អ្នកណាខុស អ្នកណាត្រូវ ក្រសួង និង ក្រុមផលិតករ បកស្រាយផ្សេងគ្នាលើបម្រាម “ស្បែកគង់”

អ្នកណាខុស អ្នកណាត្រូវ ក្រសួង និង ក្រុមផលិតករ បកស្រាយផ្សេងគ្នាលើបម្រាម “ស្បែកគង់”

មន្ត្រីក្រសួងវប្បធម៌ និង វិចិត្រសិល្បៈ និង ក្រុមផលិតករបកស្រាយផ្ទុយពីគ្នាលើបម្រាមរឿង”ស្បែកគង់” ដែលហាមមិនឱ្យក្មេងអាយុក្រោម ១៥ ឆ្នាំចូលទស្សនា។

ការចេញបម្រាមពីក្រសួងនេះ ខណៈដែលខ្សែភាពយន្តចំណាយទឹកប្រាក់ជាង ៦៨ ម៉ឺនដុល្លារខាងលើកំពុងទទួលការចាប់អារម្មណ៍ ក៏ដូចជាការរិះគន់ ពីមហាជន រួមនឹងការរកចំណូលខ្ពស់ផងដែរសម្រាប់រយៈពេល ១១ ថ្ងៃ កន្លងមក។

ផលិតករ និង ជាចាងហ្វាងផលិតកម្ម Angkor Picture លោក ប៉ុល វិបូ បាននិយាយថា បម្រាមរបស់ក្រសួងវប្បធម៌ មិនមានភាពច្បាស់លាស់នាំឲ្យផលិតកម្មរបស់លោកមិនអាចទទួលយកបានទេ។ លោកថា ការធ្វើបែបនេះបាននាំឱ្យរឿង “ស្បែកគង់”របស់លោក ខាតចំណូល ៤០ ភាគរយ។

“ខ្ញុំសោកស្ដាយចំពោះក្រសួង។ យើងកំពុងរកចំណូលបានខ្ពស់ផង ស្រាប់តែមកចេញបម្រាមពេលនេះ ធ្វើឲ្យយើងបាត់បង់ចំណូលជាច្រើនខុសពីការរំពឹងទុក។ ខ្ញុំគិតថា ជាករណីទីមួយសម្រាប់ប្រទេសកម្ពុជា”។

Director

ពីឆ្វេងទៅស្ដាំ លៀក លីដា, ឆាយ បូរ៉ា, ស៊ិន ចន្ទសាយ៉ា, ហ៊ុយ យ៉ាឡេង, ប៉ុល វិបូ

ផលិតករខាងលើបានស្នើដល់ក្រសួងវប្បធម៌ និង វិចិត្រសិល្បៈបើកចិត្តឱ្យទូលាយជាងនេះបន្តិចចំពោះវិស័យភាពយន្តខ្មែរបានផលិត និង ដាក់បញ្ចាំងតាមរោងភាពយន្តនានា។ ម្យ៉ាងទៀតលោកស្នើឱ្យក្រសួងវប្បធម៌ ពេលចេញបម្រាមលើកក្រោយត្រូវមានហេតុផលច្បាស់លាស់ដើម្បីឱ្យផលិតករទទួលយកបាន។

គាំទ្រនឹងការលើកឡើងរបស់ លោក ប៉ុល វិបូ ខាងលើ ផលិតករ និង ជាចាងហ្វាង LD Picture លោក លៀក លីដា លើកឡើងថា ការធ្វើដូច្នេះរបស់ក្រសួងវប្បធម៌ និង វិចិត្រសិល្បៈ អាចនឹងធ្វើឱ្យប៉ះពាល់ដល់ផលិតករដទៃ ហើយវិស័យភាពយន្តខ្មែរនឹងមិនអាចបោះជំហានទៅមុខរួចទេ។

ផលិតករវ័យក្មេងរូបនេះ បញ្ជាក់ដូច្នេះ៖ “បងសួរ! ឱ្យកុនខ្មែររីកចម្រើនទៅមុខម៉េចរួច បើគ្រាន់តែប៉ុណ្ណឹងក្រសួងចេញបម្រាម ធ្វើឱ្យគេបាត់បង់ចំណូលរាប់ម៉ឺនដុល្លារចឹង”។

លោក លៀក លីដា បន្តថា វិស័យភាពយន្តរបស់ខ្មែរនឹងពិបាកជ្រៀតចូលទីផ្សារអន្តរជាតិ នាពេលអនាគត ប្រសិនបើក្រសួងវប្បធម៌ មិនព្រមធ្វើឱ្យប្រសើរជាងនេះ ជុំវិញធ្វើឱ្យផលិតករមានកម្លាំងចិត្តក្នុងការផលិតភាពយន្ត។

ឆ្លើយតបនឹងការរិះគន់ពីសំណាក់ផលិតករខាងលើ ប្រធាននាយកដ្ឋានភាពយន្ត និង ផ្សព្វផ្សាយវប្បធម៌ នៃក្រសួងវប្បធម៌ និង វិចិត្រសិល្បៈ លោក ស៊ិន ចន្ទសាយ៉ា បានច្រានចោលចំពោះការលើកឡើងរបស់ផលិតករខាងលើ។

