រឿង ​”ស្បែក​គង់” ចំណាយ​ទុន ៦៨ ​ម៉ឺន​ដុល្លារ​ មិន​ទាន់​ចរាចរ​លើ​ទីផ្សារ​ស្រួលបួល​ផង​ផលិតកម្ម Angkor Picture ប្រកាស​ផលិត​ខ្សែ​ភាពយន្ត​ខ្មែរ​​​ឯតទគ្គកម្ម​ថ្មី​ទី ​២​ ទៀត​ ចាយ​ទុន​រហូត​ដល់​ ៧៥​ ម៉ឺន​ ដុល្លារ។

ខ្សែ​ភាពយន្ត​ខ្មែរ​កម្រិត​ស្តង់ដារ​ប្រើ​ដើម​ទុន​ជិត​១​លាន​ដុល្លារ​នេះ​​ជា​ខ្សែ​ភាពយន្ត​បែប​កំប្លែង​មាន​ចំណង​ជើង​ថា “ព្រានព្រៃ​ឡឺ​កឺ” ត្រៀម​នឹង​ថត​ក្នុង​ឆ្នាំ​ ២០១៥។

ផលិតករ និង​ ជា​ចាងហ្វាង​ផលិតកម្ម​ Angkor Picture លោក ប៉ុល វិបូ ហៅ​ នីត និយាយ​ថា៖ “យើង​ត្រៀម​រួចរាល់​ហើយ​សម្រាប់​ខ្សែ​ភាពយន្ត​ទី ២ ​គឺ ទុន ៧៥​ ម៉ឺន​ដុល្លារ ដោយ​មិន​ទាន់​​រាប់​បញ្ចូល​ការ​ធ្វើ​​ Marketing និង​ sale នៅ​ក្រៅ​ប្រទេស​ទេ អីចឹង​ទុន​អាច​លើស​ពី​នេះ​ទៀត”។

តារា​កំប្លែង និង​ តារា​សម្ដែង​ត្រូវ​ថត​ខ្សែ​ភាពយន្ត​ទី ​២​ នេះ​មិន​ទាន់​ត្រូវ​បាន​ចាងហ្វាង​ផលិតកម្ម​ខាង​លើ​បង្ហើប​ឱ្យ​ដឹង​នៅ​ឡើយ​ទេ ដោយ​លោក​អះអាង​ថា ​កំពុង​តែ​សម្រិតសម្រាំង និង​ យក​ហ្វឹកហ្វឺន​បន្ថែម​ទៀត​មុន​ជ្រើសរើស​​ឱ្យ​សម្ដែង។

​​ផលិតករ​មាន​បទ​ពិសោធន៍​ដឹក​នាំ និង ​គ្រប់គ្រង​ជាង ​១០ ​ឆ្នាំ​រូប​នេះ​ បន្ត​ថា​ កម្រិត Camera ​រូប​ភាព​ក្នុង​ខ្សែ​ទី២ មិន​ដូច​ខ្សែ​ភាពយន្តទី១​មាន​ 4.5k នោះ​ទេ គឺ​មាន​រហូត​ដល់​ 6k ឯណោះ។

នៅ​ពេល​ចោទ​សួរ​ថា​តើ Angkor Picture មាន​ទុន​មក​ពី​ណា​ខ្ទង់​ម៉ឺន​ សែន​ដុល្លារ​ដើម្បី​ផលិត​ខ្សែ​ភាពយន្ត។ អតីត​អ្នក​គ្រប់គ្រង​ស្ថានីយ​ទូរទស្សន៍ CTN​ បញ្ជាក់​ថា៖ “គ្មាន​នរណា​ម្នាក់​ហ៊ាន​វិនិយោគ​លុយ​រាប់​សែន​ដុល្លារ​ដូច្នេះ​ដោយ​ឯកឯង​បាន​ទេ។ យើង​ត្រូវ​រក​ដៃ​គូ​វិនិយោគ​រួម​មួយ​ដោយ​រំពឹង​រក​ចំណូល​បាន​មក​វិញ”។

បើ​ទោះ​ជា​រឿង​”ស្បែក​គង់” ដាក់​បញ្ចាំង​លើ​ទីផ្សារ​ជាតិ និង​អន្តរជាតិ​នា​ពេល​ខាង​មុខ​មិន​ទទួល​បាន​ចំណូល​គាប់​ចិត្ត​តាម​ការ​គ្រោង​ទុក​ក៏​ដោយ​លោក ប៉ុល វិបូ អះអាង​ថា ​ដំណើរការណ៍​ផលិត​រឿង​ទី២ “ព្រាន​ព្រៃ​ឡឺកឺ” នៅ​តែ​ដំណើរការដដែល​ក្នុង​ឆ្នាំ ​២០១៥ ​ខាង​មុខ។

លោក ប៉ុល វិបូ ជឿជាក់​ខ្ពស់​ថា​ នឹង​ទទួល​បាន​ជោគជ័យ​ពេល​ខ្សែ​ភាពយន្ត​ស្នាដៃ​ទី ២ ​របស់​ផលិតកម្ម​ខ្លួន​បង្ហាញ​វត្តមាន​ទាំង​ទីផ្សារ​ជាតិ និង​អន្តរជាតិ។

ផលិតកម្ម Angkor Picture បាន​ដាក់​គោល​ដៅ​ប្រទេស ១១ ​លើ​ពិភពលោក​ក្នុង​ការ​នាំ​ខ្សែ​ភាពយន្ត​ខ្មែរ​ខ្នាត​ធំ​យក​ទៅ​ដាក់​បញ្ចាំងក៏ប៉ុន្តែ​ផលិតករ​ខាង​លើ​មិន​ទាន់​បង្ហើប​ឱ្យ​ដឹង​ពី​ប្រទេស​ណា​ខ្លះ​នៅ​ឡើយ​ទេ។ លោក​ថា​ កំពុង​តែ​ចរចា​​ជា​មួយ​ប្រទេស​ជា​ច្រើន ហើយ​ប្រទេស​ខ្លះ​បាន​យល់​ព្រម​ឱ្យ​ខ្សែ​ភាពយន្ត​ខ្មែរ​ចូល​ទីផ្សារ​របស់​ពួកគេ។

លោក ប៉ុល វិបូ ចាងហ្វាង​ផលិតកម្ម Angkor Picture

ទឹក​ប្រាក់ ៧៥ ​ម៉ឺន​ដុល្លារ​ក្នុង​ការ​ផលិត​ខ្សែ​ភាពយន្ត​​ជា ឯតទគ្គកម្ម​ថ្មី​មួយ​ទៀត​សម្រាប់​វិស័យ​ភាពយន្ត​ខ្មែរ។ ចាងហ្វាង​ផលិតកម្ម​លោក ប៉ុល វិបូ និយាយ​ថា៖”គោល​ដៅ​របស់​ Angkor Picture យើង​​គឺ​​ផលិត​ខ្សែ​ភាពយន្ត​មាន​គុណភាព​ខ្ពស់ ហើយ​ចង់​ប្រថុយប្រថាន​ជំនួយ​ផលិតករ​ដទៃ​ទៀត​ក្នុង​ការ​ពង្រីក​ដែន​អាជីវកម្ម​កុន​ខ្មែរ​នៅ​ក្រៅ​ប្រទេស ឱ្យ​ខុស​ប្លែក​ពី​មុន​ដោយ​យើង​ធ្វើ​ឱ្យ​តែ​បានៗ​​សម្រាប់​ទីផ្សារ​ក្នុង​ស្រុក”៕

ប្រភព:sabay