ខេត្តសៀមរាប ៖ ចាប់ពី​ពេល​នេះ​តទៅ ភ្នាក់ងារទេសចរណ៍​ ដែល​ឈរជើង​តាម​ទីតាំង​ប្រាសាទផ្សេង​ៗ​ មាន​កញ្ចប់​សង្គ្រោះ​បឋម​ ជាប់​តាម​ខ្លួន​ជា​ប្រចាំ​ហើយ ។

កញ្ចប់​សង្គ្រោះ​បឋម​នេះ ​នឹង​ប្រើប្រាស់​សម្រាប់​ជួយ​ ដល់​ភ្ញៀវ​ទេសចរ​ ដែល​មាន​ជំងឺ​តិចតួច ឬ​ប៉ះទង្គិចផ្សេង​ៗ​ ក្នុង​ដំណើរ​ទស្សនា​របស់​ខ្លួន ។ កញ្ចប់​នេះ​មាន​សម្ភារ សំខាន់​ៗ​មួយ​ចំនួន​ដូច​ជា ប្រេងខ្យល់ ប្រេងកូឡា ថ្នាំ​បេ​តា​ឌី​ន កុំ​ប្រេស បង់​បិទ​ដំបៅ បង់​រុំ​របួស ស្រោមដៃ និង​កន្ត្រៃ​ជាដើម ។

តាម​ការ​បញ្ជាក់​ពី​លោក​សុខ សង្វារ អគ្គនាយករង​ ទទួល​បន្ទុក​នាយកដ្ឋាន​អភិវឌ្ឍន៍​និង​គ្រប់គ្រង​ ទេសចរណ៍​អង្គរ​ នៃ​អាជ្ញាធរ​ជាតិ​អប្សរា​ថា ការ​បំពាក់​កាបូប​សង្គ្រោះ បឋម​តាម​ខ្លួន​ដល់​ ភ្នាក់ងារទេសចរណ៍​ គ្រប់​រូប​ដែល​ឈរជើង​ តាម​ប្រាសាទ​ក្នុង​តំបន់​អង្គរ គឺ​ដើម្បី​ឱ្យ​ភ្នាក់ងារ​ទាំងអស់​ អាច​ជួយ​សង្គ្រោះ​ភ្ញៀវ​ បាន​ទាន់​ពេលវេលា ពេល​ភ្ញៀវ​ទេសចរ​មាន​ បញ្ហា​សុខភាព​ដូច​ជា ខ្យល់គរ វិលមុខ ឈឺ ក្បាល ថ្លោះ គ្រេច​ដៃជើង ឬ​រង​របួសស្រាល​ ដោយ​ប្រការ​ណាមួយ​ ខណៈ​កំពុង​ទស្សនា ។

ភ្ញៀវ​ទេសចរ​ជា​ច្រើន​ បាន​សម្តែង​ភាព​សប្បាយ​រីករាយ នៅ​ពេល​ដែល​ពួក​គាត់​មាន​បញ្ហា ហើយ​ត្រូវ​បាន​ភ្នាក់ងារ​ទេសចរ​ នៃ​អាជ្ញាធរ​ជាតិ​អប្សរា ជួយ​ពួក​គាត់​បាន​ទាន់​ពេលវេលា ។ នេះ​ជា​សេវាកម្ម​មួយ​ថ្មី​បន្ថែម​ទៀត ដែល​អាជ្ញាធរ​ជាតិ​អប្សរា​តែង​យកចិត្តទុកដាក់​ ចំពោះ​ភ្ញៀវ​ទេសចរ ដែល​មក​ទស្សនា​ រមណីយដ្ឋាន​អង្គរ ។

កាលពី​ពេល ថ្មី​ៗ​កន្លង​ទៅ​នេះ អាជ្ញាធរ​ជាតិ​អប្សរា​ក៏​បាន​សហការ​ជាមួយ​គ្រូពេទ្យ​ស្ម័គ្រចិត្ត​មក​ពី​ សហរដ្ឋអាមេរិក បណ្តុះបណ្តាល​វិធី​សង្គ្រោះ​បឋម​ដល់​ភ្នាក់ងារ​ទេសចរ នគរបាល​ការពារ​ បេតិកភណ្ឌ និង​នគរបាល​ទេសចរណ៍ ដែល​ជា​ស្ថាប័ន​ពាក់ព័ន្ធ​បំផុត​ជាមួយនឹង​ដំណើរ​ទស្សនា​របស់​ភ្ញៀវ ។

