Ice Bucket Challenge កំពុងល្បី តែផ្ទុះការតវ៉ាប្រឆាំងនៅចិន

Ice Bucket Challenge កំពុងល្បី តែផ្ទុះការតវ៉ាប្រឆាំងនៅចិន

កាលពីពេលថ្មីៗនេះ មនុស្សមួយក្រុមធំបានបើកយុទ្ធនាការតវ៉ាប្រឆាំងនឹងការលេងចាក់ទឹកកក ឬ Ice Bucket Challenge ដោយសារយល់ថាល្បែងនេះបានធ្វើឲ្យខ្ជះខ្ជាយទឹកស្អាត។ កាប្រមូលផ្ដុំគ្នា បានធ្វើឡើងនៅស្រុកលូសាន ខេត្តហឺណាន ប្រទេសចិន ដែលកំពុងជួបប្រទះគ្រោះរាំងស្ងួត និងខ្វះខាតទឹកប្រើប្រាស់យ៉ាងខ្លាំង។

ice

តាមសារព័ត៌មាន Tencen របស់ចិនបានឲ្យដឹងថា មនុស្សជាច្រើនបានជួបជុំគ្នានៅមុខរូបសំណាកព្រះពុទ្ធដែលខ្ពស់ជាងគេបំផុតក្នុងប្រទេស ហើយលើកធុងគ្មានទឹកឡើងលើ និងស្រែកថា “យើងចង់ផឹកទឹក”។ នៅជាប់ខ្លួនរបស់ពួកគេ មានបដាជាច្រើន ដែលមានន័យជារួមគឺ “ហឺណានត្រូវនិយាយថាទេចំពោះល្បែង Ice Bucket Challenge”។ អ្នកតវ៉ាទាំងនោះបានអំពាវនាវឲ្យមានការជួយអ្នករងគ្រោះដោយជំងឺ ASL ដោយវិធីផ្សេងជំនួសវិញ។

ចំណែកឯសមាគមក្រុមគ្រូពេទ្យនៅហុងកុង ក៏បានរិះគន់ចំពោះល្បែងនេះដែរ ប៉ុន្តែក្នុងន័យសុខភាព។ ពួកគេបានលើកឡើងថា Ice Bucket Challenge អាចបង្កហានិភ័យដល់អ្នកចូលរួមលេង ជាពិសេសគឺមនុស្សចាស់ ម្ដាយដែលកំពុងពពោះ និងអ្នកមានបញ្ហាបេះដូងដែលបណ្ដាលមកពីការឡើងសម្ពាធឈាមជាដើម។ នេះបើតាមសារព័ត៌មាន South China Morning Post។

ice1

Ice Bucket Challenge ជាល្បែងលើកកម្ពស់ការយល់ដឹង និងរៃអង្គាសប្រាក់ស្រាវជ្រាវពីប្រភេទជំងឺម្យ៉ាងឈ្មោះ ALS។ របៀបលេង គឺយកទឹកដែលមានលាយទឹកកក មកចាក់ស្រោចលើក្បាលហើយហៅឈ្មោះអ្នកលេងបន្ត ៣ នាក់ទៀត និងឧបត្ថម្ភប្រាក់ផ្ទាល់ខ្លួនដល់សមាគមស្រាវជ្រាវ។ បច្ចុប្បន្នល្បែងចាក់ទឹកកកនេះ កំពុងទទួលការពេញនិយមយ៉ាងខ្លាំង ហើយបុគ្គលល្បីៗជាច្រើនបានចូលរួមលេងល្បែងនេះដែរ។ មកដល់ពេលនេះ Ice Bucket Challenge ជួយរ៉ៃអង្គាសប្រាក់បានជាង ២០ លានដុល្លារហើយ។

ប៉ុន្តែទន្ទឹមនិងមានអ្នកចូលរួមលេងច្រើន ក៏មានរិះគន់ច្រើនដែរ។ ចុះអ្នកវិញ យល់យ៉ាងណាដែរចំពោះល្បែងនេះ?

ice2