កម្មកររោងចក្រ ស្យុង យិន នាំគ្នាដេកយាមមុខរោងចក្រ ក្រោយពេលថៅកែបរាជ័យដឹកសម្ភារៈ និងម៉ាស៊ីនភ្លើងចេញ

កម្មកររោងចក្រ ស្យុង យិន នាំគ្នាដេកយាមមុខរោងចក្រ ក្រោយពេលថៅកែបរាជ័យដឹកសម្ភារៈ និងម៉ាស៊ីនភ្លើងចេញ

កម្មកររោងចក្រ ស្យុងយិន (Zhong Yin Cambodia B Textile Co. LTD) នៅសង្កាត់សិត្បូ ក្រុងតាខ្មៅ ខេត្តកណ្ដាល នាំគ្នាបន្ថែមកម្លាំង ដេកយាមខាងក្រៅរបងរោងចក្រ ទាំងថ្ងៃ និងយប់ ក្រោយពេលថៅកែរោងចក្រនេះ ព្យាយាមដឹកសម្ភារៈ និងម៉ាស៊ីនភ្លើងចេញ ហើយកម្មករទប់ស្កាត់ទាន់។

ប្រធានសហជីពស្មារតីកម្មករខ្មែរ ប្រចាំរោងចក្រ ស្យុង យិន លោក អ៊ឹម រ៉ា ប្រាប់ថា ឥឡូវនេះ កម្មករបានបណ្ដាក់វេនគ្នាយាមទាំងថ្ងៃ ទាំងយប់ ច្រើនជាងមុន ដោយសារតែខ្លាចថៅកែលួចដឹកសម្ភារៈចេញក្រៅរោងចក្រទៀត។ លោកឲ្យដឹងថា កាលពីថ្ងៃទី១២ កុម្ភៈ ថៅកែបានបញ្ជាឲ្យដឹកសម្ភារៈដេរ និងឥវ៉ាន់ ចេញពីរោងចក្រ តែក្រុមកម្មករហាមឃាត់ មិនឲ្យដឹកសម្ភារៈចេញក្រៅរោងចក្រឡើយ ដរាបណា ថៅកែមិនទាន់ដោះស្រាយវិវាទចប់សព្វគ្រប់៖ «សុំឲ្យខាងក្រសួងពាក់ព័ន្ធទាំងអស់ សុំឲ្យគាត់ជួយមើលអាបញ្ហាហ្នឹងណាបង។ សុំឲ្យជួយជំរុញរោងចក្រឲ្យគាត់ បើសិនជាបិទទូទាត់ឲ្យកម្មករតាមច្បាប់មក។ បើសិនជាបើក ទទួលយកកម្មករចូលធ្វើការវិញ។ ខ្ញុំមានសំណូមពរតែប៉ិនហ្នឹងទេបង»។

រោងចក្រ ស្យុង យិន នេះ ជាក្រុមហ៊ុនរបស់ថៅកែជនជាតិចិន និងមានកម្មករ សរុបជិត ៦រយ (៥៩២) នាក់ ដែលដេរសំលៀកបំពាក់ផ្គត់ផ្គង់ឱ្យក្រុមហ៊ុន H&M និងម៉ាកយីហោល្បីៗ ផ្សេងទៀត។ កម្មករនៅរោងចក្រនេះជាច្រើនរយនាក់ តវ៉ាបណ្ដាក់គ្នា តាំងពីចុងខែកញ្ញា ឆ្នាំ២០១៩ មក ព្រោះថៅកែ បានបញ្ចប់កិច្ចសន្យាការងាររបស់ពួកគេ ដោយហេតុថា រោងចក្រគ្មានឥវ៉ាន់ដេរ។

លោក អ៊ឹម រ៉ា អះអាងថា មកដល់ពាក់កណ្ដាលខែ២ នេះ រោងចក្រ ស្យុង យិន អត់មានឥវ៉ាន់ឲ្យកម្មករធ្វើការទេ ប៉ុន្តែប្រកាសរើសកម្មករថ្មីរាល់ថ្ងៃ ដើម្បីមកជំនួសកម្មករ ដែលកំពុងតវ៉ា។ រោងចក្រនេះ បានសម្រុកបញ្ឈប់កម្មករខ្លាំង នៅចុងឆ្នាំ២០១៩ ជាហេតុធ្វើឲ្យកម្មករ ដែលរងការបញ្ចប់កិច្ចសន្យាកាន់តែច្រើនឡើង ប្រមូលផ្ដុំគ្នាតវ៉ាមុខរោងចក្ររាល់ថ្ងៃ។

ដោយសារវិវាទចេះតែអូសបន្លាយ កាលពីពាក់កណ្ដាលខែមករា ក្រុមកម្មករបាននាំគ្នាយកញត្តិ ទៅស្វែងរកដំណោះស្រាយនៅខុទ្ទកាល័យលោកនាយករដ្ឋមន្ត្រី ហ៊ុន សែន ក្រសួងការងារ និងសាលាខេត្តកណ្ដាល ប៉ុន្តែក្នុងរយៈពេលរំលងមួយខែមកហើយ ក៏នៅមិនទាន់ឃើញមានចំណាត់ការឆ្លើយតបអ្វីពីស្ថាប័នទាំងនេះឡើយ។

ជុំវិញការចោទថា ភាគីថៅកែរោងចក្រមានគម្រោង ចង់លួចដឹកសម្ភារៈ និងឥវ៉ាន់ចេញក្រៅរោងចក្រ និងការដេកយាមនៅមុខទ្វាររោងចក្រនេះ អាស៊ីសេរី មិនអាចសុំការបញ្ជាក់ពីរដ្ឋបាលរោងចក្រ ស្យុង យិន លោក តុំ គឹមសឿន និងអ្នកនាំពាក្យក្រសួងការងារ ដែលទទួលបន្ទុកដោះស្រាយបញ្ហាវិវាទ បាតុកម្ម កូដកម្មគ្រប់មុខសញ្ញា គឺលោក ទេស រុក្ខាផល បានទេ នៅថ្ងៃទី១៥ កុម្ភៈ។

កម្មករម្នាក់ទៀត គឺជាប្រធានសហជីពស៊ីខៅឌូ ប្រចាំរោងចក្រស្យុងយិន លោក សំរ៉ុង បូរី និយាយថា ពួកគាត់ ប្ដូរវេនគ្នាដេកយាមពេលយប់ នៅមុខរោងចក្រជិតមួយសប្ដាហ៍ហើយ ដើម្បីការពារក្រែងថៅកែលួចដឹកឥវ៉ាន់ចេញម្ដងទៀត។ មន្ត្រីសហជីពរូបនេះ អំពាវនាវដល់អាជ្ញាធរពាក់ព័ន្ធ ឱ្យពន្លឿនដំណោះស្រាយដល់កម្មករ ព្រោះការតវ៉ានៅរោងចក្រ ស្យុង យិន នេះ ក្លាយជាបញ្ហារ៉ាំរ៉ៃ និងអូសបន្លាយជិតកន្លះឆ្នាំហើយ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។

មុន បន្ទាប់

មតិយោបល់