អ្នកឈឺបំពង់កអាចជាប់ពាក់ព័ន្ធនឹងជំងឺ Ebola ?
ប្រជាពលរដ្ឋ រស់នៅរាជធានីភ្នំពេញ ដែលមានជំងឺបំពង់កមួយចំនួន កំពុងមានការព្រួយបារម្ភពីជំងឺ Ebola ខណៈជំងឺនេះ បាននឹងកំពុងសម្លាប់មនុស្សរាប់ពាន់នាក់ នៅតំបន់អាហ្វ្រិកខាងលិច។ មានសេចក្ដីរាយការណ៍មកថា ជំងឺនេះកំពុងត្រូវបានរកឃើញនៅប្រទេសថៃ និង វៀតណាម។
ការព្រួយបារម្ភនេះ កើតមានផងដែរ ពីការរាលដាលដល់ប្រទេសកម្ពុជា។ ដូច្នេះចង់ជ្រាបច្បាស់ពីរឿងនេះ Sabay បានជួបសម្ភាសន៍ ជាមួយលោកវេជ្ជបណ្ឌិត លី សុវណ្ណ ប្រធាននាយកដ្ឋានប្រយុទ្ធជំងឺឆ្លង នៃក្រសួងសុខាភិបាល ពន្យល់លម្អិតពីជំងឺបំពង់ក និង ជំងឺ Ebola ដែលកំពុងផ្ទុះឡើងគួរឲ្យព្រួយបារម្ភនេះ៖
មួយរយៈចុងក្រោយនេះ មានការព្រួយបារម្ភពីជំងឺ Ebola ដែលជំងឺនេះកំពុងរាតត្បាតនៅ ក្នុងប្រទេសក្បែរខាងមួយចំនួន ហើយ កំពុងបារម្ភថា អាចរាលដាលនៅព្រះរាជាណាចក្រកម្ពុជា។ ដូច្នេះហើយ អ្នកកើតជំងឺបំពង់កមួយចំនួន ក៏កំពុងព្រួយបារម្ភពីបញ្ហានេះដែរ តើលោកមានអ្វីពន្យល់ទៅកាន់អ្នកកំពុងព្រួយបារម្ភពីរឿងនេះ?
លោក លី សុវណ្ណ៖ ជាដំបូងខ្ញុំសូមជម្រាបថា គិតមកដល់ម៉ោងនេះជំងឺ Ebola នៅមិនទាន់រាលដាលដល់ប្រទេសកម្ពុជានៅឡើយទេ។ ពោលជំងឺនេះមានកើតតែ៤ប្រទេសប៉ុណ្ណោះ ក្នុងនោះមានប្រទេសសេឡារ៉េអូន លីប៊ីរីយា នីហ្សេរីយា និងប្រទេសហ្គីណេទេ។ ដូច្នេះអ្វី ដែលយើងសង្ស័យហ្នឹងលុះត្រា តែគាត់មានចេញរោគសញ្ញាដូចរោគ Ebola ហើយមានប្រវត្តិធ្វើដំណើរទៅទីនោះ បានយើងចាត់ទុកជាការសង្ស័យ។ ប៉ុន្តែបើយើងអត់មានប្រវត្តិប៉ះពាល់អ្នកជំងឺ យើងមិនចាត់ទុកថាមានការសង្ស័យទេ។
តើលោកអាចពន្យល់បានទេថា អាការៈ ជំងឺបំពង់ក និង Ebola ខុសគ្នាយ៉ាងដូចម្ដេចដែរ?
