គាត់នេះហើយ ជាជាងគំនូរជើងចាស់ ដែលគូរស្លាកយីហោតាមរោងកុនធំៗក្នុងស្រុកខ្មែរ ពេលនេះ ទឹកដៃលោកតា នៅតែ...(មានវីដេអូ)

គាត់នេះហើយ ជាជាងគំនូរជើងចាស់ ដែលគូរស្លាកយីហោតាមរោងកុនធំៗក្នុងស្រុកខ្មែរ ពេលនេះ ទឹកដៃលោកតា នៅតែ...(មានវីដេអូ)

ភ្នំពេញ៖ ជាការពិតប្រសិនបើយើងងាកត្រឡប់បកក្រោយវិញបន្តិច ក្នុងអំឡុងឆ្នាំ៨០ ពេលនោះប្រទេសកម្ពុជាយើង មិនទាន់មានការជ្រៀបចូលនៅបច្ចេកវិទ្យាជឿនលឿន ដូចពេលបច្ចុប្បន្ននេះទេ។ ហើយគេសង្កេតឃើញថា រាល់រូបភាពក៏ដូចជាផ្ទាំងផ្សព្វផ្សាយទាំងអស់ដែលគេប្រើប្រាស់ក្នុង ការផ្សព្វផ្សាយខ្សែភាពយន្តថ្មីៗ នៅតាមរោងកុននានា ក្នុងរាជធានីភ្នំពេញនេះភាគច្រើនគឺសុទ្ធសឹងតែត្រូវបានគូរឡើង ដោយដៃផ្ទាល់របស់ជាងគំនូរ ដែលត្រូវបានគេស្គាល់ថាជាងគំនូរវត្តភ្នំ។

ក៏ប៉ុន្តែក្នុងពេលបច្ចុប្បន្ននេះ ដោយសារតែការវិវត្តន៍នៃសម្ភារៈទំនើបៗជាច្រើន ដែលកាន់តែបង្ក នៅភាពងាយស្រួលនោះគេក៏លែងនិយមនៅ ការគូររូបដោយដៃតទៅទៀត តែប្រែមកជាការគូររូប បែបលក្ខណៈឌីជីថលវិញ។ ដូច្នេះហើយបានជា គំនូរដែលគូរដោយដៃ ដូចកាលពីសម័យមុនមិនសូវជា លេចវត្តមាននៅតាមរោងកុនទំនើបៗក៏ដូចជាតាមផ្ទាំងផ្សព្វផ្សាយនានា នៅតាមទីសាធារណៈ តទៅទៀតនោះទេ។

ដោយហេតុតែក្តីស្រលាញ់ និងទេពកោសល្យខាងផ្នែកគូរគំនូរក៏ដូចជាការសរសេរអក្សរឆ្លាក់នេះ តាំងតែពីតូចៗមកទើបលោកតាកែវ សាន់ ដែលអ្នកគាំទ្រនៅស្នាដៃរបស់ លោកតាភាគច្រើនស្គាល់លោកតា តាមរយៈនាមថា ជាងគំនូរវត្តភ្នំ រូបនេះ នៅតែបន្តនៅអាជីពមួយនេះរហូតមកដល់ពេលបច្ចុប្បន្ននេះ។ បើទោះប្បីជាពេលបច្ចុប្បន្ននេះ លោកមានវ័យ៨៣ឆ្នាំទៅហើយយ៉ាងណាក្តីក៏លោកតាមិនបោះបង់អាជីព ដែលលោកតាស្រលាញ់តាំងពីក្មេង មួយនេះចោលដែរ។

