងឺដាច់សរសៃឈាមខួរក្បាល។ វាជួយកាត់បន្ថយការផលិតកូឡេស្ទេរ៉ូលរបស់ថ្លើម និងជួយបន្សាបជាតិអាស៊ីតទៀតផង។ វីតាមីន A និង B ក្នុងទឹកដោះគោអាចជួយធ្វើអោយភ្នែកមើលឃើញច្បាស់ល្អ និងបន្ថយការប្រឈមនឹងជំងឺមហារីកជាច្រើនផងដែរ៕

ប្រភព៖ Health.com.kh

មុន បន្ទាប់

មតិយោបល់