មន្ត្រីចម្រុះចុះពិនិត្យរកទំនិញខូចគុណភាព និងផុតកាលបរិច្ឆេទ

មន្ត្រីចម្រុះចុះពិនិត្យរកទំនិញខូចគុណភាព និងផុតកាលបរិច្ឆេទ

ខេត្តបន្ទាយមានជ័យ ៖ មន្ត្រីចម្រុះចុះពិនិត្យរកទំនិញខូចគុណភាព និងផុតកាលបរិច្ឆេទនៅតាមតូបស្តង់ និងផ្សារក្រុងជាប់ជាយដែនដែលព្រួយបារម្ភដែលទំនិញនាំចូលពីប្រទេសជិតខាង ដែលត្រូវបានធ្វើឡើងនៅថ្ងៃទី០៦ ខែកញ្ញា ឆ្នាំ២០១៦ នៅក្រុងប៉ោយប៉ែត។

លោក ហុង លៀង អនុប្រធានសាខាកាំកុងត្រូលខេត្តបន្ទាយមានជ័យបានឲ្យដឹងថា ដោយមានការណែនាំពីរដ្ឋមន្ត្រីក្រសួងពាណិជ្ជកម្ម និងនាយកដ្ឋានកាំកុងត្រូល ដែលដឹកនាំពីលោក មាស ចាន់ពិសិទ្ធិ ព្រះរាជអាជ្ញាសាលាដំបូងខេត្តបន្ទាយមានជ័យ បានដឹកនាំកម្លាំងចម្រុះមានមន្ត្រីសាខាកាំកុងត្រូលខេត្ត សហការណ៍ជាមួយមន្ត្រីមន្ទីរពាណិជ្ជកម្មខេត្ត កម្លាំងនគរបាលប្រឆាំងបទល្មើសសេដ្ឋកិច្ចក្រសួង និងខេត្ត។

បានចុះពិនិត្យរកទំនិញខូចគុណភាពនិងផុតកាលបរិច្ឆេទប្រើប្រាស់នៅតាមតូបស្តង់ ទីផ្សាក្នុងក្រុងប៉ោយប៉ែត ដែលចុះអនុវត្តនោះគឺរកឃើញមានទំនិញដែលដាក់លក់ មានទំនិញដែលខុចគុណភាព និងផុតការបរិច្ឆេទប្រើប្រាស់មួយចំនួន ត្រូវបានមន្ត្រីចម្រុះរឹបអូសយក និងម្ចាស់ត្រូវបានធ្វើកិច្ចសន្យាអប់រំឲ្យបញ្ឈប់ការលក់ដូររាល់ទំនិញដែលហាមឃាត់។

លោក សៀន ស៊ីណាត ប្រធានសាខាកាំកុងត្រូលខេត្តបានបន្តថា មន្ត្រីចម្រុះដែលចុះអនុវត្តរកទំនិញដែលហាមឃាត់នៅក្រុងជាប់ជាយដែននេះ ព្រោះមានការណែនាំខ្ពស់ពីរដ្ឋមន្ត្រីក្រសួងពាណិជ្ជកម្មខណៈដែលចុះមកដុតកម្ទេចទំនិញខូចគុណភាពជាងមួយតោនកាលពីថ្មីៗនៅក្រុងប៉ោយប៉ែត។ ហើយជាការយកចិត្តទុកដាក់ចំពោះសុខមាលភាពបងប្អូនប្រជាពលរដ្ឋមន្ត្រីចម្រុះបានចុះជាប្រចាំរកទំនិញដែលខូចគុណភាព និងផុតកំណត់ការប្រើប្រាស់ដែលប្រឈមប៉ះពាល់សុខភាព។

លោកបានបន្តថា នៅពេលចុះរកទំនិញខូចគុណភាពបានណែនាំ និងអប់រំដល់អាជីករត្រូវបញ្ឈប់ការលក់ដូរទំនិញដែលខូចគុណភាពបើឃើញមានលើកក្រោយមន្ត្រីជំនាញនឹងមានវិធានការតាមច្បាប់ និងត្រូវចូលរួមថែរក្សាសុខមាលភាពជូនប្រជាពលរដ្ឋ៕

ប្រភព ៖ កោះសន្តិភាព

កំណត់ហេតុខ្មែរឡូត៖

គួររំលឹដព័ត៌មានចាស់ដែរថា មន្ត្រីកាំកុងត្រូល នៃសាខាកាំកុងត្រូលខេត្តសៀមរាប និងអាកាសយានដ្ឋានអន្តរជាតិសៀមរាប នៅថ្ងៃទី០៣ ខែកញ្ញា ឆ្នាំ២០១៦ កន្លងទៅ សហការជាមួយមន្ទីរពាណិជ្ជកម្ម បានបន្តចុះពិនិត្យ និងផ្សព្វផ្សាយ អំពីគុណភាព និងសុវត្ថិភាពម្ហូបអាហារ ដែលដាក់តាំងលក់តាមផ្ទះលក់ទំនិញ ស្ថិតនៅតាមសងខាងផ្លូវ ៦០ម៉ែត្រ ក្នុងសង្កាត់ស្លរក្រាម ក្រុងសៀម រាបខេត្តសៀម រាប ( ផ្លូវទៅកាន់ អង្គរ ឃ្យុងយូ )។

