ចូវ យុនហ្វាត ថាការលេង Ice Bucket Challenge គឺជាការខ្ជះខ្ជាយទឹកស្អាត

ចូវ យុនហ្វាត ថាការលេង Ice Bucket Challenge គឺជាការខ្ជះខ្ជាយទឹកស្អាត

ចាប់តាំងពីសប្ដាហ៍មុន តារាចិនល្បីៗជាច្រើននាក់បានចូលរួមលេងល្បែង Ice Bcuket Challenge ដែលជាល្បែងកំពុងពេញនិយមខ្លាំងទូទាំងពិភពលោក ដើម្បីលើកកម្ពស់ការយល់ដឹង និងបរិច្ចាគសម្រាប់មូលនិធិនៃជំងឺប្រព័ន្ធប្រសាទ ASL។

ដោយឡែកតារាសម្ដែងហុងកុង ចូវ យុនហ្វាត ត្រូវបានហៅឈ្មោះដល់ទៅ២ដង ឲ្យចូលរួមល្បែងនេះ ដែលម្ដងដោយតារាសម្ដែង Nick Cheung និងម្ដងទៀតដោយ Donnie Yen (កុំកុំ) ក៏ប៉ុន្តែតារាវ័យ ៥៩ឆ្នាំរូបនេះបានបដិសេធ ដោយគិតថានេះគឺជាការខ្ជះខ្ជាយទឹកស្អាតដែលជារបស់ដ៏មានតម្លៃបំផុត។ភរិយារបស់តារាសម្ដែងរូបនេះ បានឆ្លើយតបជំនួសស្វាមីថា “គាត់នឹងមិនចូលរួមភ្នាល់ជាមួយគេនោះទេ។ វាគឺជាការបង្ហិនទឹកស្អាត ប៉ុន្តែពួកយើងនឹងនៅតែបរិច្ចាគសម្រាប់មូលនិធិនេះ”។

CHOW

ស្រដៀងគ្នានេះដែរ តារាសម្ដែងប្រចាំទូរទស្សន៍ TVB លោក Stephen Au ក៏គិតថាការលេងល្បែងនេះគឺជាការខ្ជះខ្ជាយទឹកដូចគ្នាដែរ។ តារារូបនេះបានសរសេរលើ Facebook របស់ខ្លួនថា “ទឹកស្អាតដែលពួកយើងប្រើរាល់ថ្ងៃ មិនមែនបានមកដោយងាយៗនោះទេ។ គ្រប់គ្នាហាក់កំពុងតែជំរុញគ្នាឲ្យខ្ជះខ្ជាយទឹកស្អាតជាបន្តបន្ទាប់។ សូមក្រឡេកមើលក្មេងៗនៅជ្រុងម្ខាងទៀតនៃពិភពលោក ដែលទើបតែបានស្គាល់រសជាតិទឹកស្អាតជាលើកទីមួយផង”។

គិតត្រឹមថ្ងៃទី២០ ខែសីហា ល្បែងចាក់ទឹកកក Ice Bucket Challenge អាចប្រមូលប្រាក់បាន ១៥លានដុល្លារ សម្រាប់ការស្រាវជ្រាវជំងឺ ASL។ នេះបើយោងតាមរបាយការណ៍ពីគេហទំព័រ Eonline។

តារាល្បីៗនៅប្រទេសចិនដែលបានលេងល្បែងនេះ រួចហើយមានដូចជា Andy Lau (លី តឺហួរ), Jay Chou, Donnie Yen (កុំកុំ), Zhang Ziyi, Wang Lee Hom, ក្រុម By2 និងក្រុម Mayday ជាដើម។ ដោយឡែកតារាខ្មែរជាច្រើននាក់ ក៏កំពុងលេងល្បែងនេះដែរ ប៉ុន្តែក្នុងគោលបំណងផ្សេង គឺដើម្បីរៃអង្គាសប្រាក់សម្រាប់មន្ទីរពេទ្យគន្ធបុប្ផា ៕