បេក្ខជន បេក្ខនារីស្អាតៗរបស់កម្មវិធី THE IDOL បង្ហាញមុខទៀតហើយ

បេក្ខជន បេក្ខនារីស្អាតៗរបស់កម្មវិធី THE IDOL បង្ហាញមុខទៀតហើយ

ឆ្លងកាត់វគ្គជម្រុះចំនួន៣លើនៅភ្នំពេញ កម្មវិធី “THE IDOL” បានរកឃើញបេក្ខជន បេក្ខនារីវ័យក្មេងស្អាតៗឆ្លងចូលមកដល់វគ្គចុងក្រោយហើយ។ ក្រុមហ៊ុន BKA Entertainment ដែលជាអ្នករៀបចំកម្មវិធីប្រកួតនេះ បានបញ្ចេញឲ្យដឹងនៅក្នុងសន្និសីទសារព័ត៌មានមួយកាលពីម្សិលមិញ។

បេក្ខជនដែលបានឆ្លងចូលមកដល់វគ្គចុងក្រោយ ត្រៀមប្រកួតរកម្ចាស់ជយលាភីបន្តទៀតនេះ មានចំនួន១០រូប គឺស្រី ៥ ប្រុស ៥ ដោយជ្រើសចេញមកពីបេក្ខជនចំនួន ៥០រូប មកពីមណ្ឌលចំនួន៤ គឺមណ្ឌលកំពង់ចាម បាត់ដំបង សៀមរាប និងភ្នំពេញ។ នេះបើតាមលោក ប៉ុន កើដ ម្ចាស់រៀបចំកម្មវិធីខាងលើ បានប្រាប់ឲ្យដឹង។

អ្នករៀបចំកម្មវិធីរូបនេះ បានឲ្យដឹងទៀតថា បេក្ខជនទាំង ១០ ឬហៅម្យ៉ាងទៀតថា ជាអ្នកប្រមាញ់ក្តីស្រមៃ បេះដូងខ្មែរ ទាំង១០រូប នឹងត្រូវបង្ហាញសមត្ថភាព ប្រចាំសបា្តហ៍ តាមរយៈបទចម្រៀង ចង្វាក់ភ្លេង ប្រភេទផ្សេងៗពីគ្នា។ ពួកគេ នឹងត្រូវជម្រុះ ចេញពីកម្មវិធីប្រកួតផ្អែកលើពិន្ទុផ្ញើសារ ៥០% ដែលបានមកពីការផ្ញើសាររបស់ប្រិយមិត្ត តាមរយៈបណ្ដាញទូរសព្ទចល័ត CellCard ។

រូបភាពផ្ដល់ដោយ BKA

ការប្រឡងប្រជែងសមត្ថភាពរបស់បេក្ខជនទាំង ១០នឹងត្រូវផ្សាយផ្ទាល់ ជាលើកទី១ តាមរយៈស្ថានីយទូរទស្សន៍ MyTV នៅថ្ងៃទី៣១ ខែកក្កដា នេះ ចាប់ពីម៉ោង៥ល្ងាច រហូតដល់ម៉ោង ៧យប់ ដោយមានគណៈកម្មការ ផ្តល់មូលវិចារណ៍ចំនួន ៣រូបគឺលោកគ្រូ ហួរ ឡាវី អ្នកគ្រូ គង់ ណារី និងលោក មែ វិចិត្របុត្រ ។ ដោយឡែក កម្មវិធីប្រកួតផ្តាច់ព្រ័ត្រ នឹងធ្វើទ្បើង នៅថ្ងៃទី១១ ខែកញ្ញា វេលាម៉ោង ៥ល្ងាចដដែល ដោយមានការផ្សាយផ្ទាល់ តាមរយៈស្ថានីយទូរទស្សន៍ My TV ផងដែរ។

បន្ទាប់ពីបានចាប់ដំណើរការឆ្នាំថ្មីកាលពីថ្ងៃទី ៨ ឧសភា “THE IDOL” ឆ្នាំនេះ គឺជាឆ្នាំទី៥ហើយ និងបានបណ្ដុះយុវជន យុវនារីជាច្រើនរួចមកហើយឲ្យក្លាយជាតារាដូចក្ដីសុបិនរបស់ពួកគេ។ លោក ប៊ុន កើដ ថ្លែងថា អ្វីដែល “THE IDOL” បានធ្វើ គឺដើម្បីរួមចំណែកលើកស្ទួយ សិល្បៈចម្រៀងខ្មែរ សមស្របតាមពាក្យស្លោក ក្រសួងវប្បធម៌ “កម្ពុជាព្រះរាជាណាចក្រនៃវប្បធម៌” ក៏ដូចជាលើកកម្ពស់ សមត្ថភាពទេពកោសល្យ ប្រជាពលរដ្ឋខ្មែរ ជាពិសេសយុវជន យុវតីខ្មែរ ៕

ប្រភព: sabay

មុន បន្ទាប់

មតិយោបល់