ពេជ្រ ថាវរ៉ា បាក់បែកគូដណ្ដឹងប្រកាសឈប់ទៅអាមេរិក

ពេជ្រ ថាវរ៉ា បាក់បែកគូដណ្ដឹងប្រកាសឈប់ទៅអាមេរិក

“ខ្ញុំឈប់ចេញទៅរស់នៅអាមេរិកហើយបង ខ្ញុំលែងនឹកនាទៀតហើយ” នេះជាការបញ្ជាក់ថ្មី និងចុងក្រោយមួយរបស់ តារាសម្ដែង និងដើរម៉ូដ កញ្ញា ពេជ្រ ថាវរ៉ា បន្ទាប់ពីមានព័ត៌មានថា នាងគ្រោងទៅរស់នៅសហរដ្ឋអាមេរិកជាមួយគូដណ្ដឹងក្នុងពេលឆាប់ៗ។ ពេជ្រ ថាវរ៉ា

ចំពោះមូលហេតុនៃការបោះបង់ចោលផែនការនេះ ថាវរ៉ា បានបញ្ចេញឲ្យដឹងថា ព្រោះតែ នាង និងគូដណ្ដឹងដែលស្គាល់គ្នាជិត១ឆ្នាំនោះ បានបែកបាក់គ្នាហើយ។ “ខ្ញុំផ្ដាច់ពាក្យពីគេ ព្រោះតែយូរៗទៅ ក៏អស់ចិត្តនឹងគ្នា ដោយសារមានរឿងរកាំរកូសមួយចំនួន។ ខ្ញុំមើលទៅទំនងមិនអាចរស់នៅជាមួយគ្នាបាន ក៏សម្រេចថាផ្ដាច់ទៅ ហើយខ្ញុំក៏អត់ចូលទូតសម្ភាសន៍អីទៀតដែរ”។

ស្រឡាញ់ខ្លាំង ទើបឈានដល់ “ប្រចណ្ឌ” ហើយបានក្លាយជាដើមហេតុដំបូងបំផុតដែលនាំឲ្យចំណងស្នេហ៍មួយនេះត្រូវបាក់បែក ហើយគម្រោងផ្សេងទៀតត្រូវអាក់ខាន។ ថាវរ៉ា ថ្លែងថា “គាត់ប្រចណ្ឌពេក គាត់ហាមគ្រប់យ៉ាង មិនឲ្យយើងធ្វើនេះ មិនឲ្យធ្វើនោះទាំងគាត់មិនទាន់អាចទទួលខុសត្រូវបានល្អផង យើងជាអ្នកសិល្បៈធ្វើអីចឹងម៉េចបានបង… គាត់ប្រចណ្ឌតាំងពីភ្ជាប់ពាក្យដំបូងម្ល៉េះ ខ្ញុំចេះតែទ្រាំ តែឥឡូវដល់ពេលដែលទ្រាំលែងបានហើយ!”។

តារាដែលទើបឆក់បានតំណែងក្នុងរឿង “សាកលវិទ្យាល័យកំណើតស្នេហ៍” រូបនេះ បានប្រាប់បន្ថែមថា គូដណ្ដឹងរបស់នាង នៅតែព្យាយាមសុំជានានឹងគ្នាវិញទៀត ប៉ុន្តែនាងអត់ព្រម។ ” ខ្ញុំបានសម្រេចចិត្តច្បាស់១០០%ហើយ យើងមិនអាចរស់នៅជាមួយគ្នាបានទេ ខ្ញុំក៏អត់ចង់ទៅណាទៀតដែរ គ្មានអីល្អជាងស្រុកកំណើតយើងទេមែនទេបង នៅទីនេះយើងមានមុខរបរ មានការងារល្មមអាចរស់បានស្រួលហើយ ហើយនៅជិតក្រុមគ្រួសារទៀត អីចឹងអត់ចាំបាច់ទៅទេ”។

តាមគម្រោងកញ្ញា ពេជ្រ ថាវរ៉ា ត្រូវចូលសម្ភាសន៍នៅទូតអាមេរិកតាំងពីចុងខែកក្កដា ២០១៤ ប៉ុន្តែផ្អែកលើការសម្រេចចិត្តខាងលើ កញ្ញាបានគេចមិនទៅម្ដងជាពីរដង។ “ខ្ញុំត្រូវចូលសម្ភាសន៍លើកទីនៅថ្ងៃទី ២៨ ខែកក្កដា តែខ្ញុំអត់ទៅ ក្រោយមកគេទូរសព្ទហៅឲ្យទៅសម្ភាសន៍នៅថ្ងៃទី០៤ ខែសីហានេះទៀត ខ្ញុំក៏អត់ទៅ ព្រោះខ្ញុំសម្រេចចិត្តច្បាស់ហើយ”។

ពេជ្រ ថាវរ៉ា

កញ្ញា ពេជ្រ ថាវរ៉ា និងគូដណ្ដឹងដែលជាអាណិកជនខ្មែររស់នៅអាមេរិក ដំបូងឡើយបានស្គាល់គ្នាតាមរយៈការណែនាំពីបងប្អូនក្រុមគ្រួសារ ហើយក្រោយមកនៅថ្ងៃទី ២៥ ខែសីហា ២០១៣ ពួកនាង ក៏បានភ្ជាប់ពាក្យនឹងគ្នា។

ក្រោយប្រកាសបែកបាក់គូដណ្ដឹងនាពេលនេះ កញ្ញា ថាវរ៉ា បញ្ជាក់ថានាងនឹងផ្ដោតលើការងារសិល្បៈ ក្រោយទើបទទួលបានកុងត្រាសម្ដែងក្នុងរឿង “សាកលវិទ្យាល័យកំណើតស្នេហ៍” របស់ផលិតកម្ម Rock។ ក្រៅពីនេះ នាងមានហាងសំលៀកបំពាក់មួយស្ថិតក្នុងផ្សារទំនើបស្ទឹងមានជ័យ ព្រមទាំងគ្រោងពង្រីកអាជីពមួយផ្សេងទៀតក្នុងពេលឆាប់ៗ”៕

ប្រភព:sabay

មុន បន្ទាប់

មតិយោបល់