លោក លី សុវណ្ណ៖ អ្នកជំងឺ Ebola មិនមែនមានតែអាការៈ ឈឺកទេ ពោលជំងឺ Ebola មានគ្រុនក្តៅ បូកជាមួយឈឺក្បាល បូកនឹងឈឺក បូកជាមួយឈឺសាច់ដុំ និង បូកជាមួយអាការៈក្អួត និង រាកទៀត។ និយាយទៅមានរោគសញ្ញាច្រើន។ មិនមែនមានតែឈឺកទេ។ ហើយទាំងអស់ហ្នឹង ហើយត្រូវមានប្រវត្តិប៉ះពាល់ជាមួយអ្នកជំងឺនៅឯប្រទេសរាតត្បាតហ្នឹងទៀត ទើបអាចចាត់ទុកជាការសង្ស័យ។ ចំពោះអ្នកកើតអាការៈ ឈឺបំពង់ក ជួនកាលយើងអាលែកស៊ី ដោយអាកាសធាតុក៏បង្កឲ្យឈឺក។ រលាកដោយសារមេរោគ ហើយមេរោគមានច្រើនប្រភេទទៅទៀត ដែលជាពពួកមេរោគធ្វើឲ្យឈឺក និងរលាកបំពង់ក ក៏វាធ្វើឲ្យឈឺកដែរ។ ម្យ៉ាងបើសិនជាយើងមានអាការៈឈឺក និងអាការៈគ្រុនផងគួរទៅរកការពិគ្រោះជាមួយគ្រូពេទ្យ ទើបអាចធ្វើរោគវិនិច្ឆ័យបាន។ ប៉ុន្តែសូមកុំព្រួយបារម្ភ ព្រោះយើងអត់ទាន់មានរោគហ្នឹងនៅស្រុកយើងនៅឡើយទេ។
តើជំងឺបំពង់កជាទូទៅប្រើរយៈពេលព្យាបាលប៉ុន្មានដែរ?អាចប៉ះពាល់ដល់សុខភាពកម្រិតណាដែរ បើមិនរកការព្យាបាលទាន់ពេលទេ?
លោក លី សុវណ្ណ៖ ដូចខ្ញុំជម្រាបចឹង ប្រសិនជាអាលែកស៊ី ពិបាកណាស់ វាយូរថ្ងៃ លុះត្រាតែយើងរកបុព្វហេតុអ្វី ដែលធ្វើឲ្យយើងឈឺបំពង់ក ឬរលាកបំពង់ក។ ប៉ុន្តែបើបណ្ដាលមកពីបាក់តេរីវិញ គឺ ត្រូវតែប្រើថ្នាំផ្សះអង់ទីប៉ូយូទិច វានឹងអាចជា ក្នុងរយៈ ពេលខ្លី។ ម្យ៉ាងទៀតការឈឺកដោយសារផ្ដាសាយហ្នឹង យើងមិនបាច់ប្រើថ្នាំផ្សះទេ។ តែយើងអាចប្រើថ្នាំបញ្ចុះកម្ដៅ។ ប្រើថ្នាំកុំឲ្យឈឺក និងផឹកទឹកឲ្យបានច្រើននោះវានឹងជាដោយឯកឯងទេ។ ចំពោះបញ្ហានេះ ប្រសិនបើយើងអាលែកស៊ី វាអាចប៉ះពាល់រំខានដល់ការរស់នៅរបស់យើងប្រចាំថ្ងៃ។ អ្នកជំងឺត្រូវតែពិគ្រោះជាមួយគ្រូពេទ្យ។ ឧទាហរណ៍ដូចថា យើងធ្លាប់ឈឺយូរវាអាចរ៉ាំរ៉ៃហើយ ត្រូវពិគ្រោះជាមួយគ្រូពេទ្យខាងអាលែកស៊ី។ មានមេរោគមួយចំនួន បើយើងមិនព្យាបាលទាន់ពេលទេ វាអាចប៉ះពាល់ទៅដល់ការរលាកជង្គង់ ការលាកបេះដូងហ្នឹងទៅទៀត។ ហ្នឹងគេហៅពួកមេរោគម្យ៉ាងទៀត ដែលបង្កឲ្យមានតទៅកន្លែងផេ្សង ៗ ទៀត។ ចឹងបានខ្ញុំសំណូមពរបើមានអាការៈ ឈឺកគួរទៅពិគ្រោះជាមួយគ្រូពេទ្យ ដើម្បីឲ្យគាត់ដឹងថាយើងឈឺអី។
បើសិនជាមិនទាន់កើតមានជំងឺបំពង់កទេ តើគេអាចការពារបានតាមវិធីណាខ្លះ?
