“សាកលវិទ្យាល័យកំណើតស្នេហ៍” សម្ដែងដោយតារាវ័យក្មេងស្អាតៗក្រុងពាលីព្រឹកមិញ

“សាកលវិទ្យាល័យកំណើតស្នេហ៍” សម្ដែងដោយតារាវ័យក្មេងស្អាតៗក្រុងពាលីព្រឹកមិញ

ទាំងតួសម្ដែង និងផលិតករសុទ្ធតែបានដាក់ចេញនូវក្ដីសង្ឃឹមជាវិជ្ជមានមួយចំពោះភាពជោគជ័យនៃរឿង “សាកលវិទ្យាល័យកំណើតស្នេហ៍” ដែលប្រមូលផ្ដុំដោយតារាសម្ដែងវ័យក្មេងមានសម្ផស្សស្រស់ស្អាតជាច្រើន។

Krong Peali Sabay

លោក ឡេង សុវណ្ណារ៉ា ក្នុងពិធីក្រុងពាលីរឿង “សាកលវិទ្យាល័យកំណើតស្នេហ៍”(រូបថតផ្ដល់ដោយផលិតករ)

ក្រោមការផលិតរបស់ផលិតកម្ម Rock លោក ឡេង សុវណ្ណារ៉ា ដែលចូលរួមសហការផលិត អះអាងថា “រឿងយើង គឺផ្ដោតខ្លាំងទៅលើយុវវ័យបែបទំនើប ផ្ដើមចេញពីរឿងរ៉ាវស្នេហារបស់ពួកគេ នេះជាហេតុផលវិជ្ជមាន និងសំខាន់មួយ”។ យ៉ាងណា លោក បញ្ជាក់ថា ការសម្រិតសម្រាំងលើគុណ និងការប្រើឧបករណ៍ទំនើប ក៏ជាផ្នែកមួយដែរ។

“ដូចខ្ញុំប្រាប់ពីខាងលើ រឿងយើង គឺយុវវ័យបែបទំនើប អីចឹងឧបករណ៍ដែលប្រើក្នុងរឿងសុទ្ធតែទំនើប ហើយឧបករណ៍ប្រើសម្រាប់ថត ក៏សុទ្ធតែទំនើបៗ ដូចជាកាមេរ៉ាអីសុទ្ធតែ 4K និយាយរួមទៅអ្វីៗ ដើម្បីគុណភាពទាំងអស់!”។

សាកលវិទ្យាល័យកំណើតស្នេហ៍

(ពីឆ្វេង)លោក មង្គល លោក វៃហាំង កញ្ញា ពិសី កញ្ញា ចាន់ដារ៉ា កញ្ញា វត្តី និងលោក ជីវ័ន្ត

លោក សេង មង្គល តារាសម្ដែង ពិធីករ និងជាតារាម៉ូដែលផងនោះ គឺជាតួឯកប្រុសនៃភាពយន្តមាន ៥០ភាគនេះ។ លោក ដើរជាតួអង្គឈ្មោះ “រ៉ាក់យុទ្ធ” ដែលមានចរិតឆ្មើង ចចេសរឹងរូស តែម៉ត់ចត់។ មង្គល លើកឡើងថា “ខ្ញុំរួមទាំងតួសម្ដែងទាំងអស់ គឺស្នើឲ្យប្រិយមិត្ត ពិសេសមិត្តៗយុវវ័យចូលរួមគាំទ្ររឿងនេះ ព្រោះយើងធ្វើអ្វីៗទាំងអស់ គឺដើម្បីយុវវ័យ!”។

កញ្ញា រូ ចាន់ដារ៉ា តួឯកស្រីឈ្មោះ ស្រីពេជ្រ ក៏សង្ឃឹមថារឿងនេះ នឹងចាក់ដល់បេះដូងមិត្តៗយុវវ័យដែរ ហើយថា កញ្ញា នឹងប្រឹងប្រែងឲ្យអស់ពីសមត្ថភាព ព្រោះថា “សាកលវិទ្យាល័យកំណើតស្នេហ៍” គឺការបើកទំព័រនៃការសម្ដែងក្នុងភាពយន្តលើកទី១ផងរបស់កញ្ញា។

មិនត្រឹមតែជាបទពិសោធន៍ដំបូងរបស់តួឯកស្រីទេ ប៉ុន្តែ “សាកលវិទ្យាល័យកំណើតស្នេហ៍” ក៏ជាភាពយន្តដំបូងរបស់ក្រុមការងាររបស់លោក ឡេង សុវណ្ណារ៉ា និងលោក ជិន រិទ្ធី ក្រោមការសហការផលិតជាមួយផលិតកម្ម Rock ដែរ។ សមិទ្ធផលដំបូងនេះ បាននាំឲ្យ លោក ជិន រិទ្ធី តំណាងក្រុមការងារ បានកោតសរសើរចំពោះផលិតកម្ម Rock។

លោក វី ជីវ័ន្ត និងកញ្ញា ពេជ្រ ថាវរ៉ា

” ខ្ញុំឃើញថា ក្រោមការដឹកនាំរបស់លោកឧកញ៉ា គិត ធាង ផលិតកម្ម Rock ក្នុងរង្វង់ជាង៣ខែនេះ បានផលិតភាពយន្តខ្ទង់ជាង២០រឿងហើយ។នេះបើតាមការកត់សម្គាល់របស់ខ្ញុំ ហើយក្នុងនាមជាអ្នកពាក់ព័ន្ធម្នាក់នឹងវិស័យនេះ ខ្ញុំរីករាយមែនទែន បើនៅតែអីចឹង ភាពយន្តខ្មែរយើងនឹងរីកចម្រើនលឿនមិនខាន!”។

“សាកលវិទ្យាល័យកំណើត” បើកបង្ហាញពីអនុភាពនៃសេចក្ដីស្រឡាញ់ ដែលអាចផ្លាស់ប្ដូរមនុស្សបាន គឺផ្លាស់ប្តូរតួឯកប្រុស មួយផ្នែក គឺឆ្លុះបញ្ចាំងពីភាពសំខាន់នៃការសិក្សាផង។ រឿងនេះ មានឈុតឆាកកាច់កុងគ្នាជាច្រើន។ នេះបើតាមលោក ជិន រិទ្ធី បានបញ្ជាក់ប្រាប់។ ក្រោយថតចប់ “សាកលវិទ្យាល័យកំណើតស្នេហ៍” នឹងយកទៅចាក់បញ្ចាំងនៅលើកញ្ចក់ទូរទស្សន៍ CTN ។

រឿងនេះ ចូលរួមសម្ដែងដោយលោក សេង មង្គល កញ្ញា រូ ចាន់ដារ៉ា លោក ខាត់ វៃហាំង និងកញ្ញា សុខ មុន្នីពិសី ជាដើម ដែលសុទ្ធជាយុវវ័យមានសម្ផស្សស្រស់ស្អាត៕

សាកលវិទ្យាល័យកំណើតស្នេហ៍