ភ្នំពេញ៖ ពិតជាមិនធម្មតាមែន មិនមែនត្រឹមតែជោគជ័យខ្លួនឯងប៉ុណ្ណោះទេ តារាចម្រៀង ឱក សុគន្ធកញ្ញា ក៏ចង់ឱ្យប្អូនស្រីរបស់នាងបានជោគជ័យដូចរូបនាងអ៉ីចឹងដែរ។

ជាក់ស្តែងកាលពីព្រឹកថ្ងៃពុធ ទី១៥ មករានេះ តាមបណ្តោយផ្លូវ២០០៤ គេឃើញវត្តមានតារាស្រីប្រុសល្បីៗជាច្រើនដួងបានចូលរួមអបអរសាទរការបើកសម្ពោធហាងតែគុជ សាខាទី១១ ទល់មុខឈាង និងសាលាអន្តរជាតិ CIA ដែលជាសាខាថ្មី ក្រោមការគ្រប់គ្រងរបស់កញ្ញា ឱក សុគន្ធតាណា ប្អូនស្រីរបស់តារាចម្រៀងលំដាប់ប្រទេស ឱក សុគន្ធកញ្ញា។

អ្នកម្តាយវ័យក្មេង សុគន្ធកញ្ញា បានប្រាប់ថា ថ្វីត្បិតពេលដែលប្អូនស្រីចេញរកស៊ីបង្កើតមុខរបសផ្ទាល់ខ្លួនដែលធ្វើឱ្យមានភាពរវល់បែបនេះ និងអាចកាត់បន្ថយការងារជាច្រើនដែលនាងធ្លាប់មានប្អូនស្រីជាជំនួយការជាយូរមកហើយ មានភាពលំបាកបន្តិចក្តី ប៉ុន្តែនាងពេញចិត្តនូវការសម្រេចចិត្តរកស៊ីបែបនេះ។ ដូច្នេះហើយ សុគន្ធកញ្ញា អាចរកអ្នកជំនួសផ្សេងទៀត ដែលអាចធ្វើកិច្ចជំនួសកន្លែងប្អូនស្រី ដែលធ្លាប់ជាជំនួយការពិសេសរបស់នាង។ មិនថាការលើកទឹកចិត្តជម្រុញបន្ថែម និងត្រួសត្រាយផ្លូវសម្រាប់ប្អូនស្រីជាទីស្រលាញ់ប៉ុណ្ណឹងទេ តារាចម្រៀងដែលមានប្រជាប្រិយភាពរូបនេះ ក៏បានជំនួយជាថវិកាបន្ថែមទៀតសម្រាប់អាជីកម្មដែលទើបតែសម្ពោធ នាព្រឹកថ្ងៃទី១៥ មករា នេះផងដែរ។

ប្អូនស្រីតារាល្បីកញ្ញា ឱក សុគន្ធតាណា បានបញ្ជាក់ថា ពីមុនមកនាងមិនធ្លាប់រកស៊ីទេ គឺគ្រាន់តែជួយមើលការខុសត្រូវលើមុខរបរម្តាយកន្លងមក ក៏ដូចជាធ្វើជាជំនួយការផ្ទាល់របស់បងស្រី។ នេះជាលើកដំបូងដែលហ៊ានសម្រេចចិត្តចេញរកស៊ី ព្រោះមានការជំរុញលើកទឹកចិត្តពីបងស្រី និងបងថ្លៃ ព្រមទាំងការជ្រោមជ្រែងថវិកាផងដែរ។

ឱក សុគន្ធតាណា បានបន្តទៀតថា ដើមទុនក្នុងការបើកហាង AN CHA នេះគឺចំណាយអស់ជិត ៥ ម៉ឺនដុល្លារ ក្នុងនោះមានការជួយពីបងស្រីនាង (ឱក សុគន្ធកញ្ញា) ផងដែរ ។ មូលហេតុដែលនាងសម្រេចចិត្តបើកហាងនេះដោយសារនាងស្រឡាញ់ និងចូលចិត្តប្រ៊េន AN CHA ដែលជាប្រ៊េនរបស់កូនខ្មែរសុទ្ធសាធ។

សិល្បករសិល្បការីនីដែលបានតុបតែងខ្លួនយ៉ាងស្រស់ស្អាតចូលរួមក្នុងពិធីសម្ពោធហាងរបស់ប្អូនស្រី ឱក សុគន្ធកញ្ញា ម្នាក់ៗសុទ្ធតែបានជូនពរនាងឱ្យជោគជ័យក្នុងការរកស៊ី។

ថ្វីត្បិតតែរវល់នៅក្នុងការមើលហាងក្តីតែកញ្ញា ឱក សុគន្ធតាណា នៅតែបន្តជួយមើលការខុសត្រូវបងស្រីរបស់ខ្លួនដូចមុនដដែល៕

• ឱក សុគន្ធកញ្ញា