មន្រ្តីកាំកុងត្រូលបានឲ្យដឹងថា បន្ទាបពីការពិនិត្យ មើលលើផលិតផលកំប៉ុង ដប និងផលិតផលវិចខ្ចប់រួច ដែលកំពុងដាក់តាំងលក់នៅតាមផ្ទះមួយចំនួនលទ្ធផល ពិនិត្យឃើញមានផលិតផលមួយចំនួនប្រែប្រួលខូចគុណភាព ហួសកាលបរិច្ឆេទ ប្រើប្រាស់ ហើយត្រូវបានសាខាកាំកុងត្រូលខេត្ត សៀម រាប ធ្វើកំណត់ហេតុដកហូត យកមករក្សាទុក ដើម្បីស្នើសុំគោលការណ៏កំទេចចោលនៅពេលក្រោយ។

មន្រ្តីកាំកុងត្រូលបានឲ្យដឹងថា បន្ទាប់ពីបានពិនិត្យ ទំនិញដែលដាក់តាំងលក់នៅ តាមសងខាងផ្លូវ ៦០ម៉ែត្រ ក្នុងសង្កាត់ស្លរក្រាម ក្រុងសៀម រាបខេត្តសៀម រាប ( ផ្លូវទៅកាន់ អង្គរ ឃ្យុងយូ ) បានរកឃើញផលិតផលខូចគុណភាពដែលបានដកហូតរួមមាន ៖

_ ទឹកក្រូចដបជ័រខ្នាតធំចំណុះ ១.២៥លីត្រ ផលិតនៅប្រទេសថៃ ចំនួន១៤ដប ។

_ ទឹកក្រូចដបជ័រចំណុះ ០.៤៥លីត្រ ផលិតនៅប្រទេសថៃ ចំនួន៤៥ដប ។

_ ទឹកដោះគោឆៅប្រអប់ក្រដាស (Chock Chai Farm) ផលិត នៅថៃ ចំនួន១៨ប្រអប់ ។

_ នំដំឡូងស្រួយ សណ្តែកដីកញ្ចប់ និងនំកញ្ចប់ស្រួយផលិតនៅប្រទេសថៃចំនួន ២០កញ្ចប់ ។

ជាមួយគ្នានោះ លោក ង៉ែត ចេក ប្រធានសាខាកាំកុងត្រូលសាខាសៀមរាប និងអាកាសយានដ្ឋានអន្តរជាតិសៀម រាប ក៏បានសំណូមពរដល់អាជីវករទាំងអស់ សូមកុំខឹងមន្រ្តីរបស់លោក ដែលចុះ ទៅ ពិនិត្យ និងដកហូតទំនិញខូចគុណភាពទាំងនោះ ព្រោះថា បើមិនដកហូតទេ មិនដឹងថា ប្រជាពលរដ្ឋ ប៉ុន្មាននាក់ ដែលទទួលទាន ហើយខូចសុខភាពនោះ។

ជាមួយគ្នានេះដែរ លោកក៏បានអំពាវនាវ ដល់អាជីវករ អ្នកលក់ដូរទាំងអស់ ឲ្យប្រុងប្រយ័ត្ន និងយកចិត្តទុកដាក់ខ្ពស់ គឺលក់ដូរ និងចែកចាយតែ ទំនិញ ផលិតផលម្ហូបអាហារណាដែលមានគុណភាព មិនប៉ះពាល់ដល់ សុខមាលភាព អ្នកប្រើប្រាស់។

ជាមួយនិងការណែនាំរបស់លោក ម៉ក់ ពេជ្ជរិទ្ធ ប្រតិភូរាជរដ្ឋាភិបាល ទទួលបន្ទុកអគ្គកាំកុងត្រូល នៃក្រសួងពាណិជ្ជកម្ម សាខាកាំក្រុងទូទាំងប្រទេស បាននិងកំពុងបន្តយុទ្ធនាការ ចុះត្រួតពិនិត្យមើលទំនិញ ដែលដាក់លក់តាមទីផ្សារ ដើម្បីចូលរួមចំណែកលើការការពារ សុវត្ថិភាពចំណីអាហារ ដល់ប្រជាពលរដ្ឋ៕