យុវជនពិការភ្នែកជ្រុះពីកម្មវិធីThe Voice ចេញបទចម្រៀងនៅផលិតកម្ម BKSជាផ្លូវការ

យុវជនពិការភ្នែកជ្រុះពីកម្មវិធីThe Voice ចេញបទចម្រៀងនៅផលិតកម្ម BKSជាផ្លូវការ

ប្រុក ចាន់ថន យុវជនពិការភ្នែកទាំងសងខាង ដែលបរាជ័យនៅក្នុងកម្មវិធីប្រលងចម្រៀង The Voice Cambodia ថ្មីៗនេះ ហើយក្រោយមកក៏មានឱកាសបានក្លាយជាតារាចម្រៀងប្រចាំនៅផលិតកម្ម BKS ពេលនេះចាប់ផ្ដើមចេញបទចម្រៀងជាផ្លូវការហើយ។

ចាងហ្វាងផលិតកម្ម BKS វ័យ១៨ឆ្នាំឈ្មោះ ឈុន សុវណ្ណភក្ដី បានប្រាប់ Sabay នៅព្រឹកនេះថា បទចម្រៀងដំបូងរបស់យុវជនពិការខាងលើ ដែលនឹងចេញជាCDក្នុងពេលខាងមុខនេះ មានចំណងជើងថា “ពិការកាយ ឥតពិការចិត្ត” ។ បទចម្រៀងនេះ និយាយពីជីវិតពិតរបស់គេ ក្នុងនាមជាជនពិការភ្នែកទាំងសងខាងមួយរូប រស់ក្នុងភាពងងឹតគ្រប់ពេលវេលា និងពិបាកស្វែងរកឱកាសផ្សេងៗនៅក្នុងសង្គម។

ឈុន សុវណ្ណភក្ដី បានបន្ថែមថា បទចម្រៀងនេះ នឹងចេញក្នុងCD វ៉ុលដំបូងបង្អស់របស់ផលិតកម្មBKS រួមជាមួយបទចម្រៀងរបស់តារាចម្រៀងជើងថ្មីមួយចំនួនទៀតសរុបប្រមាណ១០បទ។ ទោះបីជាយ៉ាងណា ប្រុក ចាន់ថន នៅមានបទចម្រៀងជាបន្តបន្ទាប់ទៀត នាពេលខាងមុខក្នុងនាមជាតារាចម្រៀងប្រចាំផលិតកម្មរបស់ខ្លួន ដែលទើបបង្កើតឡើងមិនទាន់ទាំងសម្ពោធផងនោះ។

ម្ចាស់ផលិតកម្មវ័យក្មេងរូបនេះ បានបង្ហាញជំហរថា ខ្លួនមានឆន្ទៈមោះមុត ជ្រោមជ្រែងឲ្យយុវជនពិការមកពីខេត្តកំពង់ចាមរូបនេះ អាចសាងភាពល្បីល្បាញនៅក្នុងវិស័យចម្រៀង និងអាចចិញ្ចឹមជីវិតបាន។ អ្វីដែលជំរុញឲ្យរូបលោក ទទួលយកយុវជនពិការខាងលើឲ្យក្លាយជាតារាចម្រៀងក្នុងផលិតកម្មBKS ដោយសារតែមានក្ដីអាណិតអាសូរ ដោយមិនរើសអើង ទោះបីជារូបលោករស់ក្នុងគ្រួសារធូរធារក៏ដោយចុះ។

បទ”ពិការកាយ ឥតពិការចិត្ត” ច្រៀងដោយ ប្រុក ចាន់ថន