សហព័ន្ធកីឡាប្រដាល់រង់ចាំលិខិតលាឈប់របស់ វង្ស ណយទើបមានវិធានការ

សហព័ន្ធកីឡាប្រដាល់រង់ចាំលិខិតលាឈប់របស់ វង្ស ណយទើបមានវិធានការ

នៅដើមសប្តាហ៍នេះ ជើងខ្លាំង វង្ស ណយបានប្រាប់អ្នកសារព័ត៌មាន បន្ទាប់ពីផ្តួល ឡៅ ស៊ីណាតថា ខ្លួនសម្រេចលាឈប់ពីអាជីពប្រដាល់ហើយ ប៉ុន្តែមួយថ្ងៃក្រោយមកបែរដាក់កំណត់ឲ្យសហព័ន្ធកីឡាប្រដាល់កម្ពុជាចាត់វិធានការដោះស្រាយជុំវិញបញ្ហាតម្លៃខ្លួននៃការឡើងប្រកួតរបស់កីឡាករ ប្រសិនបើចង់ឲ្យរូបគេបន្តអាជីពប្រដាល់ទៀត។

ពាក់ព័ន្ធនឹងករណីនេះ សហព័ន្ធកីឡាប្រដាល់កម្ពុជាមិនទាន់បានសម្រេចយ៉ាងណានោះទេចំពោះដំណឹងលាឈប់ពីវិស័យកីឡាប្រដាល់របស់កីឡាករ វង្ស ណយ ដោយសំអាងថាពុំទាន់ទទួលបានលិខិតលាយលក្ខណ៍អក្សរណាមួយឡើយ។

លោក តែម ម៉ឺន ប្រធានសហព័ន្ធកីឡាប្រដាល់កម្ពុជាបានប្រាប់ Sabay កាលពីព្រឹកមិញថា សហព័ន្ធមិនទាន់ទទួលបានដំណឹងពីការលាឈប់របស់វង្ស ណយនៅឡើយ។ លោកបានបញ្ជាក់យ៉ាងខ្លីថា៖ «គេចូលមកនៅក្នុងសហព័ន្ធដោយមានការស្នើសុំត្រឹមត្រូវតាមច្បាប់ ដូច្នេះពេលចេញវិញក៏ត្រូវជូនដំណឹងឲ្យបានត្រឹមត្រូវដែរ»។

លោកបន្តលើកឡើងថា កីឡាករអាចផ្លាស់ប្ដូរអាជីពរបស់ខ្លួនបាននៅពេលដែលគេអស់ចិត្ត ឬមានអាជីពណាមួយផ្សេង។ លោកក៏បានដឹងច្បាស់ណាស់ថាចំណូលពីការប្រដាល់នៅពុំទាន់សមស្របសម្រាប់ជីវភាពកីឡាករនៅឡើយ ប៉ុន្តែលោកចង់ឲ្យកីឡាករគ្រប់រូបធ្វើការប្រៀបធៀបចំណូលរបស់ខ្លួនទៅនឹងមន្ត្រីរាជការ ឬអ្នកធ្វើការនានាដែលមានសញ្ញាប័ត្រធំៗផង ថាតើអ្នកទាំងនោះទទួលបានប្រាក់ចំណូលប៉ុន្មាន?

vong-noy
កីឡាករ វង្ស ណយ

លោកបន្ថែមថា៖ «មន្ត្រីរាជការ គ្រូបង្រៀន ឬអ្នកធ្វើការផ្សេងៗ គេធ្វើការពេញៗម៉ោងក្នុងមួយថ្ងៃៗ រីឯកីឡាករវិញឡើងរេញត្រឹមតែ២ ឬ៣ដងប៉ុណ្ណោះក្នុងមួយខែ ហើយអាចទទួលបានប្រាក់ចំណូលស្មើ ឬលើសមន្ត្រីរាជការទាំងនោះផង ដូច្នេះសូមមេត្តាចេះថ្លឹងថ្លែងឡើងវិញមុននឹងធ្វើការសម្រេចចិត្តអ្វីមួយ»។

លោកប្រធានសហព័ន្ធបញ្ជាក់ទៀតថា លោកនឹងពិភាក្សាជាមួយ វង្ស ណយ បន្ទាប់ពីទទួលបានលិខិតលាឈប់ពីវង្ស ណយ។ ខាងសហព័ន្ធក៏កំពុងយកចិត្តទុកដាក់ខ្លាំងណាស់ដែរចំពោះជីវភាពកីឡាករគ្រប់រូប ប៉ុន្តែនៅពេលនេះអ្នកជួយឧបត្ថម្ភនៅមានចំនួនតិចតួច ដូចនេះកីឡាករត្រូវយល់ពីស្ថានភាពរបស់សហព័ន្ធផង។

កន្លងមកកូននាគវង្ស ណយបានលើកឡើងជារឿយៗពាក់ព័ន្ធនឹងបញ្ហាជីវភាពសម្រាប់អាជីពជាអ្នកប្រដាល់ ហើយជាចុងក្រោយនេះវង្ស ណយក៏បានសម្រេចចិត្តដើរចេញពីកីឡាប្រដាល់ ប៉ុន្តែបានទុកពេលឲ្យសហព័ន្ធមួយខែដើម្បីពិនិត្យមើលករណីលាឈប់របស់ខ្លួន។

ប្រភព: sabay

មុន បន្ទាប់

មតិយោបល់