សហព័ន្ធកីឡាប្រដាល់កំពុងចាត់ការរឿង សេន ប៊ុនថេនទៅប្រកួតនៅ Thai Fight

សហព័ន្ធកីឡាប្រដាល់កំពុងចាត់ការរឿង សេន ប៊ុនថេនទៅប្រកួតនៅ Thai Fight

សហព័ន្ធកីឡាប្រដាល់កម្ពុជាបានកំពុងទាក់ទងទៅក្លិបក្រសួងមហាផ្ទៃដែលជាទ្រនំរបស់ សេន ប៊ុនថេន ហ្វឹកហាត់ និងរង់ចាំរបាយការណ៍ដើម្បីចាត់វិធានការជាចុងក្រោយលើកីឡាកររូបនេះដែលបានចេញទៅប្រកួតនៅប្រទេសថៃដោយលាក់លៀម និងពាក់ខ្សែលើក្បាលតាមវប្បធម៌ថៃ។

លោក តែម ម៉ឺន ប្រធានសហព័ន្ធកីឡាប្រដាល់កម្ពុជាបានឲ្យដឹងថា សេន ប៊ុនថេនចេញទៅប្រកួតនៅប្រទេសថៃនេះមិនបានផ្តល់ដំណឹងដល់សហព័ន្ធកីឡាប្រដាល់កម្ពុជាទេ ហើយក្លិបដែលជាអ្នកគ្រប់គ្រងផ្ទាល់ក៏មិនដឹងដែរ។ ដូច្នេះសហព័ន្ធកំពុងទាក់ទងទៅក្លិបដើម្បីឲ្យផ្តល់របាយការណ៍មុននឹងសហព័ន្ធធ្វើការសម្រេចយ៉ាងណា។

sen-bunthen-vs-tem-moeun
សេន ប៊ុនថេន (ស្តាំ) លោក តែម ម៉ឺន (កណ្តាល) និង កីឡាករបារាំង (ឆ្វេង) នៅសង្វៀន SEA TV

លោកបានសង្កត់ធ្ងន់ថា៖ «បុគ្គលណាប្រព្រឹត្តខុស បុគ្គលនោះជាអ្នកទទួលខុសត្រូវ។ កីឡាករគ្រប់រូបត្រូវគិតពីមុខមាត់ប្រទេសជាតិជាធំ មិនត្រូវគិតរឿងលុយកាក់ជាធំនោះទេ»។

លោកបន្ថែមថា ៖«ករណីស្វែងរកឃើញកំហុសឆ្គងមែននោះ យើងនឹងចាត់វិធានការតាមបទបញ្ជាផ្ទៃក្នុងរបស់សហព័ន្ធ ដូចជាត្រូវបញ្ឈរជើង ត្រូវពិន័យ ឬត្រូវបញ្ឈប់ពីសហព័ន្ធ ឬក៏ពីក្លិបជាដើមដែលធ្វើទៅតាមកំហុសដែលរកឃើញ»។

កាលពីថ្ងៃសៅរ៍ សប្តាហ៍មុន សេន ប៊ុនថេន បានប្រកួតនៅកម្មវិធី Thai Fight ដោយចាញ់ពិន្ទុកីឡាករបារាំង Antoine Pinto។ លទ្ធផលចាញ់ ឬឈ្នះមិនមែនជាបញ្ហាទេ ប៉ុន្តែអ្វីដែលគេចាប់អារម្មណ៍នោះគឺ កីឡាករកម្ពុជារូបនេះបានពាក់ខ្សែនៅលើក្បាលដែលជានិម្មិតសញ្ញាមួយរបស់ក្បាច់គុនថៃ ខណៈប្រទេសកម្ពុជានិងថៃកំពុងប្រជែងគ្នាដាក់បញ្ចូលក្បាច់គុនមួយនេះទៅក្នុងបញ្ជីបេតិកភណ្ឌពិភពលោក។

ករណីនេះហើយដែលបណ្ដាលឲ្យមានការរិះគន់យ៉ាងខ្លាំងពីអ្នកស្នេហាប្រដាល់កម្ពុជា ហើយសហព័ន្ធក៏មិនទទួលស្គាល់ការចេញទៅប្រកួតរបស់គេទេដោយសារទៅដោយលាក់លៀម។

ទោះបីជាយ៉ាងណា នេះមិនមែនជាលើកទីមួយទេសម្រាប់កីឡាករកម្ពុជាចេញទៅប្រកួតនៅប្រទេសថៃហើយពាក់ខ្សែក្បាលដូចកីឡាករថៃ។ ជាច្រើនឆ្នាំកន្លងមកមិនថាកីឡាករខ្មែរទៅប្រកួតក្នុងកម្មវិធី Thai Fight ឬសង្វៀនផ្សេងនោះទេគឺសុទ្ធតែពាក់ខ្សែក្បាលដូចកីឡាករថៃដែរ លើកលែងតែ កែវ រំចង់ត្រូវបានគេមើលឃើញចងក្រណាត់ទង់ជាតិខ្មែរ៕

sen bunthen