ចិន៖ ស្ពាន Puli គ្រាន់តែជាខ្សែតភ្ជាប់ចរាចរណ៍មួយប៉ុណ្ណោះ សម្រាប់អ្នកធ្វើដំណើរក្នុងតំបន់ តែធាតុពិតស្ពានឆ្លងកាត់ជ្រលងភ្នំកម្ពស់១,៦០០ហ្វីត (ជាង ៤៨៧ម៉ែត្រ) មួយនេះ ពិតជាស្រស់ស្អាត និងមិនគួរឲ្យជឿ ប្រសិនបើមើលពីលើមេឃ។

វីដេអូដ៏គួរឲ្យចាប់អារម្មណ៍មួយ បានចាប់យកទិដ្ឋភាពដ៏ស្រស់ស្អាតទាំងស្រុង នៃស្ពាន Puli ដែលជាស្ពានខ្ពស់ជាងគេបំផុតមួយ ជាប់ចំណាត់ថ្នាក់លេខ៨ ក្នុងចំណោម១០ របស់ពិភពលោក មានទីតាំងស្ថិតនៅក្នុងខេត្ត Yunnan ភាគនិរតីប្រទេសចិន។

វីដេអូមួយដែលមានរយៈពេល ត្រឹមតែ ២៧វិនាទី បង្ហាញពីភាពស្រស់ស្អាតរបស់ស្ពានមួយនេះហ៊ុំព័ទ្ធទៅដោយជួរភ្នំជាច្រើន ឆ្ងាយដាច់កន្ទុយភ្នែក។

ស្ពានឆ្លងកាត់ជ្រលងភ្នំមួយនេះ ត្រូវបានសាងសង់ស្ទើតែរួចរាល់ទៅហើយ កាលពីថ្ងៃទី២៥ ខែសីហា ឆ្នាំ២០១៥ មកម្ល៉េះ ជាមួយប្រវែង ៣,៤១២ហ្វីត (១,០៤០ម៉ែត្រ) និងចំណាយ់ទឹកប្រាក់អស់ ៨០លានផោន ឬប្រមាណ ១០៥លានដុល្លារអាមេរិក និងចំណាយពេល៥ឆ្នាំក្នុងការសាងសង់។ វាត្រូវបានសាងសង់ឡើងនៅខាងក្រៅក្រុង Xuanwei ក្នុងខេត្ត Yunnan ដែលជាផ្នែកមួយនៃខ្សែតភ្ជាប់ទៅកាន់ខេត្ត Guizhou ។

ស្ពាននេះសាងសង់ឡើងនៅលើជ្រលងភ្នំ​ ដែលមានកម្ពស់ជាង៤៨៧ម៉ែត្រ ដែលកម្ពស់នេះវាប្រហាក់ប្រហែល ទៅនឹងមជ្ឈមណ្ឌលហិរញ្ញវត្ថុពិភពលោក ក្នុងទីក្រុងសៀងហៃ ដែលជាអគារខ្ពស់បំផុតទី១០ របស់ពិភពលោក៕ 

ប្រភព ៖ បរទេស

ខ្មែរឡូត