អីយ៉ាស!…នាយ យ៉ាន ងាកមកផលិតកម្មវិធីទុកលក់ឲ្យប៉ុស្តិ៍ទូរទស្សន៍វិញ

អីយ៉ាស!…នាយ យ៉ាន ងាកមកផលិតកម្មវិធីទុកលក់ឲ្យប៉ុស្តិ៍ទូរទស្សន៍វិញ

នាយ យ៉ាន ងាកមកផលិតកម្មវិធី ទុកសម្រាប់លក់ឲ្យស្ថានីយទូរទស្សន៍នានាវិញម្ដង បន្ថែមលើអាជីពជាតារាសម្ដែងលក្ខណៈបណ្ដែតនៅប៉ុស្តិ៍ CTN។

នាយ យ៉ាន និយាយថា “មិនចំពោះតែទូរទស្សន៍ណាទេ ប៉ុន្តែបើ CTN ទទួលយកកម្មវិធីទាំងនោះទៅចាក់ផ្សាយមែននោះ ខ្ញុំសប្បាយចិត្តណាស់ ព្រោះមិនដែលចង់ចេញពីទីនោះម្ដងណាទេ។ តែបើមិនទទួលយកទេ ក៏មិនដឹងធ្វើយ៉ាងម៉េចដែរ”។

បុរសសញ្ជាតិបារាំងខាងលើនេះ បានប្រាប់ថា បច្ចុប្បន្ននាយបានចូលរួមជាមួយតារាកំប្លែងនាយ គ្រលេងគ្រលោង និង ក្រុមការងារមួយចំនួនទៀត ក្នុងដំណើរការផលិត និង សម្ដែងក្នុងកម្មវិធីចំនួន ៣ ដូចជា “ដំណើរសំណើច”, “Wantha & Friend” និង កម្មវិធី “Wantha wacky challenges”។

កម្មវិធីទាំងអស់មិនមែនជាផ្នែកណាមួយរបស់ CTN ទេ និង មិនបានចំណុះឲ្យផលិតកម្មណាមួយឡើយ។ ម្យ៉ាងទៀត នាយ យ៉ាន អះអាងថា នៅមិនទាន់មានអ្នកផលិតកម្មវិធីបែបនោះដែរ ធ្វើឲ្យពូកគេសង្ឃឹម ១០០ ភាគរយ លើភាពជោគជ័យ ស្របពេលដែលមានការផលិតដោយយកចិត្តទុកដាក់ផងដែរ។

បន្ថែមលើនេះ នាយយ៉ាន ក៏ធ្លាប់មានបទពិសោធន៍ផលិតកម្មវិធី នៅទូរទស្សន៍ប៉ុស្តិ៍លេខ ៥ ខ្លះដែរ មុនពេលឈានជើងចូល CTN តាមរយៈ លោកតា វ៉ិចទ័រ។

” ប្រសិនបើទូរទស្សន៍មិនទិញទេ ពូកគេប្រហែលត្រូវស្ដាយក្រោយមិនខាន ព្រោះមិនទាន់មាននរណាបង្កើតវាទេ ពិតជាប្លែកពីគេ ខ្ញុំធានា!”។ នាយ យ៉ាន អះអាងថា នៅមានមធ្យោបាយមួយចំនួនទៀត ដើម្បីផ្សព្វផ្សាយពីស្នាដៃរបស់ពូកគេឲ្យទស្សនិកជនបានស្គាល់ ដូចជា បង្ហោះលើYoutube ជាដើម។

គួររំលឹកថា នាយ យ៉ាន ទើបតែបានបង្ហាញមុខជាថ្មីនៅ CTN ក្រោយពីបានឃ្លាតឆ្ងាយពីទស្សនិកជនជិត ១ ឆ្នាំ កន្លងមកនេះ។ នាយបានថតចប់មួយឈុតហើយ ខណៈរូបគេមានចំណែកថតចំនួនពីរឈុតប៉ុណ្ណោះនៅក្នុងរឿង “ល្បិចស្រីសម័យ Internet”សម្រាប់ចាក់ផ្សាយក្នុងកម្មវិធី”រាត្រីសំណព្វចិត្ត” របស់ស្ថានីយទូរទស្សន៍មួយនេះ។ នាយបានប្រាប់ថា នៅមិនទាន់មានឈុតតម្រូវឲ្យរូបគេសម្ដែងទៀតទេ ហើយត្រូវរង់ចាំសិន ប៉ុន្តែមិនដឹងថា ដល់ពេលណានោះទេ៕

ប្រភព: sabay

មុន បន្ទាប់

មតិយោបល់