ភ្នាក់ងារទេសចរណ៍​ ដែល​ឈរជើង​ ជា​ប្រចាំ​នៅ​តាម​ប្រាសាទ​នានា​ ក្នុង​តំបន់​រមណីយដ្ឋាន​អង្គរ​ សព្វថ្ងៃ​មាន​ចំនួន​ ៤១៣​នាក់ ។ ភ្នាក់ងារ​ទាំងអស់​មាន​ភារកិច្ច​សំខាន់​ក្នុង​ការ​សម្របសម្រួល​ លំហូរ​ភ្ញៀវ​ទេសចរ​នៅ​ក្នុង​ប្រាសាទ ការពារ​ប្រាសាទ​ពី​ការ​ប៉ះពារ​របស់​ភ្ញៀវ​ជា​ប្រចាំ ជំរុញ​ឲ្យ​ភ្ញៀវ​ទេសចរ​គោរព​ តាម​ក្រម​ប្រតិបត្តិ​អង្គរ ការ​ជួយ​សម្រួល​ភ្ញៀវ​ ក្នុង​ករណី​បាត់បង់​សម្ភារ ជា​ពិសេស​គឺ​ជួយ​ សង្គ្រោះ​ភ្ញៀវ​ដែល​ជួបនឹង​គ្រោះថ្នាក់ផ្សេង​ៗ ៕

ប្រភព ៖ កោះសន្តិភាព

កំណត់ហេតុខ្មែរឡូត៖

គួររំលឹកព័ត៌មានចាស់ដែរថា ក្រុមអ្នកជំនាញជាតិ និងអន្តរជាតិ សហការគ្នា ​លើការ​ជួសជុល​ប្រាសាទអង្គរវត្ត ដោយសារ​ចាស់​ទ្រុឌទ្រោម ។ ប្រាសាទបុរាណខ្មែរ នៅសៀមរាបអង្គរ៩១ប្រាសាទ ត្រូវបានចាត់បញ្ចូលក្នុងបញ្ជីបេតិកភណ្ឌពិភពលោក ក្នុងចំណោមនោះ ប្រាសាទអង្គរវត្ត ដែលបានសាងសង់ឡើង ក្នុងរាជ្យព្រះបាទសូរ្យវរ្ម័នទី២ នាដើមសតវត្សទី១២ កំពុងទទួលបាននូវ ការចាប់អារម្មណ៍ជាងគេ ពីសំណាក់អ្នកទេសចរអន្តរជាតិ ដែលបានមកទស្សនាតាមរយ:ការឲ្យតម្លៃលើស្នាដៃសិល្បៈ ស្ថាបត្យកម្ម និងចម្លាក់នានា ប្រកបដោយភាពរស់រវើក ស្រស់ស្អាត និងផ្ចិតផ្ចង់។ ដោយមានសភាពចាស់ទ្រុឌទ្រោម ក្រុមអ្នកជំនាញជាតិ និងអន្តរជាតិ បានសហការគ្នាលើការជួសជុល ឲ្យកាន់តែប្រសើរឡើង និងមានសភាពដូចដើម។

ផ្អែកលើប្រវត្តិ នៃកិច្ចការអភិរក្សប្រាសាទអង្គរវត្ត បានបង្ហាញថា អំឡុងសតវត្សទី១៦ ដល់ទី១៨ គឺក្នុងពេលរាជធានី ត្រូវបានផ្លាស់ចេញពីអង្គរ ហើយព្រះបាទចន្ទរាជា បុត្រ និងចៅ របស់ព្រះអង្គ បានធ្វើការជួសជុល និងបំពេញបង្រ្គប់ លើរចនាសម្ព័ន្ធខ្លះៗ ដែលមិនទាន់បានបញ្ចប់នាព្រះរាជាមុនៗ។ ក្នុងសម័យក្រោយៗមកទៀត ប្រាសាទអង្គរវត្ត ត្រូវបានស្ថាប័នអន្តរជាតិមួយចំនួន ពោលពីសំណាក់សាលាបារាំងចុងបូព៌ា (EFEO) បានសង្រ្គោះ និងជួសជុលលើរចនាសម្ព័ន្ធគ្រោះថ្នាក់ ឬ ទ្រុឌទ្រោមមួយផ្នែកធំរបស់ប្រាសាទ។

