សោកនាដកម្មរថយន្តបុកគ្នា ស្លាប់៩នាក់របួសធ្ងន់៤នាក់

សោកនាដកម្មរថយន្តបុកគ្នា ស្លាប់៩នាក់របួសធ្ងន់៤នាក់

ខេត្តបាត់ដំបង ៖ យោងតាមសេចក្ដីរាយការណ៍ បឋមរបស់មន្ត្រីចរាចរណ៍ បានឲ្យដឹងថា យ៉ាងហោចណាស់មនុស្ស៩នាក់ បានស្លាប់នៅកន្លែងកើតហេតុ និងចំនួន៤នាក់ទៀតរងរបួសធ្ងន់ នៅក្នុងឧប្បត្តិហេតុគ្រោះថ្នាក់ ចរាចរណ៍ដ៏រន្ធត់មួយ រវាងរថយន្តដឹកដី និងរថយន្តដឹកអ្នកដំណើរ ដែលបានបុកគ្នាកាលពីវេលាម៉ោង ៣និង៣០នាទី រសៀល ថ្ងៃទី២៩ ខែសីហា នៅលើផ្លូវជាតិលេខ៥ ត្រង់ចំណុចភូមិព្រៃដំរី ឃុំព្រៃតូច ស្រុកមោងឬស្សី។

នាយផ្នែកដំណោះស្រាយចរាចរណ៍ នៃការិយាល័យចរាចរណ៍ខេត្ត លោកម៉ែន បូរី បានឲ្យដឹងថា ឧប្បត្តិហេតុគ្រោះថ្នាក់ចរាចរណ៍ ដ៏រន្ធត់នេះបង្កឡើងដោយ រថយន្តដឹកដី ដែលធ្វើដំណើរពីទិស ខាងកើតឆ្ពោះទៅខាងលិច ហើយបានព្យាយាមបើកឡើងជែងរថយន្តមួយគ្រឿង ដែលបើកស្របទិស ក៏បានជ្រុលទៅបុករថយន្តដឹកអ្នកដំណើរដែល បើកបញ្ច្រាសទិស មកពីខាងមុខពេញទំហឹងតែម្ដង។

លោក ម៉ែន បូរី បានបញ្ជាក់ថា រថយន្តដឹកអ្នកដំណើរនោះ គឺរបស់ក្រុមហ៊ុន «មេគង្គ អ៊ិចប្រេស» ប្រភេទ១៤កៅអី ដែលដឹកអ្នកដំណើរពីខេត្តបាត់ដំបង ទៅរាជធានីភ្នំពេញ។

លោកថា ករណីនេះបានធ្វើឲ្យអ្នកដំណើរ ចំនួន៩នាក់ ក្នុងនោះ៥នាក់ជាស្ដ្រីបានស្លាប់នៅនឹងកន្លែង រីឯ៤នាក់ទៀតរងរបួស ធ្ងន់។ សាក្សីនិយាយថា រថយន្តដឹកដីនោះបានបើកបរក្នុងស្ថានភាព បែបបំពានច្បាប់ចរាចរណ៍ ពេលជិតដល់កន្លែងកើតហេតុ គេឃើញរថយន្តដឹកដីនេះ បន្ថែមល្បឿនឡើងជែងរថយន្តមួយ គ្រឿងនៅខាងមុខខ្លួន ស្របពេលរថយន្តដឹក អ្នកដំណើរមកពីខាងមុខ បួងចង្កូតគេចមិនទាន់ក៏ បុករថយន្តដឹកអ្នកដំណើរទាំងកំរោលតែម្ដង។

សាក្សីបញ្ជាក់បន្ថែមថា រថយន្តដឹកអ្នកដំណើរ ធ្លាក់ចេញពីផ្លូវជាតិ រីឯមនុស្សជិះក្នុងរថយន្តដឹកអ្នកដំណើរ ស្ទើរទាំងអស់បានស្លាប់ និងរបួសគាបជាប់ក្នុងរថយន្ត ហើយអ្នកភូមិបានជួយអន្តរាគមន៍ភ្លាមៗ ដែរមុនពេលសមត្ថកិច្ចមកដល់។

លោកម៉ែន បូរី នាយផ្នែកដំណោះស្រាយចរាចរណ៍ បានធ្វើការសន្និដ្ឋានជាបឋមថា បើតាមការពិនិត្យ កន្លែងកើតហេតុ គឺកំហុសភាគច្រើនបង្កឡើងដោយភាគីរថយន្តដឹកដី ដែលបើកឡើង ជែងរថយន្តគេទាំងបំពានច្បាប់។ ប៉ុន្តែលោកបានបញ្ជាក់ថា អ្នកបើកបររថយន្ត បានស្លាប់ទាំងសងខាង ។

សមត្ថកិច្ចកំពុងជួយបញ្ជូន អ្នករបួសទៅកាន់ មន្ទីរពេទ្យ ខណៈសាកសពមួយចំនួនគាបជាប់ក្នុងរថយន្ត ហើយទាំងសមត្ថកិច្ចទាំង ពលរដ្ឋកំពុងជួយអន្តរាគមន៍យ៉ាងពេញទំហឹងផងដែរ៕