លោក លី សុវណ្ណ៖ វិធីការពារ ទី១ បើសិនជាមានអ្នកផ្តាសាយគួរតែកុំទៅជិតគាត់ ឬក៏សំណូមពរឲ្យគាត់ពាក់ម៉ាស់ការពារ។ ទី២ សម័យកាលឥឡូវ យើងសម្បូរមេរោគច្រើនណាស់ យើងគូរតែអនុវត្តឧស្សាហ៍លាងសាប៊ូលាងដៃ និងទឹក មុននឹងក្រោយបរិភោគអាហារ ក្រោយពេលចេញពីបន្ទប់ទឹកឬមុនរៀបចំអាហារត្រូវលាងដៃជាមួយសាប៊ូឲ្យបានស្អាត។ សម័យឥឡូវយើងមានទឹកហ្សែល គួរតែអនុវត្តយកដាក់តាមខ្លួន និងឧស្សាហ៍តាមខ្លួន និងឧស្សាហ៍ច្របាច់ប៉ុន្មានដំណក់ ដាក់ក្នុងដៃហើយលាងទៅអាហ្នឹងក៏យើងអាចកាត់បន្ថយបានច្រើនដែរ។ ហ្សែលហ្នឹងខ្ញុំគិតថាអាចកាត់បន្ថយអត្រាឈឺរហូតដល់៥០% ឯណោះ។
តើលោកអាចលម្អិតពីវិធីព្យាបាលជំងឺនេះដូចម្តេចដែរ?
លោក លី សុវណ្ណ៖ វាអាស្រ័យលើប្រភពនៃជំងឺ ឧទាហរណ៍ដូចគាត់ឧស្សាហ៍ឈឺក ដោយសារវីរុសគាត់អាចចាក់វាក់សាំងបង្កាមួយផ្នែកតូចមួយ សម្រាប់ចាក់ការពារប្រចាំរដូវ។ នៅគ្លីនិកខ្លះគាត់មាន។ ម្យ៉ាងបើយើងអាលែកស៊ី គួរតែត្រូវពិគ្រោះជាមួយគ្រូពេទ្យឲ្យគាត់ពន្យល់។ ប្រសិនបើកើតឡើងដោយបាក់តេរីវិញ គួរឧស្សាហ៍លាងដៃ និងសាប៊ូ ដែលអាចកាត់បន្ថយការឈឺហ្នឹងបានច្រើនណាស់។
ជាចុងក្រោយ តើលោកមានសារអ្វីខ្លះ ដើម្បីផ្ញើទៅកាន់សាធារណៈជន ដើម្បីកុំឲ្យបារម្ភពីជំងឺ Ebola ដែលកំពុងផ្ទុះឡើង និងជំងឺបំពង់កនេះ?
