ថៃ៖ បន្ទាប់ពីបាត់មុខនៅក្នុងវិស័យសិល្បៈ អស់រយៈពេលធំ ពេលនេះតារាសម្តែងស្រីរូបស្រស់ និងធ្លាប់ជាកំពូលតារាស្រីល្បីឈ្មោះមួយដួងនាង Pinky Savika បានមកវិញហើយ ជាមួយនឹងសម្រស់ដ៏ស្រស់ស្អាត និងនៅតែក្មេងជាងវ័យរបស់នាង។

គ្រប់គ្នាសឹងតែមិនជឿនឹងភ្នែកទេថា បច្ចុប្បន្នតារាសម្តែងស្រីនាង Pinky Savika មានវ័យ៣០ឆ្នាំហើយ ប៉ុន្តែសម្រស់របស់នាងហាក់មិនផ្លាស់ប្តូរបន្តិចសោះ។

ជាក់ស្តែង នៅក្នុងឱកាសចូលរួមកម្មវិធីសង្គមមួយនាង Pinky Savika បានបង្ហាញខ្លួនយ៉ាងគួរឱ្យភ្ញាក់ផ្អើលចំពោះមុខមហាជនទូទៅ ជាមួយនឹងការតុបតែងខ្លួនស្រស់ស្អាតដូចព្រះនាង ដោយនាងបានស្លៀករ៉ូបពណ៌សដូចកូនក្រមុំ និងមានពាក់មកុដលម្អជាមួយគ្នាយ៉ាងស្អាត។

វត្តមានរបស់នាងដើរបង្ហាញម៉ូតនៅលើឆាក បានធ្វើឱ្យភ្ញៀវនៅក្នុងកម្មវិធីទាំងមូលលាន់មាត់សរសើរដោយភាពភ្ញាក់ផ្អើល ព្រោះមិនធ្លាប់បានឃើញនាងបង្ហាញខ្លួននៅទីសាធារណៈទៀតឡើយ ក្រោយពេលរៀបអាពាហ៍ពិពាហ៍។

គួរឱ្យដឹងផងដែរថានាង Pinky Savika បានចូលរោងការតាមប្រពៃណី ជាមួយនឹងអ្នកជំនួញសម្បត្តិពាន់លានលោក Itthi Chavalitdhamrong វ័យ៣៨ឆ្នាំ កាលពីកំឡុងខែកញ្ញាឆ្នាំ២០១៤កន្លងមក។ ចាប់តាំងពីពេលនោះ នាងក៏បានផ្អាកការងារសិល្បៈទាំងស្រុង ដោយបានបំពេញតួនាទីជាភរិយាដ៏ល្អរបស់ស្វាមី៕ 

ទស្សនាកម្រងរូបភាពរបស់នាង Pinky Savika ដូចខាងក្រោមនេះទាំងអស់គ្នា៖