ល្បិចចាប់ផ្ដើមអាជីវកម្មដំបូងឲ្យជោគជ័យ ពីពាណិជ្ជករខ្មែរ៣រូបមានក្រុមហ៊ុនគគោកក្នុងដៃ

ល្បិចចាប់ផ្ដើមអាជីវកម្មដំបូងឲ្យជោគជ័យ ពីពាណិជ្ជករខ្មែរ៣រូបមានក្រុមហ៊ុនគគោកក្នុងដៃ

9243-startup

ការបង្កើតគម្រោងអាជីវកម្ម ពិតជាចាំណាស់ឬ ក្នុងការចាប់ផ្ដើមអាជីវកម្ម? ចុះក្រៅពីនោះតើមានអ្វីខ្លះទៀត ដែលអ្នកចង់បើកអាជីវកម្មថ្មោងថ្មីគួរតែធ្វើ លៃកុំឲ្យមានហានិភ័យខ្ពស់ពេលដំណើរការ? Sabay សូមនាំមិត្តអ្នកអានទៅស្ដាប់ការចែករំលែករបស់ពាណិជ្ជករឆ្នើមចំនួន៣រូបដូចខាងក្រោម៖

លោក សន សៀប 
អគ្គនាយក KEY real estate ក្រុមហ៊ុនដ៏មានមុខមាត់មួយក្នុងទីផ្សារអចលនទ្រព្យខ្មែរ លើកឡើងថាការបើកអាជីវកម្មឲ្យមានភាគរយច្រើនរួចផុតពីការដួលរលំ ទាល់តែស្វែងយល់ពីទំនោរសង្គម។ លោកពន្យល់៖ «បើចង់រកស៊ី ត្រូវដឹងខ្យល់ទំនោរសង្គម ថាវាបកទៅខាងណា ហើយឆ្ពោះទៅរកជំនាញនោះតែម្ដង។ ត្រូវកំណត់គោលដៅរបស់ខ្លួនឲ្យច្បាស់សិន។ រៀនជំនាញណាក៏ដោយត្រូវទៅធ្វើការឲ្យក្រុមហ៊ុនផ្នែកនោះ ហើយចាប់ផ្ដើមរកស៊ីជំនាញនោះ រហូតដល់មានសមត្ថភាពគ្រប់គ្រាន់ ចាំចូលប្រឡូកក្នុងទីផ្សារ។ ឧទាហរណ៍ថាសស្រឡាញ់ក្រុមហ៊ុនទេសចរណ៍។ អីចឹងកុំអាលបើកភ្លាមអី ត្រូវធ្វើការឲ្យក្រុមហ៊ុនទេសចរណ៍ឲ្យបានច្បាស់លាស់ឲ្យចេះសិន»។

លោក គុយ វ៉ាត់

លោកគុយ វ៉ាត់ កំពុងកាន់កាប់ក្រុមហ៊ុនរហូតដល់៥ក្នុងដៃ ដូចជាក្រុមហ៊ុនអចលនទ្រព្យ Vtrust property ក្រុមហ៊ុនហាងកាហ្វេ Park Cafe ក្រុមហ៊ុនព័ត៌មានវិទ្យា Atech ក្រុមហ៊ុនរោងចក្រកិនថ្ម Kampa និង ក្រុមហ៊ុនស្តុក(ផ្សារភាគហ៊ុន) Phnompenh Security ស្ថិតក្រោមក្រុមហ៊ុនមេ ឈ្មោះVtrust Group។ ក្រៅពីនេះ លោកក៏មានភាគហ៊ុនរួម (Joint Venture) ជាមួយក្រុមហ៊ុនមួយចំនួនទៀតផងដែរ។