កិត្តិនាមលើតម្លៃ នៃប្រាសាទអង្គរវត្ត មិនត្រឹមតែទាក់ទាញភ្ញៀវទេសចរមកទស្សនាប៉ុណ្ណោះទេ តែក៏បានទាក់ទាញស្ថាប័នអន្តរជាតិមួយចំនួន ចូលរួមចំណែក ក្នុងកិច្ចការអភិរក្ស ជួសជុល តាមរយ:ការផ្តល់ជំនួយផ្នែកបច្ចេកទេស។

លោក សយ សុភារិន្ទ មន្ត្រីបច្ចេកទេសអភិរក្សថ្ម ដែលកំពុងធ្វើការជួសជុលចម្រឹងបង្អួចប្រាសាទអង្គរវត្ត បានបញ្ជាក់ថា បច្ចុប្បន្នការដ្ឋានជាតិ និងអន្តរជាតិដែលកំពុងដំណើរការអភិរក្ស និងជួសជុលថ្ម នៅប្រាសាទអង្គរវត្តមានចំនួន៤ស្ថាប័ន រួមមាន៖

ទី១-គម្រោងរបស់អាជ្ញាធរជាតិអប្សរា ដែលកំពុងជួសជុលពង្រឹងចម្រឹងបង្អួច និងច្រាំងកសិន្ធុខាងលិចផ្នែក ខាងជើងបា្រសាទអង្គរវត្តប្រវែង ៤០ម៉ែត្រ ដែលគ្រប់គ្រងលើផ្នែកបច្ចេកទេស ផ្ទាល់ពីអ្នកជំនាញខ្មែរសុទ្ធសាធ នៃអាជ្ញាធរជាតិអប្សរា

ទី២-គម្រោងរបស់ប្រទេសអ៊ីតាលី រួមសហការជាមួយអាជ្ញាធរជាតិអប្សរា (APSARA-I.Ge.S) ដែលទើប បញ្ចប់លើកិច្ចការជួសជុលបង្កាន់ដៃនាគ នៅក្ការបែនខាងលិច និងច្រាំងកសិន្ធុខាងលិច ប្រាសាទអង្គរវត្តក្នុង ដំណាក់កាលទី២ប្រវែង៤០ម៉ែត្រកាលពីចុងខែ ធ្នូ ឆ្នាំ២០១៥កន្លងទៅ

ទី៣-គម្រោងជួសជុលក្បាច់ចម្លាក់ និងចម្លាក់ទេពអប្សរារបស់ប្រទេសអាឡឺម៉ង់ សហការជាមួយអាជ្ញាធរជាតិអប្សរា (APSARA-GACP) ហើយបច្ចុប្បន្នគម្រោងនេះ កំពុងជួសជុលបន្ទាន់លើស្ថានភាព ខូចខាតរបស់ក្បាច់ ចម្លាក់លើផ្តែរ ហោជាង ចម្លាក់លើជញ្ជាំងនៅរួតខាងលើកំពូលនៃប៉មជ្រុងពាយ័ព្យរបស់តរោងទងទី២ ប្រាសាទអង្គរវត្ត

ទី៤-គម្រោងរបស់អាជ្ញាធរជាតិអប្សរា និងសាកលវិទ្យាល័យសូហ្វីយ៉ា នៃប្រទេសជប៉ុន (APSARA-SOPHIA) កំពុងរៀបចំ និងសិក្សាលើផែនការលម្អិតដើម្បីជួសជុលស្ពានហាលខាងលិចនៃ ប្រាសាទអង្គរវត្តក្នុងដំណាក់ទី២ ដែលទើបតែបើកពិធីសម្ពោធ ការដ្ឋានកាលពីថ្ងៃទី៩ ខែឧសភា ឆ្នាំ ២០១៦កន្លងទៅ។ ដោយឡែកនៅឆ្នាំ២០០៨ គម្រោងមូលនិធិប្រាសាទពិភពលោក (WMF) របស់សហរដ្ឋអាមេរិក បានជួសជុលដំបូលរោងទងកូរសមុទ្រទឹកដោះក្នុងបំណង គឺការពារជម្រាបទឹកដែលហូរស្រក់ពីដំបូលមកលើជញ្ជាំង ដែលនាំឲ្យមានការខូចខាត និងពុកផុយដល់ផ្ទៃរឿង ចម្លាក់លើជញ្ជាំង ហើយបានបញ្ចប់កិច្ចការជួសជុលនេះ នៅ ឆ្នាំ២០១២៕

ខ្មែរឡូត