កម្មករសំណង់ម្នាក់ ក្រោយកាប់មិត្តភក្តិរងរបួសធ្ងន់ សម្រេចចិត្តលោតពីលើផ្ទះជាន់ទី៣ សម្លាប់ខ្លួន

កម្មករសំណង់ម្នាក់ ក្រោយកាប់មិត្តភក្តិរងរបួសធ្ងន់ សម្រេចចិត្តលោតពីលើផ្ទះជាន់ទី៣ សម្លាប់ខ្លួន

(ភ្នំពេញ)៖ បុរសកម្មករម្នាក់ បានលោតពីលើផ្ទះជាន់ទី៣ បណ្តាលឲ្យស្លាប់ភ្លាមៗតែម្តង ក្រោយពីរូបបានយកកាំបិតបុ័ងតោ ទៅកាប់មិត្តភក្តិរបួសធ្ងន់ នៅវេលាម៉ោង១២៖១០នាទីយប់ ឈានចូលថ្ងៃ២៧ ខែសីហា ឆ្នាំ២០១៦ នៅចំណុចសំណង់ផ្ទះល្វែង សង់មិនទាន់រួចតាមផ្លូវ៣៧១ ស្ថិតនៅភូមិត្នោតជ្រុំ៣ សង្កាត់បឹងទំពុន ខណ្ឌមានជ័យ។

សមត្ថកិច្ចមូលដ្ឋានបានឲ្យដឹងថា នៅពេលយប់នោះ ជនរងគ្រោះបានឈ្លោះជាមួយមិត្តភក្តិរបស់ខ្លួន រហូតទាញកាំបិត ទៅកាប់បណ្តាលឲ្យរងរបួសធ្ងន់ ត្រូវបានបញ្ជូនទៅកាន់មន្ទីរពេទ្យកាល់ម៉ែត។

ក្រោយមានហេតុការណ៍នេះកើតឡើង សង្ស័យជនរងគ្រោះស្តាយក្រោយ ឬខ្លាចសមត្ថកិច្ចចាប់ខ្លួននោះ ក៏សម្រេចចិត្តលោតពីលើផ្ទះជាន់ទី៣តែម្តង បណ្តាលឲ្យស្លាប់ភ្លាមៗ។

ក្រោយកើតហេតុកម្លាំងសមត្ថកិច្ច បានចុះទៅសួរនាំ និងដើម្បីប្រគល់សាកសពទៅក្រុមគ្រួសារ យកទៅធ្វើបុណ្យតាមប្រពៃណី៕

ប្រភព ៖ Freshnews

កំណត់ហេតុខ្មែរឡូត៖

ដោយឡែក ករណីមួយផ្សេងទៀត កាលពីលើកមុន សេចក្តីរាយការណ៍បឋមឱ្យដឹងថា មានការភ្ញាក់ផ្អើលមួយ បន្ទាប់ពីនារីម្នាក់បានខូចចិត្តជាមួយសង្សារ ក៏ឡើងទៅលើដំបូលផ្ទះលោតចុះមកក្រោម បណ្តាលឱ្យរងរបួសបាក់ចង្កេះ ដែលហេតុការណ៍នេះកើតឡើង កាលពីវេលាម៉ោង១០ព្រឹកថ្ងៃទី១៦ សីហា ២០១៦ ស្ថិតនៅចំណុចផ្ទះក្នុងភូមិចំការដូង សង្កាត់ច្បារមន ក្រុងច្បារមន ខេត្តកំពង់ស្ពឺ ។

ប្រភពឱ្យដឹងថា នារីរងគ្រោះឈ្មោះអាទី អាយុ២៦ឆ្នាំ មានសង្សារឈ្មោះម៉េច សាម៉ន ។ ប្រភពបន្តថា មុនពេលកើតហេតុ អ្នកនៅក្នុងផ្ទះមិនបានដឹងថា នារីរងគ្រោះលោតពីលើផ្ទះនោះទេ ភ្ញាក់ផ្អើលពេលឮសូរសំលេងក្រាំង ទើបស្ទុះចេញមកមើល ក៏ឃើញនារីរងគ្រោះដេកដួលបាត់ទៅហើយ តែមិនសន្លប់ទេ ។

បើតាមការឱ្យដឹងពីនារីរងគ្រោះថា នាងចង់ស្លាប់ ព្រោះតែសង្សារមិនព្រមមកជួបជាច្រើនថ្ងៃមកហើយ ទើបឈឺចិត្តមិនអាចទ្រាំរស់តទៅទៀតបាន ។ បន្ទាប់ពីកើតហេតុ នារីរងគ្រោះត្រូវបងប្អូនដឹកបញ្ជូនទៅសង្គ្រោះភ្លាមៗដែរ ។