គួរបញ្ជាក់ផងដែរថាលោកតា កែវ សាន់ ប្រកបរបរនេះតាំងពីអំឡុងជំនាន់ឆ្នាំ១៩៨០ រហូតដល់ឆ្នាំ១៩៩៣ ដោយក្នុងអំឡុងពេលនោះគឺ លោកតាតែងតែត្រូវបាន ហៅឲ្យទៅគូរគំនូរផ្សព្វផ្សាយពាណិជ្ជកម្មនៅតាមរោងកុនល្បីៗជាច្រើន មានដូចជារោងកុនហាវ៉ៃ រោងកុនកាពីតូល រោងកុនលុច្ស រោងកុនបាយ័ន រោងកុនវិមានសួរស្តី រោងកុនមេគង្គ រោងកុនអង្គរ រោងកុនភ្នំពេជ្រ រោងកុនសូរិយា និងរោងកុនជាច្រើនទៀតក្នុងរាជធានីភ្នំពេញ នាសម័យនោះផងដែរ។

ក៏ប៉ុន្តែក្រោយមក ក្នុងអំឡុងឆ្នាំ១៩៩៣ លោកតាក៏បានឈប់ពីអាជីពគូរគំនូរនៅតាមរោងកុននេះ ក៏ព្រោះតែក្នុងពេលនោះ រោងកុនភាគច្រើនត្រូវបាន ឈប់ដំណើរការតទៅទៀត ដូច្នេះហើយទើបបានជា លោកតាងាកមកបើកហាង និងតំឡើងស្លាកយីហោផ្ទាល់ខ្លួនវិញ។ នៅអំឡុងឆ្នាំ២០០៤ ទៅ២០០៥ ដោយសារតែមាន វត្តមានកុំព្យូរទ័រនិងសម្ភារៈទំនើបៗជាច្រើនលេចឡើងជាហូរហែរនៅ ក្នុងប្រទេសកម្ពុជា ដែលនាំឲ្យការគាំទ្រនៅគំនូរ ដែលគូរដោយផ្ទាល់ដៃនេះក៏ចាប់ផ្តើមមានការធ្លាក់ចុះ។ ដោយមើលឃើញថាទីផ្សារមិនអំណោយផល ដូច្នេះហើយក្នុងពេលនោះលោកតា ក៏បានសម្រេចចិត្តបិទទ្វារហាងតែម្តង។

ផ្អាកបានមួយរយៈក្នុងឆ្នាំ២០១៦លោកតា កែវ សាន់ ក៏បានវិលត្រឡប់មកកាន់ អាជីពនេះឡើងវិញដោយ ក្នុងពេលនោះលោកអ៊ុំបានដាក់តុតូចមួយនៅខាងក្រៅនៃផ្សារធំថ្មីដែលមុខរបរនេះក៏បាន ជាប់រហូតមកទល់នឹងពេលបច្ចុបន្ននេះ។ បើទោះប្បីលោកតាបានឃ្លាតឆ្ងាយពី អាជីពនេះជិត១៥ឆ្នាំទៅក៏ពិតមែន តែនៅពេលដែលវិលត្រឡប់មកវិញ ទឹកដៃនៃការគូររូបនឹងអក្សររបស់លោកតា នៅតែទាក់ទាញនិង គួរឲ្យចាប់អារម្មណ៍ដូចមុនដដែល។

ជាមួយគ្នានេះដែរលោកតា ក៏បានលើកឡើងផងដែរថាបច្ចុប្បន្ននេះវ័យរបស់លោកក៏កាន់តែទៅមុខ ហើយអ្វីដែលសោកស្តាយនោះគឺលោកមិនចង់ឲ្យបាត់បង់នៅចំណេះនិងជំនាញដែលលោកមាន នៅពេលនេះទៅដោយទទេរៗនោះទេ។ ដូច្នេះហើយទើបវិចិត្រកររូបនេះ ក៏សូមសំណូមពរដល់អ្នក ដែលមានចំណាប់អារម្មណ៍លើជំនាញនេះអាចមក ទាក់ទងរៀនពីរូបលោកបាន ហើយលោកតាក៏នឹង ទទួលបង្រៀនដោយឥតគិតថ្លៃផងដែរ៕