ខ្លាំងណាស់ ! ទីបំផុតសល់តែដង្ហើមចង្រិត

ខ្លាំងណាស់ ! ទីបំផុតសល់តែដង្ហើមចង្រិត

ខេត្តប៉ៃលិន ៖ បុរសម្នាក់ដែលល្បីថាជាជើងខ្លាំង ប៉ូលិសខ្លាចស្ទើរគ្រប់គ្នា បានរងរបួសធ្ងន់សល់តែ ដង្ហើមចង្រិតដោយសា រក្រឡាប់រថយន្តកាលពី វេលាម៉ោង១រសៀល ថ្ងៃទី១៦ ខែសីហា ឆ្នាំ២០១៦ ស្ថិតក្នុងភូមិស្ទឹងកាច់ ឃុំស្ទឹងកាច់ ស្រុកសាលាក្រៅ ។

ប្រភពព័ត៌មានបានឱ្យដឹងថា ជនរងគ្រោះមានឈ្មោះ សា ណាក់ អាយុជាង២០ឆ្នាំ រស់នៅភូមិវត្ត សង្កាត់ប៉ៃលិន ក្រុងប៉ៃលិន បើកបររថយន្តថៃម៉ាក Hilux Vigo ពណ៌ខ្មៅ ពាក់ស្លាកលេខថៃ ក្នុងទិសដៅពីត្បូងទៅជើង រងរបួសធ្ងន់ដង្ហើមចង្រិត ត្រួវបានគេបញ្ជូនទៅសង្គ្រោះបន្ទាន់ នៅមន្ទីរពេទ្យបង្អែកខេត្ត ។

ប្រភពបញ្ជាក់ថា ជនរងគ្រោះគឺជាកូនរបស់ឈ្មោះ សា ចំរើន អាយុ៥០ឆ្នាំ ជាប្រធានក្រុមហ៊ុនវាយកម្ទេចថ្មភ្នំ ស្ពុងក្នុងភូមិស្ពុង ឃុំសាលាក្រៅ ។

ប្រភព័ត៌មានពីកន្លែង កើតហេតុបានឲ្យដឹងថា មុនពេលកើតហេតុ គេឃើញជនរងគ្រោះបើកបររថយន្ត ១គ្រឿងជារថយន្ត មកពីប្រទេសថៃក្នុងល្បឿនលឿន ដូចហោះក្នុងទិសដៅពីត្បួងទៅជើង ហើយក៏រេចង្កួចពេញផ្លូវ ក្រឡាប់ជាច្រើនត្រឡប់បណ្ដាលឲ្យរបួសធ្ងន់ ត្រួវបានបងប្អូនជួយដឹក យកទៅសង្គ្រោះតែម្តង សូម្បីតែសមត្ថកិច្ចក៏ចុះពិនិត្យមិនទាន់ផង ព្រោះគេខ្លាចខូចកេរ្តិ៍ឈ្មោះ ។

ប្រភពព័ត៌មានបាន បន្តឲ្យដឹងដែរថា ការបើកបរល្បឿនលឿនវាជាទម្លាប់របស់ជនរងគ្រោះទៅហើយ ដោយមិនខ្វល់ថា តាមជនបទ ទីប្រជុំជន ឬទីក្រុងនោះទេ គឺមិនដែលឃើញសមត្ថកិច្ច ជំនាញណាម្នាក់ហ៊ានហាមឃាត់ ដើម្បីធ្វើការអប់រំនោះឡើយ ដោយមានពេលខ្លះពេលមាន សមត្ថកិច្ចចរាចរណ៍ ចុះល្បាតតាមគោលដៅ គឺបុរសរងគ្រោះខាងលើតែងតែបើកបរ មិនញញើតនឹងច្បាប់ បន្តិចសោះឡើយ ។

បើតាមប្រភពព័ត៌មាន ពីមន្ត្រីនគរបាលចរាចរណ៍ម្នាក់ បានបង្ហើបឲ្យដឹងថា សមត្ថកិច្ចចរាចរណ៍តាំងពីថ្នាក់ក្រោម រហូតដល់ថ្នាក់លើ គឺមិនហ៊ានក្អក ឬហាមឃាត់រថយន្តរបស់បុរសខាងលើនោះឡើយ ព្រោះខ្លាចធ្លាក់ពីតំណែង ប្រសិនបើមានការឃាត់រថយន្តថៃ ដែលបុរសខាងលើនោះ បើកបរគឺតែងតែមានការ អន្តរាគមន៍ពីថ្នាក់លើរហូត ទើបធ្វើឲ្យពួកគេមិនហ៊ាន ធ្វើការឃាត់ដើម្បីយកមកអប់រំឡើយ ។ តែសំណាងមិនជួយ ពេលនេះបានក្រឡាប់ របួសធ្ងន់បាត់ទៅហើយ ៕

