ម្ចាស់ហាងដើរម៉ូដសាពណ៌ លេចមុខតំណាងកម្ពុជាទៅប្រកួតកម្មវិធី Mrs. Universe 2014 នៅម៉ាឡេស៊ី

ម្ចាស់ហាងដើរម៉ូដសាពណ៌ លេចមុខតំណាងកម្ពុជាទៅប្រកួតកម្មវិធី Mrs. Universe 2014 នៅម៉ាឡេស៊ី

ស្ងាត់ៗលោកស្រី សាពណ៌ រ៉េនដល ម្ចាស់សាលាបង្រៀនដើរម៉ូដសាពណ៌បានលេចមុខជាបេក្ខភាពតំណាងកម្ពុជាទៅចូលរួមប្រឡងកម្មវិធី Mrs. Universe 2014 ខណៈដែលការប្រកួតវគ្គផ្ដាច់ព្រ័ត្រនឹងត្រូវធ្វើឡើងនៅថ្ងៃទី ២៩ សីហាខាងមុខក្នុងប្រទេសម៉ាឡេស៊ី។

នៅលើទំព័របោះឆ្នោតរបស់គេហទំព័រ Mrs. Universe 2014 ស្ត្រីសម្បុរស្រអែមដែលគេស្គាល់ច្បាស់តាមរយៈការដើរម៉ូដគឺជាបេក្ខភាពមួយក្នុងចំណោមបេក្ខជនប្រកួតមកពីជាង ៤០ ប្រទេសផ្សេងទៀត។

Sapor

រូបភាព Print Screen លោកស្រី សាពណ៌ រ៉េនដលក្នុងគេហទំព័រកម្មវិធីប្រកួត Mrs. Universe 2014

ការប្រកួត Mrs. Universe នេះត្រូវបានបង្កើតឡើងដំបូងក្នុងឆ្នាំ ២០០៧។ វាត្រូវបានប្រារព្ធឡើងជារៀងរាល់ឆ្នាំដើម្បីផ្ដល់កិត្តិយសដល់ស្ត្រីដែលរៀបការហើយមានស្នាដៃច្រើនក្នុងជីវិត គ្រួសារ អាជីព និងការរួមចំណែកដល់សង្គម។ ការប្រកួតនេះស្ថិតក្រោមបាវចនា “ចក្រវាលតែមួយ សំឡេងតែមួយ ដើម្បីបញ្ឈប់អំពើហិង្សាទៅលើស្ត្រី”។

បើទោះជាលោកស្រីស្ថិតក្នុងបេក្ខភាពចូលរួមប្រកួតប្រជែងមែន តែវាស្ថិតក្នុងវគ្គជម្រុះប៉ុណ្ណោះ។ ក្នុងចំណោមបេក្ខភាពទាំងជាង ៤០ ប្រទេសដែលមានឈ្មោះលើការបោះឆ្នោតអនឡាញ បេក្ខភាពណាទទួលបានសំឡេងបោះឆ្នោតគាំទ្រច្រើនជាងគេនឹងទទួលបានងារជា ”ជយលាភីប្រជាប្រិយ” និងមានកៅអីមួយទៅប្រកួត Top ១០ វគ្គផ្ដាច់ព្រ័ត្រដោយស្វ័យប្រវត្តិតែម្ដង។ ចំណែកបេក្ខភាព ៩ នាក់ផ្សេងទៀតត្រូវបានវិនិច្ឆ័យដោយគណៈកម្មការជំនាញ។

សូមបញ្ជាក់ថា ការបោះឆ្នោតចាប់ផ្ដើមដំណើរការពីថ្ងៃទី ១៥ កក្កដា ដល់ ២៨ សីហា ២០១៤។ បេក្ខជនទាំង ៤៤ ប្រទេសត្រូវចូលរួមសកម្មភាពនានារយៈពេល ១ សប្ដាហ៍ក្នុងប្រទេសម៉ាឡេស៊ីដើម្បីស្វែងយល់ពីវប្បធម៌ ប្រជាជន អាហារ និងតំបន់ទេសចរណ៍នានាក្នុងប្រទេសអាស៊ីអាគ្នេយ៍មួយនេះ។ នេះក៏ជាលើកទីមួយដែរដែលប្រទេសក្នុងតំបន់អាស៊ីមានសិទ្ធិរៀបចាំព្រឹត្តិការណ៍ដ៏ធំនេះ។

សូមមើលដំណើរការចូលរួមបោះឆ្នោត៖

Mrs. universe