ពង្រឹងការិយាល័យទំនាក់ទំនងព្រំដែន កម្ពុជា-ថៃ ឲ្យកាន់តែប្រសើរ

ពង្រឹងការិយាល័យទំនាក់ទំនងព្រំដែន កម្ពុជា-ថៃ ឲ្យកាន់តែប្រសើរ

បន្ទាយមានជ័យ: នាយករងទីចាត់ការ ការងារព្រំដែន អគ្គបញ្ជាការ បានជំរុញមន្ត្រីការិយាល័យ និងក្រុមការងារទំនាក់ទំនងព្រំដែន កម្ពុជា-ថៃ ទាំង២៤ច្រក ដែលស្ថិតនៅតាមខ្សែបន្ទាត់ព្រំដែនជាមួយថៃ ត្រូវបន្តធ្វើជាអ្នកការទូត បង្កើនទំនាក់ទំនងល្អ នៅមូលដ្ឋានព្រំដែន ទោះជាសភាពការណ៍ផ្ទៃក្នុងថៃ និងនៅព្រំដែនថៃ-កម្ពុជា ប្រែប្រួលក្រឡាប់ចាក់យ៉ាងណាក្តី។
លោកឧត្តមសេនីយ៍ទោ ពេជ្រ វណ្ណា នាយករងទីចាត់ការ ការងារព្រំដែន អគ្គបញ្ជាការ និងជាប្រធានការិយាល័យទំនាក់ទំនងព្រំដែន កម្ពុជា-ថៃ បានលើកឡើងបែបនេះ កាលពីថ្ងៃទី១ ខែសីហា ឆ្នាំ២០១៤ ខណៈពេលលោកបានចូលរួម ក្នុងកិច្ចប្រជុំបូកសរុប លទ្ធផលការងារ ឆមាសទី១ និងទិសដៅឆមាសទី២ ឆ្នាំ២០១៤ របស់ការិយាល័យទំនាក់ទំនងព្រំដែន កម្ពុជា-ថៃ។
លោកបាននិយាយថា: ទោះសភាពការណ៍ ក្នុងប្រទេសថៃ និងនៅតាមព្រំដែនមិនល្អ មិនអំណោយផលយ៉ាងណាក្តី ក៏តួនាទីមន្ត្រីការិយាល័យ និងក្រុមការងារទំនាក់ទំនងព្រំដែន កម្ពុជា-ថៃ បន្តធ្វើអោយល្អ និងរឹតតែជិតស្និទ្ធ។ នេះជាការណែនាំរបស់ថ្នាក់លើ។ ពោលគឺទំនាក់ទំនង សម្របសម្រួល ដោះស្រាយជូនពលរដ្ឋ និងបម្រើផល ប្រយោជន៍យើង។
យោងរបាយតាមការណ៍ ប្រចាំឆមាសទី១ ឆ្នាំ២០១៤ របស់ការិយាល័យទំនាក់ទំនងព្រំដែន កម្ពុជា-ថៃ អានដោយលោកវរសេនីយ៍ នេត សំអាត អនុប្រធានការិយាល័យនេះ បានអោយដឹងថា: ទោះជាស្ថានការណ៍នយោបាយ ក្នុងប្រទេសថៃ ត្រូវយោធាធ្វើរដ្ឋប្រហារ និងដាក់អោយប្រើ ច្បាប់អាជ្ញាសឹកក្តី ក៏ជារួមសភាពការណ៍ព្រំដែន ស្ងប់ស្ងាត់ សន្តិភាព ។ ប៉ុន្តែភាគីថៃ នៅតែបន្តបង្កបញ្ហា ដូចជា ការរំលោភបំពាន ដាក់មីន ដោះមីន ដាំរបង រាយលួសបន្លា (នៅជប់គគីរ ថ្មដូន ប្រាសាទតាក្របី អានសេះ ..) ទាមទារអោយពលរដ្ឋថៃ ធ្វើស្រែក្បែរបង្គោល ព្រំដែនលេខ៤៣ ការហ្វឹកហ្វឺន កម្លាំង ប្រដាប់អាវុធ ដោយយន្តហោះ រថក្រោះ កាំភ្លើងតូចធំ និងបាញ់គ្រាប់ពិត នៅតាមព្រំដែន ហោះ ហើររំលោភដែនអាកាស និងឈ្លបយកការណ៍ តម្លើងផ្កាយ រណបចាប់រូបភាព បាញ់លើទាហាន និងបាញ់សម្លាប់ ឬបង្កឲ្យរបួស ពលរដ្ឋស៊ីវិល គ្មានអាវុធ សាងសង់លេណដ្ឋាន និងសំណង់ រំលោភតំបន់ព្រំដែន បិទព្រំដែនជាឯកតោភាគី...។ល។
កិច្ចប្រជុំនោះ ក៏មានការធ្វើបទអន្តរាគមន៍ ដោយលោកប្រធាន ក្រុមការងារច្រកចាំយាម ច្រកអានសេះ ច្រកជាំ និងច្រកម៉ាឡៃ, លោកអនុប្រធានការិយាល័យទិសទី១ ព្រំដែនប្រាសាទព្រះវិហារ , លោក អាន វណ្ណះ ប្រធានទីស្នាក់ការត្រួតពិនិត្យ ច្រកទ្វារអន្តរជាតិប៉ោយប៉ែត និងលោកវរសេនីយ៍ស៊ឹម សំអាត នាយប៉ុស្តិ៍នគរបាលច្រកទ្វារ អន្តរជាតិប៉ោយប៉ែត ដែលបង្ហាញពីការលំបាក និងភាពងាយស្រួល ភាពឆ្លាតវៃបត់បែន និងទទួលខុសត្រូវ សម្រេចលទ្ធផលការងារ ។ នៅក្នុងពិធីនោះដែរ ក៏មានការតែងតាំង ផ្លាស់ប្តូរភារកិច្ច និងតម្លើងឋានន្តរស័ក្តិ មន្ត្រីការិយាល័យ និងក្រុមការងារ ទំនាក់ទំនងព្រំដែន កម្ពុជា-ថៃមួយចំនួន។
ចុងក្រោយ លោកឧត្តមសេនីយ៍ទោ ពេជ្រ វណ្ណា បានផ្តាំផ្ញើថា: មន្ត្រីទាំងអស់ ត្រូវបង្កើនប្រពៃណី សាមគ្គីភាពផ្ទៃក្នុង ឯកភាព សហការ និងទទួលខុសត្រូវ អនុវត្តន៍ការងារ អោយកាន់តែបានលទ្ធផល និងប្រសិទ្ធភាពថែមទៀត ពិសេសគឺសហការល្អនឹងមន្ត្រីស៊ីវិល កងកម្លាំង និងអ្នកពាក់ព័ន្ធ ក្នុងភូមិសាស្ត្រប្រទេសកម្ពុជា និងសហប្រតិបត្តិការជិតស្និទ្ធនឹងភាគីថៃ៕
ប្រភពៈ everyday.com.kh

មុន បន្ទាប់

មតិយោបល់