​(ភ្នំពេញ)៖ តារាសម្តែងប្រុសមានឈ្មោះល្បី​ និងមានចិត្តមនុស្សធម៌ លោក​ អ៉ឹម ជីវ៉ា ក្រោ​យ​​​ពី​រងនូវអំពើ​អយុត្តិធម៌ ត្រូវប្អូនប្រុសលោក​ឧកញ៉ា​ល្បីឈ្មោះម្នាក់ និងត្រូវជាសង្សារ​ តារា​សម្តែ​ង នាង ពេជ្រ អាវីហ្សា ប្រមាថគំរាមបាញ់សម្លាប់ នៅមុខក្លឹប៥៥ កាលពីយប់ថ្ងៃទី០៤ ខែកញ្ញា ឆ្នាំ២០១៦នោះ ឥឡូវត្រូវបានបញ្ចប់គ្នា​ហើយ ដោយលោកព្រមទទួលយក​ ត្រឹមពាក្យសុំទោស ពីសំណាក់បុរសចិត្ត​កំណាចម្នាក់នោះ ហើយក៏មិនមានការប្ដឹងប្ដល់ ទារសំណងជំងឺចិត្ត ​អ្វីឡើយ។

លោក អ៉ឹម ជីវ៉ា បានសរសេរបង្ហោះ នៅលើបណ្តាញសង្គម​ហ្វេសប៊ុក កាលពី​ប៉ុន្មានម៉ោ​ង មុននេះ​​ថា «រឿងរ៉ាវទាំងអស់ ត្រូវបានបញ្ចប់ត្រឹមល្ងាចនេះ ហើយដោយមានការសុំទោស និងយោគយ​ល់​គ្នារវាងខ្ញុំបាទ និងក្រុមគ្រួសារ​ប្អូនរបស់ឧកញ៉ា ដែលល្បីឈ្មោះមួយរូប អ្នកដែលគំរាមសម្លាប់ខ្ញុំបាទ ដោយខ្ញុំបាទព្រមដកពាក្យបណ្តឹង ហើយក៏មិនត្រូវការសំណង សូម្បីតែមួយរយលុយខ្មែរ ដោយទទួលយកការសុំទោស ពីអ្នកដែលគំរាមបង្ករហេតុ!»។

តារាប្រុស​លោក អ៉ឹម ជីវ៉ា បានបន្តថា «ខ្ញុំបាទក៏សូមថ្លែងអំណរគុណ ដល់​លោកមេធា​វី ស្ថាប័ននានា និង​ក្រសួងពាក់ព័ន្ធ ក៏ដូចជាអង្គការក្នុង និងក្រៅរដ្ឋាភិបាល សារពត៌មានទាំងអ​ស់ ដែលបានសរសេរជួយ​ចេញមុខការពារ និងបារម្ភអំពីសុវត្ថិភាពរបស់ខ្ញុំបាទ ជាពិសេសបងប្អូន​ទស្សនិកជន»។

«ខ្ញុំបាទក៏សូមសំណូមពរ ដល់លោកឧកញ៉ាមួយចំនួន ដែលមានកូន ប្អូន ឬក្មួយ ដែលមានចរឹតកោ​ងកាច ប្រើអំណាច លុយកាក់ធ្វើបាបមើលងាយអ្នកក្រ សូមអប់រំ ប្អូន កូនឬក្មួយឲ្យល្អផង កុំចេះអាងតែមានលុយ ធ្វើបាបអ្នក្រខ្សត់។ ជាពិសេសឲ្យសមនឹងពាក្យ មានលុយ មានកិត្តិ​យស ឲ្យស័ក្តិសមតាមគោរម​ងារ ដែលព្រះមហាក្សត្រ ព្រះអង្គប្រទានជូន !»។ នេះជាការថ្លែ​ងបញ្ជាក់ បន្ថែមពីលោក អ៉ឹម ជីវ៉ា​។

សូមបញ្ជាក់ថា តារាសម្ដែង និងជាពិធីករ លោក អ៉ឹម ជីវ៉ា បានជួបនូវរឿងរ៉ាវ​មិននឹកស្មានដល់មួយ នាយប់ថ្ងៃទី០៤ ខែកញ្ញា បន្ទាប់​ពីបានប៉ះពាក្យសម្ដី​គ្នាខ្លាំងៗ ជាមួយបុរសម្នាក់​ដែលគេស្គាល់ថា ជាគូស្នេហ៍របស់តារាសម្ដែង សាច់សខ្ចីសិចស៊ី នាង ពេជ្រ អាវីហ្សា និងត្រូវជាប្អូនប្រុស របស់លោកឧកញ៉ា​សម្បូរទ្រព្យ មានឈ្មោះល្បី​ខាងជំនួញម្នាក់ផងដែរ រហូតដល់បុរសជាប្អូនប្រុសលោកឧកញ៉ា បានប្រើពាក្យប្រមាថកាតទាន​ធ្ងន់ធ្ងរ និងគំរាមសម្លាប់ លោក អ៉ឹម ជីវ៉ា ទៀតផង។

