កាប់ប្លន់យកម៉ូតូស្រស់ៗ នៅក្បែររង្វង់មូលកាំកូស៊ីធី

កាប់ប្លន់យកម៉ូតូស្រស់ៗ នៅក្បែររង្វង់មូលកាំកូស៊ីធី

រាជធានីភ្នំពេញ ៖ នៅវេលាម៉ោង០៨និង០០នាទីយប់ ថ្ងៃទី២២ ខែសីហា ឆ្នាំ២០១៦នេះ ត្រង់ចំណុចក្បែររង្វង់មូលកាំកូស៊ីធី ស្ថិតក្នុងសង្កាត់ទួលសង្កែ ខណ្ឌឬស្សីកែវ មានករណីប្លន់ម៉ូតូ មួយគ្រឿងបានសម្រេច ដោយជនសង្ស័យបានប្រើកាំបិត កាប់ទៅលើរងគ្រោះ។

ប្រភពពីជនរងគ្រោះបានឲ្យដឹងថា ពួកគេទាំង៣នាក់ឈ្មោះ ទី១.ហ៊ន សាម៉ុត ភេទប្រុស អាយុ២៤ឆ្នាំ មុខរបរជាងផ្សារដែក (ជាអ្នកបើកម៉ូតូ) ទី២.ឈ្មោះ វ៉េង ស្រេ ភេទប្រុស អាយុ២០ឆ្នាំ មុខរបរជាងផ្សារដែក (ជិះកណ្ដាល) និងទី៣.ឈ្មោះ សុភក្ដិ ភេទស្រី អាយុ១៨ឆ្នាំ (ជិះខាងក្រោយគេ) អ្នកទាំង៣នាក់រស់នៅម្ដុំកាំកូស៊ីធី សង្កាត់ទួលសង្កែ ខណ្ឌឬស្សីកែវ។

ជនរងគ្រោះទាំង៣ ជិះម៉ូតូមួយគ្រឿងម៉ាកណិច ពណ៌ស ពាក់ស្លាកលេខ ភ្នំពេញ 1CK-1930។ នៅមុនពេលកើតហេតុ ពួកគេទាំង៣នាក់ បាននាំគ្នាជិះម៉ូតូទៅលេងក្នុងកាំកូស៊ីធី លុះដល់ពេលត្រឡប់មកវិញ ឆ្លងផុតកន្លែងត្រួតពិនិត្យបន្តិចជិតដល់រង្វង់មូល ស្រាប់តែលេចមុខ ជនសង្ស័យមួយក្រុម មានគ្នា៦នាក់ជិះម៉ូតូ២គ្រឿង Zoomer-X ពណ៌ខៀវមួយគ្រឿង និងឌ្រីមសេ១២៥មួយគ្រឿង ប្រដាប់ដោយកាបិតគ្រប់ដៃ ហើយបានធ្វើសកម្មភាពដេញកាប់ ប្រហារជនរងគ្រោះ បណ្ដាលឲ្យត្រូវ និងរងរបួសអ្នកជិះខាងមុខ និងកណ្ដាល ។

ដោយឃើញសភាពបែបនេះ រួមជាមួយការតក់ស្លុតផងនោះ ជនរងគ្រោះទាំង៣បានរត់គេចខ្លួនដើម្បីសុវត្ថិភាព ធ្វើឲ្យជនសង្ស័យមានឳកាស លើកយកម៉ូតូជិះគេចខ្លួនបាត់ស្រមោល។

ក្រោយពេលកើតហេតុ ជនរងគ្រោះដែលរងរបួស ត្រូវបានកម្លាំងនគរបាលបញ្ជូនទៅកាន់មន្ទីរពេទ្យ ដើម្បីធ្វើការព្យាបាលរបួសស្នាម ហើយបានរៀបចំពាក្យបណ្ដឹង នៅប៉ុស្ដិ៍នគរបាលសង្កាត់ទួលសង្កែ ដើម្បីស្រាវជ្រាវឈានទៅរក ការចាប់ខ្លួនជនសង្ស័យមកផ្ដន្ទាទោសតាមច្បាប់៕

ប្រភព ៖ កោះសន្តិភាព

កំណត់ហេតុខ្មែរឡូត៖

គួររំលឹកដែរថា ដោយឡែកករណីមួយវិញទៀត ក្រុមចោរប្រមាណ១០នាក់ ប្រដាប់ដោយដាវសាំម៉ូរៃ ធ្វើការកាប់ប្រហារ ទៅលើក្រុមយុវជន ដែលមានគ្នា៤នាក់ បណ្តាលឲ្យរងរបួសម្នាក់ ប្លន់យកម៉ូតូសង់ ២០១៦ ពណ៌ខ្មៅ មួយគ្រឿង គ្មានស្លាកលេខ តាមបណ្តោយផ្លូវ ព្រះសីហនុ ស្ថិតក្នុងសង្កាត់ បឹងកេងកងទី១ ខណ្ឌចំការមន នាម៉ោង ៣ទៀបភ្លឺថ្ងៃទី០១ ខែមេសាឆ្នាំ២០១៦ កន្លងទៅ។

ជនរងគ្រោះ មានឈ្មោះ មឿន សុខៈ ស្នាក់នៅម្តុំផ្សារសឡា ស្ថិតក្នុងសង្កាត់ទឹកថ្លា ខណ្ឌសែនសុខ ហើយត្រូវបានមិត្តភក្តិ ដឹកយកទៅ សង្គ្រោះនៅមន្ទីរពេទ្យ។ បើតាមមិត្តភក្តិ របស់ជនរគ្រោះ ដែលឋិតនៅក្នុងហេតុការណ៌ កាប់ប្លន់នោះបាននិយាយថា ខ្លួននិងមិត្តភ័ក្រ ៣នាក់ទៀត មានទាំងជនរងគ្រោះ ផងនោះ ជិះម៉ូតូ២គ្រឿង ចេញពីហូបបបរ នៅម្តុំផ្សារដើមគរ ក្នុងបំណងទៅលេងនៅ ម្តុំមាត់ទន្លេ ដោយជិះតាមផ្លូវព្រះសីហនុ លុះជិះដល់ កន្លែងកើតហេតុ ក៏លេចមុខជនល្មើស ជាង១០នាក់ ជិះម៉ូតូ ៦គ្រឿង ប្រដាប់ដោយដាវសាំម៉ូរ៉ៃ បានធ្វើការកាប់ប្រហារ ជាច្រើនដាវ មកលើជនរងគ្រោះ បណ្តាលឲ្យរងរបួសធ្ងន់ធ្ងរ ។

ខណៈក្រុមជនរងគ្រោះ រត់យករួចខ្លួននោះ ក្រុមជនល្មើសក៏លើក យកម៉ូតូ ជនរងគ្រោះជិះគេច ចេញពី ន្លែងកើតហេតុ ដោយសុវត្ថិភាព មិនបានរំខាន ដល់នគរបាលប៉ុស្តិ៍ បឹងកេងកង១ និងនគរបាលខណ្ឌចំការមន ដែលមានលោក យិន សាន ជាអធិការខណ្ឌ ឈឺក្បាលនោះទេ ៕