រ៉ូមែនទិកពេក ដុតទៀនរង់ចាំសង្សារក្នុងបន្ទប់ជួល ទីបំផុតឆេះផ្ទះខាននៅ

រ៉ូមែនទិកពេក ដុតទៀនរង់ចាំសង្សារក្នុងបន្ទប់ជួល ទីបំផុតឆេះផ្ទះខាននៅ

ដោយសារតែចង់ឲ្យមិត្តស្រីរបស់ខ្លួនភ្ញាក់ផ្អើល បុរសនៅប្រទេសអង់គ្លេសម្នាក់បានរៀបចំដុតភ្លើងទៀន អមដោយបាច់ផ្កា និងស្រាមួយដបនៅក្នុងបន្ទប់របស់ខ្លួនយ៉ាងរ៉ូមែនទិក។ ប៉ុន្តែអ្វីៗមិនដូចការរៀបចំរបស់បុរសនោះឡើយ ដោយសារតែភ្លើងទៀនដែលដុតនោះ បានបង្កជាអគ្គិភ័យឆេះខ្លោចបន្ទប់ដ៏ស្រស់ស្អាតនោះ។

ទិដ្ឋភាពក្នុងបន្ទប់មុនពេលឆេះ

ទិដ្ឋភាពក្រោយពេលឆេះ

បុរសដែលមានឈ្មោះថា Amanj Issen នោះ បានប្រើទៀនជាច្រើនដើមដើម្បីផ្គុំចេញជាឈ្មោះសង្សារ Jana Stankeviciute និងរូបបេះដូង ដើម្បីស្វាគមន៍ការវិលត្រលប់ពីក្រៅប្រទេសរបស់នាង។

នៅពេលកំពុងរង់ចាំខាងមុខផ្ទះ ស្រាប់តែ Issen បានឮសំឡេងផ្ទុះដ៏ខ្លាំង។ ភ្លាមៗនោះ បុរសវ័យ២៩ឆ្នាំ បានរត់ទៅមើលបន្ទប់នៅជាន់លើ ប៉ុន្តែអណ្ដាតភ្លើង និងផ្សែង បានគ្របដណ្ដប់ពេញផ្ទៃបន្ទប់បាត់ទៅហើយ។

បុរសជាជាងសំណង់ខាងលើ បាននិយាយថា៖ “ខ្ញុំគ្រាន់តែចង់ឲ្យ Jana ភ្ញាក់ផ្អើល ដោយសារតែខ្ញុំខានឃើញមុខនាងយូរមកហើយ”។

យ៉ាងណាក្ដី មិត្តស្រីដែលមានអាយុ២៤ឆ្នាំរបស់ Issen នៅតែបង្ហាញអារម្មណ៍រំភើបភ្ញាក់ផ្អើលដដែល នៅពេលដែលមិត្តប្រុសរបស់ខ្លួនបង្ហាញរួមថតនៅមុនពេលភ្លើងឆេះ។

ក្រោយហេតុការណ៍ដែលកើតឡើងកាលពីថ្ងៃសៅរ៍នោះ គូស្នេហ៍មូយគូនេះកំពុងស្វែងរកកន្លែងស្នាក់នៅថ្មី ដោយសារបន្ទប់ចាស់ដែលពួកគេបានជួលនៅរយៈពេល១៥ខែនោះ ត្រូវភ្លើងឆេះ មិនអាចរស់នៅទៀតបាន៕