ជាផ្លែឈើដុះក្នុងព្រៃសោះ ហេតុអ្វីបានជាគុយ ថ្លៃដល់ម្លឹង? (មានវីដេអូ)

ជាផ្លែឈើដុះក្នុងព្រៃសោះ ហេតុអ្វីបានជាគុយ ថ្លៃដល់ម្លឹង? (មានវីដេអូ)

ភ្នំពេញ៖ ផ្លែគុយគឺជាប្រភេទផ្លែឈើព្រៃមួយប្រភេទដែលភាគច្រើនដុះ នៅតាមព្រៃភ្នំជ្រៅៗ។ ហើយផ្លែឈើប្រភេទនេះ មានដើមជាវល្លិ មានស្លឹកតូចៗ ដុះវារឡើង តាមដើមឈើខ្ពស់ៗ ចំណែកឯរសជាតិផ្លែគុយវិញ គឺមានរសជាតិជូរផ្អែម ដែលអាចយកមកទទួលទានបាន។

លោក គឹម ហេង ជាអ្នកលក់ផ្លែគុយម្នាក់ដែលរូបលោកនិងភិរិយា ចាប់ផ្តើមរបរលក់ផ្លែគុយនេះអស់រយៈពេលជិត២០មកហើយនោះ បានឲ្យដឹងថា ផ្លែឈើប្រភេទនេះគឺ លោកនាំចូលយកមកពីតាមបណ្តាខេត្តមួយចំនួន ដូចជាខេត្តកំពង់ធំ កំពង់ឆ្នាំង និង សៀមរាបជាដើម។

រីឯចំពោះ ការទទួលផលរបស់ផ្លែគុយវិញ ក្នុងរយៈពេល១ឆ្នាំផ្លែឈើប្រភេទនេះ អាចទទួលផលបានតែម្តងតែប៉ុណ្ណោះ គឺចាប់ពីអំឡុងខែកុម្ភៈ រហូតដល់ចុងខែមេសា។បើនិយាយពីតម្លៃរបស់ផ្លែគុយវិញ ក៏ហាក់ដូចជាមានតម្លៃថ្លៃ ដែលក្នុងមួយគីឡូ អាចមានតម្លៃចាប់ពី៤០,០០០រៀល រហូតដល់៥០,០០០ រៀលផងដែរ។

ជាមួយគ្នានេះ លោក គឹម ហេង ក៏បានបញ្ជាក់បន្ថែមទៀតផងដែរថា មូលហេតុដែលធ្វើឲ្យផ្លែគុយនេះ មានតម្លៃថ្លៃក៏ព្រោះតែវា ជាប្រភេទផ្លែឈើព្រៃពិបាករកដែលភាគច្រើនដុះនៅតាមព្រៃភ្នំជ្រៅៗ។ ជាពិសេស គុយមិនសម្បូរដូចផ្លែផ្សេងៗ ដែលមានរាល់ខែទេ គឺភាគច្រើន មានតែខែ៣ឬ៤តែប៉ុណ្ណោះ ប៉ុន្តែឆ្នាំនេះ មានតាំងពីខែកុម្ភៈ ហើយពេលមានទៀតសោត ក៏មានតិចតួចផងដែរ។ ការដែលយកមកថ្លៃ មិនមែនចង់កោរទេ គឺទី១ពិបាករក ហើយទី២ បើជួលគេរក ឬឈ្មួញកណ្តាល ហើយយកមកលក់ត ក៏គេគិតថ្លៃ ទើបការលក់តម្លៃនេះ អាចទប់ទល់នឹងការចំណាយបន្តិចបន្តួច។

ជាទូទៅផ្លែគុយ ប្រសិនបើនៅស្រស់គេទទួលទាន តែគ្រាប់ខាងក្នុងរបស់វាតែប៉ុណ្ណោះដោយសារតែសំបកខាងក្រៅ នៅពេលដែល ហែកចេញមកវានឹង មានជាតិជ័រ ដែលជាហេតុដែលនាំឲ្យពិបាកក្នុងការទទួលទាន ឬក៏បើសិនជាមិនចង់ចោល សំបកខាងក្រៅរបស់វាទេនោះ យើងអាចយកវាទៅហាលថ្ងៃឲ្យស្ងួត ហើយយកទៅប្រឡាក់បន្ថែមជាមួយអំបិលម្ទេស នោះយើងអាចទទួលទានបានទាំងអស់ ដោយមិនចាំបាច់ចោលសំបក ខាងក្រៅរបស់វានោះទេ។ លើសពីនេះផ្លែគុយមិនត្រឹមតែអាចយកមកទទួលទានបាននោះទេ តែវាក៏អាចជាឳសថសម្រាប់ជួយដល់ អ្នកដែលមានជំងឺក្រពះ ដ៏មានប្រសិទ្ធភាពផងដែរ៕