Sunday ធ្វើមេឡូឌីថ្មីមិនឱ្យចាញ់ Town

Sunday ធ្វើមេឡូឌីថ្មីមិនឱ្យចាញ់ Town

ផលិតកម្ម Town ទើបតែអះអាងថា ខ្លួនបានធ្វើមេឡូឌីថ្មីរហូតដល់ ៩០ % ដោយឡែកងាកទៅមើលផលិតកម្ម Sunday ឯណោះវិញក៏មិនចាញ់ Town ប៉ុន្មានដែរ ដោយក្នុងចំណោម ៥ អាល់ប៊ុម Sunday ធ្វើមេឡូឌីថ្មី ២ អាល់ប៊ុម។

ក្នុងបទសម្ភាសន៍ម្សិលមិញនៅវត្តជ្រោយអំពិល នាពិធីថតបទចម្រៀងចូលឆ្នាំប្រពៃណីជាតិអ្នកចាត់ការទូទៅក្នុងផលិតកម្ម Sunday លោក ឡាយ សុកចំរើន ប្រាប់ថា៖ “ឆ្នាំនេះយើងតែងនិពន្ធបទថ្មីច្រើនជាងឆ្នាំមុន គឺក្នុងចំណោម ៥ Vol មាន ២ Vol ធ្វើមេឡូឌីថ្មី”។

លោក ឡាយ សុកចំរើន បានបន្តថា ផលិតកម្មរបស់លោកមានគម្រោងធ្វើបទចម្រៀងថ្មីឱ្យច្រើនជាងនេះ ១០ ដង ប៉ុន្តែដោយសារតែពេលវេលាខ្លីពេកកៀកទៅនឹងបុណ្យចូលឆ្នាំប្រពៃណីជិតមកដល់ទើបផលិតកម្មសម្រេចផលលើការតែនិពន្ធបទថ្មីបានតែជាង ២ Volប៉ុណ្ណោះ។

លោកលើកឡើងទៀតថា ការតាក់តែងបទចម្រៀងថ្មីនេះឆ្លើយតបទៅនឹងការចង់បានរបស់មហាជនខ្មែរទូទៅ ដែលចង់ឃើញ និង ស្ដាប់បទចម្រៀងថ្មីនិពន្ធដោយស្នាដៃកូនខ្មែរ។ ម្យ៉ាងទៀតការធ្វើមេឡូឌីថ្មីនេះក៏ជាការរួមចំណែក ព្រមទាំងឈានទៅរកការកាត់បន្ថយការលួចចម្លងស្នាដៃពីបរទេសដែរ។

ទន្ទឹមនឹងការខិតខំប្រឹងប្រែងតាក់តែងបទចម្រៀងថ្មីបង្កើតដោយស្នាដៃកូនខ្មែរអ្នកចាត់ការទូទៅរូបនេះក៏សំណូមពរឱ្យប្រិយមិត្ត និងមិត្តៗយុវវ័យជួយគាំទ្របទចម្រៀងថ្មីរបស់ផលិតកម្មខ្លួនក្នុងន័យដើម្បីឱ្យផលិតកម្មកាន់តែមានទឹកចិត្តក្នុងការតែងនិពន្ធ។

តាមរយៈការធ្វើមេឡូឌីថ្មីក្នុងអាល់ប៊ុមចម្រៀងចូលឆ្នាំប្រពៃណីជាតិនេះលោក ឡាយ សុកចំរើន បានរំពឹងខ្ពស់ថានឹងទទួលបានការចាប់អារម្មណ៍ និងគាំទ្រច្រើនពីទស្សនិកជន។ អាចទាក់ទាញការគាំទ្រដោយលោកសំអាងទៅលើមានបទចម្រៀងល្អៗរបស់តារាខ្លួនជាច្រើននឹងធ្វើឱ្យប្រិយមិត្តចាប់អារម្មណ៍។

ផលិតកម្ម Sunday ជាផលិតកម្មឈានមុខមួយនៅក្នុងប្រទេសកម្ពុជា ដោយផលិតកម្មមួយនេះមានវត្តមានតារាចម្រៀងស្រី-ប្រុសល្បីៗជាច្រើន ហើយនៅក្នុងអាល់ប៊ុមចូលឆ្នាំប្រពៃណីឆ្នាំនេះ Sunday ផលិតបទចម្រៀង 5vol ដោយមាន 2vol ជាមេឡូឌីថ្មី៕

By: Sabay News

មុន បន្ទាប់

មតិយោបល់