ចេញពីធ្វើការជិតដល់ផ្ទះ ស្រាប់តែត្រូវចោរឆក់កាបូបរហូតដួលម៉ូតូ

ចេញពីធ្វើការជិតដល់ផ្ទះ ស្រាប់តែត្រូវចោរឆក់កាបូបរហូតដួលម៉ូតូ

រាជធានីភ្នំពេញ ៖ ស្ត្រីម្នាក់ជិះម៉ូតូជាមួយឪពុក ត្រឡប់ពីធ្វើការទៅផ្ទះវិញ ខណៈកំពុងជិះជិតដល់ផ្ទះទៅហើយ ស្រាប់តែត្រូវចោរឆក់កាបូបស្ពាយ បណ្ដាលឲ្យដួលម៉ូតូរងរបួសទាំង២នាក់ឪពុកកូន ។ ហេតុការណ៍នេះ កើតឡើងកាលពីវេលាម៉ោង៩ និង៣០នាទីយប់ ថ្ងៃទី៧ ខែកញ្ញា ឆ្នាំ២០១៦ នៅមុខសាលាអន្តរជាតិ វែល តាមបណ្តោយមហាវិថីសហព័ន្ធរុស្ស៊ី ស្ថិតក្នុងភូមិប៉ប្រកខាងជើង សង្កាត់កាកាប ខណ្ឌពោធិ៍សែនជ័យ ។

ស្ត្រីរងគ្រោះឈ្មោះ អេង គន្ធា អាយុ៣៦ឆ្នាំ មុខរបរបុគ្គលិកក្រុមហ៊ុនឯកជន ស្នាក់នៅភូមិត្រពាំងល្វា សង្កាត់កាកាប ខណ្ឌពោធិ៍សែនជ័យ មានស្រុកកំណើតស្រុកព្រៃឈរ ខេត្តកំពង់ចាម ។

ស្ត្រីរងគ្រោះបានប្រាប់ឲ្យដឹងថា មុនពេលកើតហេតុ នាងបានចេញពីធ្វើការដោយឪពុកជាអ្នកជិះម៉ូតូទៅឌុបមកវិញ ខណៈពេលជិះម៉ូតូមកដល់ចំណុចកើតហេតុជិតដល់ផ្ទះហើយ ស្រាប់តែមានជនសង្ស័យ ២នាក់ជិះម៉ូតូ ម៉ាក MSX ពណ៌ក្រហម មិនចាំស្លាកលេខ បានជិះមកជិតហើយធ្វើសកម្មភាព ឆក់កាបូបរបស់នាង ដែលស្ពាយចំហៀងទៅបាត់ដោយសុវត្ថិភាព ចំណែកនាងនិងឪពុករបស់នាង ដួលម៉ូតូរលាត់ដៃជើងទាំង២នាក់ ។

ស្ត្រីរងគ្រោះបានឲ្យដឹងទៀតថា នៅក្នុងកាបូបដែលជនសង្ស័យឆក់ យកទៅបាត់នោះមានអត្តសញ្ញាណបណ្ណ លិខិតឆ្លងដែន កាតការងារ លុយជាង១០០ដុល្លា ទូរស័ព្ទចុចពិល១គ្រឿង ទូរស័ព្ទម៉ាកសាំងសុងកាឡាក់ស៊ីណូត៣មួយគ្រឿង ។

ក្រោយពេលកើតហេតុ សមត្ថកិច្ចមូលដ្ឋានទៅដល់ កន្លែងកើតហេតុ សួរនាំដំណើររឿង និងនាំស្ត្រីរងគ្រោះទៅដាក់ពាក្យបណ្តឹង នៅប៉ុស្តិ៍នគរបាលរដ្ឋបាលកាកាប ៕