ទង្វើមិនសមរម្យ អាងទ្រព្យសម្បត្តិ អាចអំណាចបងប្រុស​​ជាឧកញ៉ាបែបនេះ បានធ្វើឲ្យមហាជនធ្វើការ​រិះគន់ធ្ងន់ៗ ចំពោះកាយវិការ​មិន​អាចទទួល​យក​បាន ពីសំណាក់ប្អូនប្រុស លោកឧកញ៉ារូបនោះ ប៉ុន្តែដោយសារតែខ្លាចសំណាញ់ច្បាប់ និងមានការយោគយល់ ពីលោក អ៉ឹម ជីវ៉ា ផងនោះ ទើបលោក​ព្រមទទួលយក ការសុំទោសពីជនបង្កហេតុ ហើយស្នើកុំមានទង្វើបែបនេះ​ ជាមួយរូបលោក និងអ្នកដទៃបន្តទៀត៕

ប្រភព ៖ Khmertalking

កំណត់ហេតុខ្មែរឡូត៖

គួររំលឹកព័ត៌មានពាក់ព័ន្ធ កាលពីលើកមុនផងដែរថា អ៉ឹម ជីវ៉ា ត្រូវ​​បង​ប្អូន​លោក​ឧក​ញ៉ា​​ល្បី​ម្នាក់ គំរាម​​បាញ់​​សម្លាប់ មុខ​​​ក្លឹប​៥៥ ​ដោយ​​គ្រាន់​​តែ​​សំ​ឡឹង​​​មុខ ។ គួររំលឹកផងដែរថា តារាសម្តែងប្រុស និងជាពិធីកររូបសង្ហា ចូលចិត្តជួយអ្នកសិល្បៈចាស់ជរា បាត់បង់សមត្ថភាពលោក អ៉ឹម ជីវ៉ា នាយប់ថ្ងៃទី០៤ ខែកញ្ញា ឆ្នាំ២០១៦ នេះ ត្រូវបានបុរម្នាក់ដែលត្រូវគេស្គាល់ថា ជាប់ខ្សែស្រឡាយលោកឧកញ៉ាម្នាក់ បានធ្វើការគំរាមបាញ់សម្លាប់ នៅក្នុងក្លឹបកំសាន្តមួយកន្លែង កណ្តាលក្រុងភ្នំពេញ បន្ទាប់ពីមានការប៉ះពាក្យសម្ដីគ្នា រហូតមានកំហឹងគំគួន ស្ទើរតែទប់លែងបាន។

លោក អ៉ឹម ជីវ៉ា បានសរសេរបង្ហោះ នៅលើបណ្តាញសង្គមហ្វេសប៊ុករបស់ខ្លួន កាលពីកន្លះម៉ោងមុននេះថា «សូមជំរាបជូនសារព័ត៌មាន គ្រប់ស្ថាប័ន ទាំងទូរទស្សន៍ កាសែត និងវេបសាយទាំងអស់ ទាក់ទងទៅនឹងបុគ្គលអ្នកមាន ខ្សែឧកញ៉ាល្បីមួយរូប បានប្រមាថដល់អាយុជីវិតខ្ញុំ ប៉ុនប៉ងគំរាមសម្លាប់ខ្ញុំ កាលពីរាត្រីថ្ងៃទី០៤ ខែកញ្ញា ឆ្នាំ២០១៦ នៅខាងមុខក្លឹប៥៥!»។

តារាសម្តែងលោក អ៉ឹម ជីវ៉ា បានបញ្ជាក់ប្រាប់ពីដំណើររឿងថា« មូលេហេតុដែលកើតឡើង ដោយសារតែខ្សែឧកញ៉ាម្នាក់នេះ ផឹកស៊ីដើជេគេឯង គេមើលមុខមិនបាន ដោយគាត់អាងខ្លួនឯង ជាអ្នកមានខ្សែឧកញ៉ា និងអាងមានលុយ ពេលនេះខ្ញុំសូមផ្អាកសិនហើយ ខ្ញុំបាទនិងជំរាបជូនពេលក្រោយ!»។

តារាសម្តែង និងជាពិធីករប្រុស លោក អ៉ឹម ជីវ៉ា បានបន្ថែមថា «ខ្ញុំបាទក៏បានធ្វើសេចក្តីជូនដំណឹង ដល់ស្ថាប័ន និង ក្រសួងពាក់ព័ន្ធ ក៏ដូចជាអង្គការក្រៅ និងក្នុងរដ្ឋាភិបាលមួយចំនួនរួចហើយដែរ នូវបញ្ហាមួយនេះ ។ សង្ឃឹមថា បងៗនិងប្អូនៗសារព័ត៌មាន និងយោគយល់!»។

ខ្មែរឡូត