ដូច្នេះគ្មានអ្វីទៅឆ្ងល់ទេ ដែលពាណិជ្ជកររូបនេះត្រូវគេចាត់ជាបុគ្គលគ្រប់គ្រងអាជីវកម្មជោគជ័យនោះ។ លោកធ្លាប់រៀបរាប់ពីក្បួនរកស៊ីថា៖ «យុវជនដែលមានគំនិតរកស៊ី ត្រូវស្គាល់ខ្លួនឯងថា ចង់ប្រកបអ្វី? ដូច្នេះ ពេលបញ្ចប់ការសិក្សា សូមជ្រើសរើសយកក្រុមហ៊ុនណាមួយជាគំរូ ដើម្បីចូលធ្វើការ និងរៀនសូត្រពីគេ។ ប៉ុន្តែត្រូវដឹងថា អ្នកដឹកនាំមានកេរ្តិ៍ឈ្មោះដែរ ឬទេ? ឧទាហរណ៍ថា យុវជនម្នាក់ចូលបម្រើការងារក្នុងក្រុមហ៊ុនសំណង់។ ដូច្នេះពេលគេចូលទៅបម្រើការងារ យកបទពិសោធន៍ត្រឹមតែ៥ឆ្នាំ សិនចាំចេញមកបើកអាជីវកម្ម នោះ ភាគរយនៃភាពជោគជ័យអាចមានច្រើនជាងបរាជ័យ»។

កុយ-វ៉ាត-Koy-Vat-1

លោក គួច សុខលី

គ្មាននរណាមិនល្បីទេនៅកម្ពុជានូវហាងអាហារទំនើបៗ ដូចជា BB World, Pizza World ,T&C Coffee , Asian Kitchen, Tour les Jours ជាដើម។ ហាងអស់នេះសុទ្ធតែនៅក្រោមមែកធាងក្រុមហ៊ុន CBM Corporation ដែលមានលោក គួច សុខលី ជានាយកប្រតិបត្តិ រាប់ទាំងហាងបឺហ្គឺរស់ជាតិអាស៊ីល្បីផ្ដាច់មកពីកូរ៉េ Lotteria ទៀត។

ក្នុងបទសម្ភាសជីវិតអាជីវកម្មជោគជ័យរបស់ លោក សុខលី បានចែករំលែកដល់យុវជនចង់បើកអាជីវកម្មថា៖ «អ្វីដែលខ្ញុំមើលឃើញគឺថា មនុស្សភាគច្រើននិយាយថា គ្មានដើមទុនច្រើន មិនអាចរកស៊ីកើតនោះទេ។ ប៉ុន្តែខ្ញុំផ្ទាល់ចាប់ផ្ដើមរកស៊ីជាមួយលុយ៥០០ដុល្លារ ប៉ុណ្ណោះ។

សំខាន់អ្នកត្រូវដឹងសិនថា ធ្វើការឲ្យគេ គឺបានមកវិញនូវប្រាក់ខែ។ ប៉ុន្តែប្រាក់ខែទាំងនោះត្រូវបានកំណត់រួចជាស្រេចដោយ ស្វ័យប្រវត្តិ ។ ចំណែកឯអ្នករកស៊ីវិញគាត់អាចចំណេញ ១ម៉ឺនដុល្លារ ក្នុងមួយខែ ប៉ុន្តែក៏អាចខាតវិញ ១ម៉ឺន ក្នុង១ខែដែរ។ អីចឹងសម្រាប់យុវជនដែលមចង់បង្កើតអាជីវកម្មខ្លួនឯង គួរសួរខ្លួនឯងសិន ថាហ៊ានប្រកួតប្រជែងជាមួយអ្នកដទៃ និងខ្លួនឯងដែរឬអត់? មនុស្សជោគជ័យជាច្រើននៅលើពិភពលោកនេះ ចូលចិត្តអ្វីប្លែកៗពីគេ។ ដំបូងៗ មនុស្សភាគច្រើននិយាយថាពួកគេឆ្កួត ប៉ុន្តែក្រោយមកទើបមនុស្សទទួលស្គាល់ថា ជោគជ័យរបស់ពួកគេ គឺកើតចេញពីការប្រឹងប្រែង ដែលគេគិតមិនដល់។ សរុបមកវិញ ដើម្បីឆ្ពោះទៅរកភាពជោគជ័យត្រូវប្រឹងឲ្យអស់ពីលទ្ធភាព ហើយផ្ដោតទៅលើអ្វីដែល អ្នកចង់ធ្វើ»៕

Sokly