ប្រភព ៖ កោះសន្តិភាព

កំណត់ហេតុខ្មែរឡូត៖

គួររំលឹកព័ត៌មានចាស់ដែរថា ដោយឡែកករណីមួយវិញទៀត ចេញពីធ្វើការ ឡើងលើផ្ទះ ចោរមកពី ក្រោយច្របាច់ក ប្លន់យកទូរស័ព្ទ តែចាប់ បានមកវិញ។ ជនសង្ស័យម្នាក់ ដែលធ្វើសកម្ម ភាពវាយប្លន់ យកទូរស័ព្ទ IPhone5 មួយគ្រឿងពី ស្ដ្រីម្នាក់ជា បុគ្គលិកនៅ ភោជនីយដ្ឋាន សៀងហៃ ត្រូវបានកម្លាំងនគរបាល មូលដ្ឋានខណ្ឌ ៧មករា ចាប់ខ្លួន ក្រោយពីជន សង្ស័យរូបនេះ បានធ្វើ សកម្មភាពកាល ពីវេលាម៉ោង ៤ទាបភ្លឺ ថ្ងៃទី២១ ខែ វិច្ឆិកា ឆ្នាំ២០១៤ កន្លងទៅ។

មន្ដ្រីនគរបាល ព្រហ្មទណ្ឌខណ្ឌ ៧មករា បានឱ្យដឹងថា ជនសង្ស័យរូបនេះ ឈ្មោះ យ៉ែម ចិន្ដា ហៅចាន់ធារិទ្ធ អាយុ៣៣ឆ្នាំ មុខរបរ និងទីកន្លែងស្នាក់នៅ មិនពិតប្រាកដ ។ ដោយឡែកជនរង គ្រោះឈ្មោះ សុង ដាលីន អាយុ ៣២ឆ្នាំ ស្នាក់នៅ ផ្ទះលេខ៩៩E2 ផ្លូវលេខ ១៣៤ ភូមិ៦ សង្កាត់មិត្ដភាព ខណ្ឌ៧មករា។

ស្ដ្រីរងគ្រោះ សុង ដាលីន បានរៀបរាប់ ពីដំណើររឿងថា មុនពេលកើតហេតុ ពោល នៅវេលាម៉ោង ៤ទាបភ្លឺ ថ្ងៃទី២១ ខែវិច្ឆិកា ឆ្នាំ២០១៤ នាងបានចេញពី កន្លែងធ្វើការនៅ ភោជនីយដ្ឋាន សៀងហៃ ស្ថិតនៅក្នុងសង្កាត់ ផ្សារថ្មី ខណ្ឌដូនពេញ ត្រឡប់ទៅផ្ទះរបស់ ខ្លួននៅចំណុច កើតហេតុខាងលើ ។

ស្ដ្រីរងគ្រោះបាន បញ្ជាក់ទៀតថា ពេលដែលនាងឡើង ទៅលើជាន់ទី២ មិនបានចាប់ អារម្មណ៍ ស្រាប់តែជនសង្ស័យ ឡើងតាមពី ក្រោយនិងស្រែក ខ្លាំងៗថា មីចុយម្រ៉ាយ ហ្គែងវ៉ៃប្អូនអញ ពេលនោះ ធ្វើឱ្យនាងមាន ការស្រឡាំងកាំង យ៉ាងខ្លាំង រួចជននេះក៏ ស្ទុះទៅច្របាច់ក ហើយធាក់មួយ ជើងបណ្ដាល ឱ្យដួលយកទូរស័ព្ទ រត់គេចខ្លួនដោយ សុវត្ថិភាព ។

ក្រោយពីមានករណីនេះ កើតឡើងកម្លាំង សមត្ថកិច្ចមូលដ្ឋាន បានចុះទៅធ្វើ ការស្រាវជ្រាវ ហើយឈាន ទៅដល់ ការចាប់ខ្លួនជន សង្ស័យយកមកសួរ ដើម្បីមានវិធានការ តាមផ្លូវច្បាប់ ។ ដោយឡែកទូរស័ព្ទ ត្រូវបាន ប្រគល់ទៅ ឱ្យជនរងគ្រោះវិញ ៕