ប្រភព ៖ កោះសន្តិភាព

កំណត់ហេតុខ្មែរឡូត៖

គួររំលឹកដែរថា ដោយឡែកករណីមួយផ្សេងទៀត រថយន្ត២គ្រឿងបើកក្នុង ល្បឿនលឿនដូចគ្នា បានបុកគ្នាយ៉ាងពេញទំហឹងបណ្ដាលឲ្យ រថយន្ត១គ្រឿងជ្រុល ទៅបុកទម្លុះទ្វាររូត២ជាន់ បុកចូលទៅផ្ទះលក់កាហ្វេ គុយទាវ បណ្ដាលឲ្យម្ចាស់ផ្ទះភ័យ ស្ទើរលស់ព្រលឹងគ្រប់ៗគ្នា ។

ហេតុការណ៍នេះ កើតឡើងកាលពីវេលាម៉ោង១ និង១៤នាទី យប់រំលងអាធ្រាត្រឈានចូលថ្ងៃទី១៥ ខែសីហា ឆ្នាំ២០១៦ កន្លងទៅ នៅចំណុចផ្ទះលក់កាហ្វេ គុយទាវ យីហោ វេង លី ចំណុចផ្លូវលេខ១៦៣ កែងផ្លូវលេខ៤៣២ សង្កាត់ទួលទំពូង១ ខណ្ឌចំការមន ។

ប្រភពព័ត៌មានបានឲ្យដឹងថា មុនពេលកើតហេតុគេបានឃើញ បុរសម្នាក់បើករថយន្តម៉ាក ស៊ីណា ពណ៌ស ពាក់ស្លាកលេខ ភ្នំពេញ 2AC 8209 ធ្វើដំណើរតាមផ្លូវលេខ១៦៣ ទិសដៅពីជើងទៅត្បូង ក្នុងល្បឿនលឿន ខណៈមកដល់ចំណុចកើតហេតុ ដែលជាផ្លូវបំបែកជាបួន ក៏ស្រាប់តែមានរថយន្ត ម៉ាកកាមរីបាឡែន ពណ៌កណ្តុរល្មែះ ពាក់ស្លាកលេខ ភ្នំពេញ 2AG 6525 ធ្វើដំណើរតាមផ្លូវលេខ ៤៣២ ទិសដៅពីកើតទៅលិច ក្នុងល្បឿនលឿនដូចគ្នា ក៏ជ្រុលទៅបុករថយន្ត ម៉ាកស៊ីណាចំថ្ពាល់ខាងមុខ ចំហៀងខាងឆ្វេងពេញទំហឹង ធ្វើរថយន្តស៊ីណារេចង្កូត ទៅបុកចូលផ្ទះលក់កាហ្វេ និងគុយទាវ យីហោ វេង លី ធ្លុះទ្វាររូត២ជាន់ បុករះម៉ូតូ៤គ្រឿង ម៉ាក PCX ១គ្រឿង ម៉ាកស្តេប១គ្រឿង ម៉ាកហុងដាឌ្រីម១គ្រឿង ម៉ាកកូនទា១គ្រឿង និងតុ កៅអី ទូ និងសម្ភារគ្រឿងទេសសម្រាប់ លក់ដូរខ្ទេចខ្ទីអស់មួយចំនួនទៀត តែមិនបណ្តាលមានអ្នករងរបួសឡើយ។

ភ្លាមៗនោះ អ្នកបើកបររថយន្តបានរត់គេចខ្លួនបាត់ ។ ដោយឡែកខាងរថយន្តបង្កកាមរីបាឡែន ឃើញសភាពដូចនេះក៏បានបន្ថែមល្បឿន បើករត់គេចខ្លួនបាត់ស្រមោល ដោយបន្សល់ទុក ស្លាកលេខនៅកន្លែងកើតហេតុ ។

ក្រោយពេលកើតហេតុរថយន្តបង្ក ត្រូវសមត្ថកិច្ចស្ទូចយក ទៅរក្សាទុកនៅការិយាល័យចរាចរណ៍ ផ្លូវគោករាជធានីភ្នំពេញ ដើម្បីទុកធ្វើការដោះស្រាយនៅពេលក្រោយ ៕