អតីតតារាភាពយន្តខ្មែរ លោក ខៃ ប្រសិទ្ធ សាងសង់អណ្តូងទឹកស្អាត ជូនអ្នកសៀមរាប

អតីតតារាភាពយន្តខ្មែរ លោក ខៃ ប្រសិទ្ធ សាងសង់អណ្តូងទឹកស្អាត ជូនអ្នកសៀមរាប

ភ្នំពេញ: អតីតតារាភាពយន្តខ្មែរដ៏ល្បីល្បាញនៅក្នុងអំឡុងទសវត្សទី៨០ និង៩០ លោក ខៃ ប្រសិទ្ធ បានផ្តល់ថវិកាផ្ទាល់ខ្លួនមួយចំនួន ក្នុងការចូលរួមសាងសង់អណ្តូងទឹកស្អាតមួយកន្លែង នៅក្នុងបរិវេណសាលាបឋមសិក្សាប្រាដាក ដែលមានទីតាំងនៅក្នុងស្រុកបន្ទាយស្រី ខេត្តសៀមរាប ដើម្បីជួយសម្រួលដល់ការលំបាករបស់ប្រជាជន និងសិស្សានុសិស្សក្រីក្រជាច្រើន ដែលកំពុងមានតម្រូវការទឹកស្អាតសម្រាប់ប្រើប្រាស់ជាចាំបាច់ ។
ថវិការឧបត្ថម្ភរបស់តារាភាពយន្តថ្ពាល់ខួចរូបនេះ ត្រូវបានផ្តល់តាមរយៈគម្រោងសប្បុរសធម៌ “សាវិនកម្ពុជា” ដើម្បីជួយកុមារ និងជនពិការ។
ម្ចាស់គម្រោងបានអោយដឹងថា អណ្តូងទឹកស្អាត ដែលជាការឧបត្ថម្ភរបស់អតីតតារាភាពយន្តល្បីឈ្មោះលោក ខៃ ប្រសិទ្ធ ត្រូវបានធ្វើការសាងសង់សម្រេចជាស្ថាពរហើយនៅក្នុងមូលដ្ឋានខាងលើ។
ម្ចាស់គម្រោងអះអាងថា អណ្តូងទឹកស្អាតមួយនេះមិនមានការបែកចែកអ្វីនោះទេ ពោលគឺលោកគ្រូអ្នកគ្រូ និងសិស្សានុសិស្ស ក៏ដូចជាប្រជាពលរដ្ឋដែលរស់នៅក្បែរទីតាំងនេះ សុទ្ធសឹងតែអាចទាញផលប្រយោជន៍ពីអណ្តូងទឹកស្អាតបានដូចៗគ្នា។
ម្ចាស់គម្រោងដដែល បានធ្វើការបញ្ជាក់ថា បច្ចុប្បន្នមានសិស្សានុសិស្សជាច្រើននាក់ បាន និងកំពុងមានតម្រូវការទឹកស្អាតសម្រាប់ប្រើប្រាស់។ ដូច្នេះកាយវិការសប្បុរសធម៌របស់លោក ខៃ ប្រសិទ្ធ នៅពេលនេះចាត់ទុកជាការឆ្លើយតបដ៏ត្រឹមត្រូវបំផុត។
សូមបញ្ជាក់ថា អតីតតារាភាពយន្តរូបសង្ហា ដែលធ្លាប់មានឈ្មោះបោះសំឡេងមួយរូប ក្នុងប្រទេសកម្ពុជាកាលពីអំឡុងទសវត្សឆ្នាំ៩០ លោក ខៃ ប្រសិទ្ធ បានចាកចេញពីទឹកដីកំណើតទៅរស់នៅប្រទេសអូស្ត្រាលី អស់រយៈពេលជាង ១០ ឆ្នាំមកហើយ។ ក្នុងការផ្ញើរប្រាណលើទឹកដីស៊ីវីល័យមួយនេះ លោកបានបញ្ចប់អាជីពសិល្បៈទាំងស្រុងហើយ គឺលោកធ្វើការនៅក្នុងក្រុមហ៊ុនអគ្គីសនីមួយនៅទីនោះ។
លោកធ្លាប់ធ្វើដំណើរមកលេងស្រុកកាលពីឆ្នាំ២០០៨ ម្តង ដើម្បីលក់ផ្ទះ ហើយនៅឆ្នាំ២០១៣ ត្រឡប់មកម្តងទៀត ដើម្បីចូលរួមជាភ្ញៀវកិត្តិយសក្នុងពិធីមង្គលការកូនរបស់តារាកំប្លែងជើងចាស់នាយ ត្រដក់ និងអ្នកនាង ជុំ រស្មី ហៅ ស្រីទូច តែមិនបានបង្ហាញវត្តមានយូរនោះទេ។
លោក ខៃ ប្រសិទ្ធ ជាស្វាមីរបស់តួកុន និងជានាថការិនី ពិសិទ្ធ ពិលិការ ដែលត្រូវគេបាញ់សម្លាប់ នៅឆ្នាំ១៩៩៩ ជារឿយៗ នៅពេលដែលលោកត្រឡប់មកលេងស្រុកកំណើតម្តងៗ តែងតែមានការលាក់បាំង មិនចង់អោយគេដឹងពីដំណើររបស់លោកឡើយ៕ ប្រភព ៖ CEN