លោក លី សុវណ្ណ៖ បច្ចុប្បន្ននេះតាមពិត យើងមានការព្រួយបារម្ភមិនមែនតែជំងឺ Ebola ទេយើងមានជំងឺផ្លូវដង្ហើមនៅមជ្ឈិមបូព៌ា កំពុងតែផ្ទុះ ហើយនឹងជំងឺផ្ដាសាយបក្សីរបស់ប្រទេសយើងក៏មិនទាន់បាត់ដែរ ហើយឥឡូវហ្នឹងជំងឺផ្ដាសាយបក្សីកំពុងរាតត្បាតនៅប្រទេសចិនទៀត។ ដូច្នេះការអនុវត្តអនាម័យ ជាប្រចាំជាការប្រសើរណាស់។ ការបរិភោគអាហារ ដែលឆ្អិនល្អ សាច់មាន់ ពងទា ត្រូវចម្អិនឲ្យឆ្អិនល្អ។ បន្លែគួរញ៉ាំបន្លែ ដែលឆ្អិនល្អ និងផឹកទឹកឆ្អិន ហើយឧស្សាហ៍លាងដៃ និងសាប៊ូដូចខ្ញុំបានជម្រាបចឹង។ បើសិនជាមានអ្នកកើតជំងឺផ្ដាសាយ យើងជៀសវាងដើរទៅជិតគាត់ និងស្នើសុំគាត់ពាក់ម៉ាស់ ដើម្បីកុំឲ្យកណ្ដាស់ ឬក្អក ទៅអ្នកដទៃ។ ម្យ៉ាងបើសិនជាមានរោគសញ្ញា គ្រុនក្តៅឈឺក និងសន្លាក់ អីចឹង គួរទៅពិគ្រោះជាមួយគ្រូពេទ្យ។ ជៀសវាងការទៅផ្សំថ្នាំ ដោយខ្លួនឯង។ ការផ្សំថ្នាំដោយខ្លួនឯងទី១ មិនប្រាកដថា ត្រូវទេ ទី២ ការផ្សំឱសថច្រើនពេកធ្វើឲ្យប៉ះពាល់ដល់សុខភាព និងស៊ាំថ្នាំ។ ដូច្នេះជាទីបញ្ចប់អ្នកជំងឺគួរត្រូវទៅពិគ្រោះជាមួយគ្រូពេទ្យ៕
ប្រភព៖ Sabay
មើលគួរយល់ដឹងផ្សេងៗទៀត
-
សុដន់ខ្ញុំអាចយារធ្លាក់ទេ ប្រសិនបើខ្ញុំបំបៅដោះកូន?
-
បច្ចេកទេសទាយឆុត ដឹងសង្សារនិយាយកុហក
-
“សាច់ដុំកំភួនជើង ឬសាច់ដុំជើងរបស់អ្នកអាចក្លាយទៅជារឹង តឹង និងឈឺចាប់យ៉ាងខ្លាំងភ្លាមៗ” នោះហើយដែលហៅថារមួលក្រពើ ឬការជាប់សាច់ដុំ។
គួរយល់ដឹង
- វិធី ៨ យ៉ាងដើម្បីបំបាត់ការឈឺក្បាល
- « ស្មៅជើងក្រាស់ » មួយប្រភេទនេះអ្នកណាៗក៏ស្គាល់ដែរថា គ្រាន់តែជាស្មៅធម្មតា តែការពិតវាជាស្មៅមានប្រយោជន៍ ចំពោះសុខភាពច្រើនខ្លាំងណាស់
- ដើម្បីកុំឲ្យខួរក្បាលមានការព្រួយបារម្ភ តោះអានវិធីងាយៗទាំង៣នេះ
- យល់សប្តិឃើញខ្លួនឯងស្លាប់ ឬនរណាម្នាក់ស្លាប់ តើមានន័យបែបណា?
- អ្នកធ្វើការនៅការិយាល័យ បើមិនចង់មានបញ្ហាសុខភាពទេ អាចអនុវត្តតាមវិធីទាំងនេះ
- ស្រីៗដឹងទេ! ថាមនុស្សប្រុសចូលចិត្ត សំលឹងមើលចំណុចណាខ្លះរបស់អ្នក?
- ខមិនស្អាត ស្បែកស្រអាប់ រន្ធញើសធំៗ ? ម៉ាស់ធម្មជាតិធ្វើចេញពីផ្កាឈូកអាចជួយបាន! តោះរៀនធ្វើដោយខ្លួនឯង
- មិនបាច់ Make Up ក៏ស្អាតបានដែរ ដោយអនុវត្តតិចនិចងាយៗទាំងនេះណា!
សេវាកម្មពេញនិយម
ផ្សព្វផ្សាយពាណិជ្ជកម្ម៖
