ពាក្យរិះគន់ដែលគ្រប់ដណ្ដប់ក្រោយការប្រលងបាក់ឌុប ពេលនេះដូចជាស្ងាត់

ពាក្យរិះគន់ដែលគ្រប់ដណ្ដប់ក្រោយការប្រលងបាក់ឌុប ពេលនេះដូចជាស្ងាត់

ដំណើរការសំណេរសម្រាប់ការប្រលងសញ្ញាបត្រមធ្យមសិក្សាទុតិយភូមិ (បាក់ឌុប) បានបិទបញ្ចប់ជាស្ថាពរហើយនៅថ្ងៃនេះ ជាមួយនឹងពាក្យគាំទ្ររាល់សកម្មភាពទាំងឡាយក្នុងរយៈពេលពីរថ្ងៃមកនេះ ពីអង្គការសង្គមស៊ីវិល ឪពុកម្ដាយ និងអាណាព្យាបាល ច្រើនជាងពាក្យរិះគន់ ដែលតែងតែគ្របដណ្ដប់នៅក្រោយចប់ការប្រលងម្ដងៗ។

លោក រ៉ុង ឈុន ប្រធានសមាគមគ្រូបង្រៀនកម្ពុជាឯករាជ្យ បានចាត់ទុកការប្រលងឆ្នាំនេះមានភាពល្អប្រសើរ បើប្រៀបធៀបនឹងឆ្នាំមុន។ ក្នុងនោះមានការលុបបំបាត់ការរ៉ៃលុយឲ្យគ្រូ ការយកសំណៅឯកសារ និងឧបករណ៍អេឡិចត្រូនិចចូលបន្ទប់ប្រលងជាដើម។ ប៉ុន្តែទន្ទឹមគ្នានោះភាពមិនប្រក្រតីមួយចំនួនក៏កើតមានឡើងដែរ ដូចជាមន្ត្រីអង្គភាពប្រឆាំងអំពើពុករលួយបានអនុវត្តតួនាទីខ្លួនហួសដែនសមត្ថកិច្ច ការមើលគ្នា ក្នុងពេលប្រលង ការរកឃើញបេក្ខជនប្រលងជំនួស និងការវាយអ្នកសង្កេតការមកពីអង្គភាពប្រឆាំងអំពើពុករលួយ។

BackII 2014 (1)

លោកបានបន្ថែមទៀតថា សមាគមកំពុងធ្វើការស៊ើបអង្កេត លើមុខវិជ្ជាគីមីវិទ្យា និងប្រវត្តិវិទ្យា ដែលមានការអះអាងពីប្រភពខ្លះថា បែកធ្លាយ។ “សមាគមកំពុងធ្វើការផ្ទៀងផ្ទាត់លើមុខវិជ្ជា ដែលសង្ស័យថាបែកធ្លាយ។ ហើយប្រសិនបើរកឃើញបែកមែន យើងនឹងធ្វើសំណើទៅក្រសួងអប់រំ”។

ទន្ទឹមគ្នានេះដែរ លោក សន ជ័យ មន្ត្រីសម្របសម្រួលបណ្ដាញរួបរួម ដើម្បីគណនេយ្យភាពសង្គម ប្រចាំអាស៊ីបូព៌ា ក៏បានមើលឃើញពីភាពល្អប្រសើរជាងឆ្នាំមុនផងដែរ បើទោះជាភាពអសកម្មតិចតួចបានកើតឡើងអំឡុងពេលប្រលងខ្លះៗក្ដី។ ប៉ុន្តែលោក សន ជ័យ បានសម្ដែងការព្រួយបារម្ភពីភាពមិនប្រក្រតីអាចកើតមានឡើង ក្នុងអំឡុងការធ្វើកំណែវិញ្ញាសា និងការបូកពិន្ទុ ខណៈដំណើរទាំងនេះអាចគ្មានអ្នកសង្កេតការចូលរួមច្រើន។ “បើសិនជាករណីនេះអាចកើតមានឡើងមែននោះ វានឹងធ្វើឲ្យការប្រឹងប្រែងពីរថ្ងៃកន្លងមកនេះ ទទួលបរាជ័យ។ដូច្នេះការត្រួតពិនិត្យជាក់លាក់មួយត្រូវតែអនុវត្តឲ្យមានប្រសិទ្ធភាព”។

BackII 2014 (2)

លោក រស់ សាលី អ្នកនាំពាក្យក្រសួងអប់រំយុវជន និងកីឡាបានប្រាប់ Sabay នៅមុននេះថា ដំណើរការប្រលង ទាំងបេក្ខជន និងមន្ត្រីអប់រំ បានអនុវត្តតាមបទបញ្ជាយ៉ាងល្អប្រសើរ ទាំងផ្នែកបច្ចេកទេស និងផ្នែករដ្ឋបាល។ លោកថា ភាពជោគជ័យទាំងនេះទទួលបានការស្វាគមន៍ពីអង្គការសង្គមស៊ីវិល ឪពុកម្តាយ និងអាណាព្យាបាលសិស្សយ៉ាងច្រើនកុះករ។

បើតាមលោក រស់ សាលីន ជាបឋមមានបេក្ខជនចំនួន៤នាក់ត្រូវបានឃាត់ខ្លួន ក្នុងខេត្តចំនួនពីរ មានខេត្តស្វាយរៀង ពីរនាក់និងខេត្តកណ្តាលចំនួនពីរនាក់ ទាក់ទងនឹងការបន្លំខ្លួនប្រលងជំនួស។ ចំណែកម្នាក់ទៀតក៏ត្រូវបានសមត្ថកិច្ចចាប់ខ្លួនដែរ ពាក់ព័ន្ធនឹងការវាយតប់ទៅលើអ្នកសង្កេតការមកពីអង្គភាពប្រឆាំងអំពើពុករលួយ។

ឆ្លើយតបទៅនឹងការព្រួយបារម្ភ របស់មន្ត្រីអង្គការសង្គមស៊ីវិលទាក់ទងនឹងដំណើរការនៃការកែ និងដាក់ពិន្ទុ ដែលអាចមានការប្រព្រឹត្តិអំពើពុករលួយ ត្រូវបានលោក រស់ សាលីន បញ្ជាក់ថា នឹងមិនអាចកើតមានឡើងបានឡើយ ព្រោះក្នុងដំណើរនេះក៏មានមន្រ្តីមកពីអង្គភាពប្រឆាំងអំពើពុករលួយតាមដានផងដែរ។ ម្យ៉ាងក្រសួងអប់រំបានជ្រើសរើសសាស្ត្រាចារ្យ ដែលមានក្រមសីលធម៌ និងវិជ្ជាជីវៈខ្ពស់ចូលរួមក្នុងដំណើរការខាងលើនេះ ខណៈគ្រូមកធ្វើកំណែលើវិញ្ញាសាជាមនុស្សផេ្សងគ្នា ព្រមទាំងគ្រប់សន្លឹកកិច្ចការសិស្សត្រូវបានកាត់ក្បាលចេញទាំងអស់ ដូច្នេះគ្មានជាដាច់ខាតការប្រព្រឹត្តិអំពើពុករលួយ៕