មុនជួបគ្នាថ្ងៃអាទិត្យនេះ វង្ស ណយ និងឡៅ ស៊ីណាត និយាយពីការដើរចេញពីសង្វៀន

មុនជួបគ្នាថ្ងៃអាទិត្យនេះ វង្ស ណយ និងឡៅ ស៊ីណាត និយាយពីការដើរចេញពីសង្វៀន

អ្នកលេងគុនខ្មែរ វង្ស ណយ នឹងត្រូវជួបអ្នកប្រដាល់ជើងចាស់ ឡៅ ស៊ីណាតនៅវេលាម៉ោង១ រសៀល ថ្ងៃអាទិត្យ ទី១៧ ខែសីហា នេះដើម្បីប្រកួតដណ្ដើមពាន និងប្រាក់រង្វាន់ប្រចាំខែសីហារបស់ស្ថានីយទូរទស្សន៍បាយ័ននៅសង្វៀនរោងសៀកទល់មុខរដ្ឋសភា។

Vong-Noy
វង្ស ណយ កំពុងររំលឹកគុណគ្រូ

ក្រោយរងបរាជ័យយ៉ាងស្ពឹកមុខក្រោមថ្វីដៃកីឡាករថៃកាលពីដើមខែនេះ កូននាគ វង្ស ណយ ប្ដេជ្ញាថានឹងយកឈ្នះក្នុងការប្រកួតនេះឲ្យបានដើម្បីស្ដារមុខមាត់ឡើងវិញ។ អ្នកប្រដាល់ដែលទើបនឹងស្ពាយខ្សែក្រវាត់មកពីបារាំងកាលពីខែមុនបានលើកឡើងថា៖ «វ៉ៃតាំងពីយូរយារណាស់មកហើយគ្មានសល់អីសោះ…អស់អារម្មណ៍វ៉ៃតែម្ដង។ វ៉ៃធ្វើអីបើលុយបានពីវ៉ៃតែបន្តិចបន្តួចហ្នឹង…ធ្វើសំណង់បាន២ម៉ឺនក្នុងមួយថ្ងៃក៏គ្រាន់បើជាងដែរ។ តែយ៉ាងណាខ្ញុំនឹងវ៉ៃឲ្យឈ្នះនៅប្រកួតនេះ។ ខ្ញុំអាចនឹងទៅធ្វើការនៅស្រុកគេហើយ»។

វង្ស ណយ បានបន្ថែមថា មុននឹងចាកចេញពីអាជីព រូបគេចង់សាងកេរ្តិ៍ឈ្មោះឲ្យបានល្អជាងនេះ។ អ្នកប្រដាល់ដែលល្អទាំងព្រមរូបនេះ ប្រកួតបានប្រហែលជា១៩០ដងកន្លងមក ក្នុងនោះឈ្នះ១៥០ដង ផ្ដួលដៃគូឲ្យសន្លប់៨០ដង ចាញ់៤០ដង។

ងាកទៅមើលអ្នកប្រដាល់ចាស់វស្សា ឡៅ ស៊ីណាត វិញហាក់មានទំនុកចិត្តច្រើនលើការប្រកួតនេះបើទោះបីជារបួសចាស់តែងតែរំខានជាញឹកញាប់ក្ដី។ លោកលើកឡើងថា វង្ស ណយ ល្អកែង តែអន់ជើង និងក្បាលពោះ ហើយការជួបគ្នាប៉ុន្មានប្រកួតកន្លងមកលោកតែងតែប្រើទម្ងន់ជើងដើម្បីទាត់បំបាក់ វង្ស ណយជានិច្ច។

Lao-Sinath
ឡៅ ស៊ីណាត កំពុងរំលឹកគុណគ្រូ

អ្នកប្រដាល់ក្លិបឆត្រយោងលេខ៩១១រូបនេះបន្តថា៖ «ខ្ញុំអាចនឹងឈប់ពីអាជីពនៅអំឡុង១ឆ្នាំ ឬ២ឆ្នាំទៀត ព្រោះកម្លាំងរបស់ខ្ញុំកាន់តែចុះខ្សោយ ហើយវ័យក៏កាន់តែច្រើន។ អាជីពជាអ្នកប្រដាល់មិនអាចចិញ្ចឹមជីវិតបានរហូតទេ ដូច្នេះត្រូវតែរកអ្វីផ្សេងពីនេះ»។ ឡៅ ស៊ីណាត ក៏ទើបតែរងបរាជ័យកាលពីដើមខែដូច វង្ស ណយ ដែរ ដូច្នេះគេអាចនឹងប្រឹងប្រែងខ្លាំងក្នុងការប្រកួតនេះ។

ប្រវត្តិជួបគ្នា៤លើកកន្លងមករវាងអ្នកទាំងពីរមិនដែលដល់ទឹកទី៥នោះទេ ដោយក្នុងនោះ ឡៅ ស៊ីណាតឈ្នះ៣លើក ហើយ វង្ស ណយ ធ្លាប់ឈ្នះតែម្តងគត់៕

ប្រភព: sabay

មុន បន្ទាប់

មតិយោបល់