បរទេស៖ នៅពេលដែលគេនិយាយអំពីទីក្រុងមួយដែលមានសោភ័ណភាពស្រស់ស្អាត មានបរិស្ថានល្អ មានសុខសុវត្ថិភាពចំណីអាហារខ្ពស់ មានសុវត្ថិភាពខ្ពស់ មានបច្ចេកវិទ្យាជឿនលឿនខ្លាំង  និងសំបូរទៅដោយប្រជាជនរស់នៅបានសុខសប្បាយនោះ  គេប្រាកដជានឹកឃើញភ្លាមទៅដល់ទីក្រុងមួយដែលមានទីតាំងស្ថិតនៅក្នុងតំបន់អាស៊ីយើងនេះ ដែលទីក្រុងនោះគឺសិង្ហបុរីនេះឯង។

ពីមួយឆ្នាំទៅមួយឆ្នាំ រដ្ឋាភិបាលនៃប្រទេសនេះតែងតែខិតខំប្រឹងប្រែងត្រិះរិះរកគ្រប់មធ្យោបាយដើម្បីធ្វើយ៉ាងណាឲ្យប្រជាជនរបស់ខ្លួនមានការងារធ្វើគ្រប់គ្រាន់ មានប្រាក់ចំនូលខ្ពស់ មានសុខសុវត្ថិភាពផ្ទាល់ខ្លួនខ្ពស់ និងមានឥរិយាបថថ្លៃថ្នូរ រហូតដល់ធ្វើឲ្យទីក្រុងមួយនៃប្រទេសនេះក្លាយទៅជាទីក្រុងដែលមានសុខសុវត្ថិភាពខ្ពស់ ជាប់ចំណាត់ថ្នាក់លេខ២ ប្រសិនបើយើងធ្វើការប្រៀបធៀបជាមួយនឹងទីក្រុងផ្សេងៗទៀតនៅក្នុងពិភពលោក។ អ្វីដែលកាន់តែពិសេសទៅទៀតនោះគឺ មានមតិមួយចំនួនធំបានលើកឡើងថា ប៉ូលិសនៅក្នុងទីក្រុងមួយនេះស្ទើរតែគ្មានការងារធ្វើទេ ព្រោះប្រទេសមួយនេះកម្រមានករណីឆក់ប្លន់ណាស់។

បើទោះបីជាទីក្រុង សិង្ហបុរី ជាទីក្រុងមួយដែលគេចាត់ទុកថាមានបច្ចេកវិទ្យាខ្ពស់ សោភ័ណ្ឌភាពទីក្រុងស្រស់ស្អាត បរិស្ថានល្អ និងមានសុខសុវត្ថិភាពខ្ពស់ក៏ដោយ ក៏ប៉ុន្តែទីក្រុងមួយនេះហាក់ដូចជាមិនទាន់អាចយកឈ្នះទីក្រុងតូក្យូ នៃប្រទេសជប៉ុនបានឡើយ ព្រោះទីក្រុងតូក្យូ ក៏មានការរីកចម្រើនខ្លាំងក្លាគួរឲ្យកត់សម្គាល់ផងដែរ រហូតដល់ធ្វើឲ្យគេចាត់ទុកទីក្រុងមួយនេះ ជាទីក្រុងដែលជាប់ចំណាត់ថ្នាក់លេខ ១ ក្នុងចំណោមទីក្រុងដែលមានសុវត្ថិភាពបំផុតនៅលើពិភពលោក។ ដើម្បីឲ្យប្រិយមិត្តបានជ្រាបកាន់តែច្បាស់ តោះតាមដានទស្សនាតារាងបង្ហាញទន្នន័យទាំងអស់គ្នា៖