នគរបាលព្រហ្មទណ្ឌខណ្ឌ ៧មករា ឃាត់ខ្លួនជនសង្ស័យភ្លាមៗ បន្ទាប់ពីធ្វើសកម្មភាព ឆក់ទូរស័ព្ទជនបរទេស

នគរបាលព្រហ្មទណ្ឌខណ្ឌ ៧មករា ឃាត់ខ្លួនជនសង្ស័យភ្លាមៗ បន្ទាប់ពីធ្វើសកម្មភាព ឆក់ទូរស័ព្ទជនបរទេស

(ភ្នំពេញ)៖ កម្លាំងនគរបាល ព្រហ្មទណ្ឌខណ្ឌ៧មករា កំពុងល្បាតតាមមូលដ្ឋានក៏ប្រទះឃើញ យុវជន ២នាក់ មានការសង្ស័យ បានតាមដានពីក្រោយស្រាប់តែជនសង្ស័យ២នាក់ បានធ្វើសកម្មភាព ឆក់ទូរសព្ទ័ជនជាតិបរទេសម្នាក់ ដែលកំពុងជិះម៉ូតូកង់បី តាមបណ្ដោយផ្លូវលេខ ២៧៤ ភ្លាមៗនោះក៏ត្រូវបានកម្លាំងនគរបាល ព្រហ្មទណ្ឌខណ្ឌ ដេញចាប់ឃាត់ខ្លួនម្នាក់ ចំណែកម្នាក់ទៀត រត់គេចខ្លួនតែមង្ត។ ហេតុការណ៍នេះ នៅយប់ថ្ងៃទី០៦ ខែកញ្ញា ឆ្នាំ២០១៦ នៅចំណុចផ្លូវ ២៧៤ ស្ថិតនៅក្នុងសង្កាត់វាលវង់ ខណ្ឌ៧មករា រាជធានីភ្នំពេញ។

មន្រ្តីនគរបាលព្រហ្មទណ្ឌខណ្ឌ បានឲ្យដឹងថា មុនពេលកើតហេតុកម្លាំងជំនាញ កំពុងល្បាតតាមមូលដ្ឋាន ក៏ប្រទះឃើញជនសង្ស័យទាំង៣នាក់ ជិះម៉ូតូ២គ្រឿង ម៉ាក Honda C125 ស៊េរីឆ្នាំ២០១៦ ពណ៌ខ្មៅ ពាក់ស្លាកលេខភ្នំពេញ ១FQ-1754 ខណៈជិះមកដល់ចំណុចផ្លូវលេខ២៧៤ ជនសង្ស័យបានធ្វើសកម្មភាព ឆក់ទូរសព្ទ័ ជនជាតិបរទេសដែលកំពុងជិះម៉ូតូកង់បីភ្លាមៗ នោះកម្លាំងជំនាញ បាននាំគ្នាដេញតាមពីក្រោយ ប្រផាប់ប្រភីង ហើយជនសង្ស័យទាំង២នាក់ បានព្យាយាមជិះគេចខ្លួន រហូតមកដល់ចំណុចមុខ ហាងស្តាំងតូតាល់ ក៏ត្រូវបានកម្លាំងនគរបាលចាប់ជនសង្ស័យម្នាក់ ចំណែកម្នាក់ទៀតរត់គេចខ្លួនបាត់តែម្ដង។

នគរបាលបញ្ជាក់ថា ជនសង្ស័យទាំង២នាក់ នោះទី១ ឈ្មោះ ង៉ែត វិសាល អាយុ១៦ឆ្នាំ ស្នាក់ម្ដុំទួលសង្កែ និងម្នាក់ដែលរត់គេចខ្លួនបាត់ ឈ្មោះ ហ៊ាង អាយុ១៨ឆ្នាំ ស្នាក់នៅមិនពិប្រាកដ។ក្រោយពេលឃាត់ខ្លួន ជនសង្ស័យ ត្រូវបានកម្លាំងនគរបាលព្រហ្មទណ្ឌ នាំទៅអធិការដ្ឋាននគរបាល ខណ្ឌ ៧មករា ដើម្បីសួរនាំ និងចាត់ការតាមនីតិវិធី៕