“ទើបនឹងចេញស្អី បម្រាមហ្នឹងក្រសួងយើងចេញតាំងពីមុនរឿងដាក់បញ្ចាំងមកម្ល៉េះ មិនមែនទើបតែចេញទេ។ យើងនិយាយគ្នាច្បាស់លាស់ថែមទៀត ថាក្មេងអាយុក្រោម ១៥ ឆ្នាំ មិនអាចទស្សនាបានទេ ហេតុអ្វីមកប្រតិកម្មនៅពេលនេះ”។

បម្រាមរបស់ក្រសួងវប្បធម៌ និង វិចិត្រសិល្បៈហាមមិនឱ្យ ក្មេងអាយុក្រោម ១៥ ឆ្នាំ ចូលទស្សនាដោយសារតែនៅក្នុងឈុតឆាកខ្លះបង្ហាញ ការកាប់សម្លាប់ ព្រៃផ្សៃ រួមនឹងស្នេហារោលរាល នាំឱ្យក្មេងមិនអាចទទួលយកបាន។ លោក ស៊ិន ចន្ទសាយ៉ា និយាយ។

ដោយឡែកពាក់ព័ន្ធនឹងការប្រកាសថា បាត់ចំណូល ៤០ ភាគរយ ពីការដាក់បម្រាមរបស់ក្រសួងវប្បធម៌ និង វិចិត្រសិល្បៈខាងលើ លោក ស៊ិន ចន្ទសាយ៉ា ស្នើឱ្យផលិតកររឿង ស្បែកគង់ បង្ហាញរបាយការណ៍ច្បាស់លាស់ ជាជាងថានឹងមាត់។

“ខ្ញុំសួរថា បាត់ចំណូល ៤០ ភាគរយហ្នឹង បានទិន្នន័យមកពីណា ហើយមានក្មេងអាយុក្រោម ១៥ ឆ្នាំហ្នឹងប៉ុន្មាននាក់ចង់ចូលទស្សនា។ កុំចេះតែថា កុំចេះតែនិយាយ ត្រូវមានទិន្នន័យច្បាស់លាស់សិន”។ លោក ស៊ិន ចន្ទសាយ៉ា បន្ថែម។

យល់ស្របនឹងការលើកឡើងរបស់មន្ត្រីក្រសួងវប្បធម៌ និង វិចិត្រសិល្បៈខាងលើ ផលិតករ និង ជាចាងហ្វាងផលិតកម្ម ដើមត្នោត លោក ឆាយ បូរ៉ា និយាយថា ការចេញលិខិតរបស់ក្រសួងមិនមានការប៉ះពាល់ធ្ងន់ធ្ងរទេដល់រឿង ស្បែកគង់ទេ។

លោកបានលើកឡើងថា៖ “ខ្ញុំថាដូចជាគ្មានអ្វីធំដុំទេបម្រាមប៉ុណ្ណឹង បរទេសក៏គេចេញបម្រាមចឹងដូចគ្នា។ ដូចរឿង បីកន្លះខ្ញុំចឹង ចាក់នៅ សិង្ហបុរី ក៏គេមិនអនុញ្ញាតឱ្យក្មេងអាយុក្រោម ១៣ ឆ្នាំ មើលដែរ”។

លោក ឆាយ បូរ៉ា យល់ថា លិខិតចេញដោយក្រសួងវប្បធម៌ និង វិចិត្រសិល្បៈ មិនមែនជាបម្រាមទេ គឺគ្រាន់តែជាបទបញ្ញត្ត ដែលផលិតករទូទៅត្រូវដឹង និងត្រូវអនុវត្តន៍ពេលត្រៀមផលិតខ្សែភាពយន្តនិមួយៗ។

ដោយឡែកអតីតអ្នកដឹកនាំរឿងល្បីឈ្មោះរបស់ផលិតកម្ម ខេមប្រូ មានបទពិសោធន៍ក្នុងការដឹកនាំរឿងជាង ១០ឆ្នាំ និងទើបប្រឡូកចូលវិស័យភាពយន្តវិញ លោក ហ៊ុយ យ៉ាឡេង បញ្ជាក់ថា ការចេញបម្រាមពីក្រសួងវប្បធម៌ និង វិចិត្រសិល្បៈ មិនមានអ្វីខុសទេ ព្រោះឈុតខ្លះក្នុងសាច់រឿងមិនអាចទទួលយកបាន ជាពិសេសក្មេងៗមិនត្រូវអនុញ្ញាតឱ្យចូលទស្សនាឡើយ។

លោក ហ៊ុយ យ៉ាងឡេង បញ្ជាក់ថា៖ “ខ្ញុំដឹងថាគាត់ផលិតចង់ឱ្យកុនខ្មែរល្អ តែឈុតសម្ដែងក្នុងសាច់រឿងខ្លះខ្លាំងពេក ចឹងហើយក្រសួងធ្វើនេះគឺត្រឹមត្រូវហើយ”។

តាមការឱ្យដឹងពី លោក ប៉ុល វិបូ ដែលជាផលិតករ និង ជាចាងហ្វាងផលិតកម្ម Angkor Picture រយៈពេល ១១ ថ្ងៃ មកនេះខ្សែភាពយន្ត ស្បែកគង់ រកចំណូលបានជាង ១៥ ម៉ឺនដុល្លារ ដោយសំបុត្រលក់អស់ក្បែរ ៤ម៉ឺនសំបុត្រ។ ខ្សែភាពយន្តនេះ នឹងយកទៅដាក់បញ្ចាំងនៅប្រទេសថៃ នាថ្ងៃទី ២៣ ខែតុលា ខាងមុខ៕

ប្រភព: sabay

មុន បន្ទាប់

មតិយោបល់