មហាសេដ្ឋីសាំងហ្គាពួរ ម្ចាស់ក្រុងហ៊ុន៨សាខា ធ្លាក់ខ្លួនមកជាអ្នករត់តុ

មហាសេដ្ឋីសាំងហ្គាពួរ ម្ចាស់ក្រុងហ៊ុន៨សាខា ធ្លាក់ខ្លួនមកជាអ្នករត់តុ

មហាសេដ្ឋីសាំងហ្គាពួរម្នាក់បានធ្វើឲ្យកាសែតក្នុងស្រុកមានការផ្អើលជាខ្លាំងដោយលោកមានការផ្លាស់ប្ដូរយ៉ាងលឿនពីម្ចាស់ក្រុមហ៊ុនលំដាប់ផ្កាយ មកធ្វើការអ្នករត់តុក្នុងភោជនីយដ្ឋាន។
លោកKen Lim Cheng Chuan វ័យ៥៥ឆ្នាំ ជាម្ចាស់ក្រុមហ៊ុនទេសចរណ៍ដឹកអ្នកដំណើរលំដាប់ផ្កាយមួយរបស់សាំងហ្គាពួរឈ្មោះ Five Star Tours ដែលមានសាខាចំនួន៨នៅក្នុងប្រទេស ត្រូវបានកាសែតសិង្ហបុរីចុះផ្សាយយ៉ាងគគ្រឹកគគ្រេងបន្ទាប់ពីលោកបានធ្លាក់ខ្លួនយ៉ាងខ្លាំងមកធ្វើជាអ្នករត់តុនៅក្នុងហាងលក់កាហ្វេមួយនៅក្នុងក្រុង។
យោងតាមកាសែតមួយឈ្មោះMy Paper បានដឹងថា បុរសវ័យចំណាស់រូបនេះ ជាមហាសេដ្ឋី មានទ្រព្យសម្បត្តិស្ដុកស្ដម្ភ នៅសាំងហ្គាពួរ ប៉ុន្តែគាត់មានខ្សែជីវិតជាកម្មកររោងចក្រផលិតចំណីអាហារតាំងពីអាយុ១៣ឆ្នាំមកម្ល៉េះ ហើយការត្រឡប់បកក្រោយរបស់គាត់នៅពេលនេះហាក់ដូចជា វដ្ដនៃខ្សែជីវិតដ៏គួរឲ្យគួរភ្ញាក់ផ្អើល។
អតីតម្ចាស់ក្រុមហ៊ុនរូបនេះបានឲ្យកាសែតមួយទៀតឈ្មោះ The Real Singapore ដឹងថា លោកបានអស់ប្រាក់ពីខ្លួនតែម្ដង បន្ទាប់ពីក្រុមហ៊ុនរបស់លោកបានដួលរលំទាំងស្រុងកាលពីប៉ុន្មានខែមុននេះ។ លោកបន្តថា ការខាត់ឡុងចុងអស់គ្មានសល់នេះ ដោយសារក្រុមហ៊ុនរបស់លោករងការប្រកួតប្រជែង និង ការវាយប្រហារខ្លាំងពេកដោយក្រុមហ៊ុនResortពីរឈ្មោះ Resorts World Sentosa និង Marina Bay Sands នៅក្នុងប្រទេសសាំងហ្គាពួរដែលបានបើកកាលពីឆ្នាំ២០១០។
ការណ៍នេះបានធ្វើឲ្យដំណើរការក្រុមហ៊ុនដឹកជញ្ជួនរបស់លោកមានការអាក់រអួលជាខ្លាំង និង ធ្វើឲ្យកំណើនអតិថិជនបានធ្លាក់ចុះជាគំហុកដល់ទៅ៧០%តាំងពីដើមទី។ ការធ្លាក់ចុះយ៉ាងខ្លាំងជាលំដាប់នេះ បានប៉ះពាល់ដល់កញ្ចប់ថវិការបស់ក្រុមហ៊ុនយ៉ាងខ្លាំង ដល់ថ្នាក់ងើបលែងរួច។
លោក Lim បន្តថា លោកមិនបាននៅស្ងៀមទេ បន្ទាប់ពីជួបបញ្ហាដូចនេះ លោកក៏បានផ្លាស់ទៅបើកដំណើរការក្រុមហ៊ុនថ្មី ក្រោមស្លាកយីហោដដែលនៅក្នុងប្រទេសម៉ាឡេស៊ី ប៉ុន្តែជារឿយៗក្រុមហ៊ុនជួបវិបត្តិហិរញ្ញវត្ថុយ៉ាងធ្ងន់ធ្ងរសឹងទប់មិនឈ្នះ ម្យ៉ាងវិញទៀតមានបញ្ហាជុំវិញលំហូរសាច់ប្រាក់ជាមួយនឹងធនាគារផង ហេតុដូចនៅខែ មករា ដើមឆ្នាំ២០១៤ ក្រុមហ៊ុនក៏ត្រូវបានបិទទ្វារតែម្ដង។
ជុំវិញការដួលរលំនេះ បានធ្វើឲ្យលោកបានជំពាក់លុយធនាគារយ៉ាងច្រើនដែលលោកត្រូវសងអស់ពីខ្លួន ហើយនេះមូលហេតុតែមួយគត់ដែលធ្វើឲ្យលោកធ្លាក់ខ្លួនមកជាអ្នករត់តុដូចសព្វថ្ងៃ។
លោក Lim បានបញ្ជាក់ថា ក្រុមហ៊ុន Five Star Tours របស់លោកបានបង្កើតឡើងតាំងពីឆ្នាំ ១៩៩០ មកម្ល៉េះ ដោយលោកផ្ទាល់ និង បងប្អូនប្រុស៤នាក់ទៀតរបស់លោក ហើយ វាបានរីកចម្រើនជាលំដាប់រហូតដល់មានសាខាចំនួន៨នៅក្នុងប្រទេសសាំងហ្គាពួរ តែគួរឲ្យស្ដាយពេលនេះវាត្រូវបិទទ្វារ។
ទោះយ៉ាងនេះក្ដី អតីតម្ចាស់ក្រុមហ៊ុនរូបនេះបាននិយាយថា លោកនឹងមិនបោះចោលទេ លោកនឹងរកឱកាសដើម្បីត្រឡប់ទៅបើកក្រុមហ៊ុនរបស់លោកវិញនៅថ្ងៃណាមួយ។ ប៉ុន្តែជាចុងក្រោយលោកនិយាយថា ការប្រកួតប្រជែងលើទីផ្សារសេរី ជាចំនុចដ៏គួរឲ្យខ្លាចជាងគេដែលអ្នកជំនួញគួរត្រូវគិតមុនគេបង្អស់ មុននឹងបើកអាជីវកម្មអ្វីមួយ។ ប្រភពwww.kqube.net

មុន បន្ទាប់

មតិយោបល់