ប្រភព ៖ Fresh News

កំណត់ហេតុខ្មែរឡូត៖

ដោយឡែក ករណីមួយផ្សេងទៀត កាលពីលើកមុន ដេញចាប់បានខ្ទើយ២នាក់ឆក់ទូរស័ព្ទជនបរទេស ។ គួររំលឹកផងដែរថា សមត្ថកិច្ចល្បាតតាមផ្លូវដោយមានបុរសម្នាក់ដេញតាមផ្លូវ ហើយស្រែកថាជួយចាប់ចោរឆក់ទូរស័ព្ទ ហើយត្រូវបានកម្លាំងចេញល្បាត ក៏ដេញចាប់បាន២នាក់ រួចនាំខ្លួនយកទៅសាកសួរនាំ កាលវេលាម៉ោង១និង៣០នាទីរំលងអធ្រាត្រថ្ងៃទី១៤ សីហា ២០១៦ កន្លងទៅ នៅតាមផ្លូវម៉ៅសេទុង ស្ថិតនៅភូមិ១ សង្កាត់ទំនប់ទឹក ខណ្ឌចំការមន រាជធានីភ្នំពេញ ។

ជនរងគ្រោះជាជនជាតិបរទេសប្រុស២ ស្រីម្នាក់ ជិះរ៉ឺម៉កកង់បីបានប្រាប់ថា មុនកើតហេតុតាមផ្លូវ៣៦០ កែង៦៣ ក្នុងទិសដៅពីជើងទៅត្បូង ស្ថិតនៅសង្កាត់បឹងកេងកងទី១ ខណ្ឌចំការមន មានជនសង្ស័យជាខ្ទើយ (ភេទទី៣) ជិះ៣ម៉ូតូ ដែលមានគ្នា៥ទៅ៦នាក់ ហើយអ្នកដែលជិះម៉ូតូម៉ាកស្គុបពី ២នាក់មើលរូបរាងដូចជាស្រី បានធ្វើសកម្មភាពឆក់ទូរស័ព្ទរបស់គាត់ដែលកាន់នៅដៃប្រុសម្នាក់ និងស្រីម្នាក់។ បាត់ទូរស័ព្ទ២គ្រឿង ម៉ាកណូគា និងម៉ាកសាំសុង យកទៅបាត់ ហើយក៏ស្រែកឱ្យគេជួយ រួចក៏មានបុរសជួយដេញតាមរហូតចាប់បាន ហើយក៏គាត់ទៅមើល តើពិតប្រាកដជាជនដែលឆក់ទូរស័ព្ទគាត់ទេ ហើយពេលទៅមើលនៅប៉ុស្តិ៍នគរបាលសង្កាត់ទួលស្វាយព្រៃទី១ ខណ្ឌចំការមន គឺពិតជានារីខ្ទើយ២នាក់នឹងហើយដែលឆក់ទូរស័ព្ទរបស់ពួកគាត់មែន ដោយទូរស័ព្ទដែលឆក់នោះមិនបាននៅជាប់នឹងខ្លួនជនសង្ស័យតែ ដោយសារតែពេលឆក់បានប្រដោះឱ្យបក្សពួកអស់ហើយ ទើបមិននៅជាប់ខ្លួនបែបនេះ ហើយក៏បានដាក់ពាក្យបណ្ដឹងនៅប៉ុស្តិ៍នគរបាលរដ្ឋបាលសង្កាត់បឹងកេងកងទី១ ខណ្ឌចំការមន ជាកន្លែងកើតហេតុ ដើម្បីចាត់ការតាមផ្លូវច្បាប់ ។

ជនសង្ស័យ ១-ឈ្មោះ សុខ ស្រីកា ភេទទី៣ អាយុ២១ឆ្នាំ មុខរបរជាងអ៊ុតសក់ ស្នាក់នៅសង្កាត់បឹងទំពុន ខណ្ឌមានជ័យ ជាអ្នកបើកម៉ូតូម៉ាកស្គុបពី ពណ៌ស ពាក់ស្លាកលេខភ្នំពេញ១FU ៤៤១៣ និង២-ឈ្មោះ រ៉ា នីហ្សា ភេទទី៣ អាយុ២១ឆ្នាំ មុខរបរជាងអ៊ុតសក់ ស្នាក់នៅបន្ទប់ជួលសង្កាត់បឹងទំពុន ខណ្ឌមានជ័យ មិនបានសារភាពទេ ទោះបីជនរងគ្រោះជាជនបរទេស៣នាក់មកចង្អុលបង្ហាញក៏ដោយ ក៏នៅតែប្រកែកតឹងសរសៃ.ក ។ តែបើយោងតាមពាក្យបណ្ដឹងពីជនរងគ្រោះ និងសាក្សីជាជនជាតិខ្មែរ បានជួយដេញចាប់តាំងពីសង្កាត់បឹងកេងកងទី១ ខណ្ឌចំការមន រហូតដល់សង្កាត់ទួលស្វាយព្រៃទី១ ខណ្ឌចំការមន ហើយនិងកសាងសំណុំរឿងបញ្ជូលទៅអធិការដ្ឋាននគរបាលខណ្ឌចំការមន ដើម្បីចាត់ការបន្ត ។